ഒക്റ്റോബറില്‍ എഫ്‍പിഐ-കളുടെ അറ്റ വില്‍പ്പന 9,800 കോടി രൂപ

യുഎസ് ബോണ്ട് യീൽഡുകളിലെ തുടർച്ചയായ വർധനയും ഇസ്രായേൽ-ഹമാസ് സംഘർഷത്തിന്റെ ഫലമായുണ്ടായ അനിശ്ചിതത്വവും കാരണം വിദേശ പോർട്ട്‌ഫോളിയോ നിക്ഷേപകർ (എഫ്‌പിഐ) ഈ മാസം ഇതുവരെ ഇന്ത്യൻ ഇക്വിറ്റികളിൽ നിന്ന് ഏകദേശം 9,800 കോടി രൂപയുടെ അറ്റ പിന്‍വലിക്കല്‍ നടത്തി. സെപ്റ്റംബറിൽ 14,767 കോടി രൂപയുടെ അറ്റ പിൻവലിക്കലാണ് എഫ്‍പിഐകളുടെ ഭാഗത്ത് നിന്ന് ഉണ്ടായത്.

ഇതിനു മുമ്പ് മാർച്ച് മുതൽ ഓഗസ്റ്റ് വരെയുള്ള കഴിഞ്ഞ ആറ് മാസങ്ങളിൽ എഫ്പിഐകൾ തുടർച്ചയായി ഇന്ത്യൻ ഓഹരികളിലെ വാങ്ങലുകാരായി നില്‍ക്കുകയും 1.74 ലക്ഷം കോടി രൂപ കൊണ്ടുവരികയും ചെയ്തു. യുഎസിലെ പണപ്പെരുപ്പം ഫെബ്രുവരിയിലെ 6 ശതമാനത്തിൽ നിന്ന് ജൂലൈയിൽ 3.2 ശതമാനത്തിലേക്ക് കുറഞ്ഞതാണ് ഈ ഒഴുക്കിന് പ്രധാന കാരണമായത്. മെയ് മുതൽ ഓഗസ്റ്റ് വരെ യുഎസ് ഫെഡറൽ റിസര്‍വ് നിരക്ക് വർദ്ധന താൽക്കാലികമായി നിര്‍ത്തിവെച്ചതും ഇതില്‍ ഒരു പങ്കുവഹിച്ചു.

ഇനി യുദ്ധത്തിന്‍റെ ഗതി നിര്‍ണായകം

ഇനിയങ്ങോട്ട്, ആഗോള പണപ്പെരുപ്പവും പലിശ നിരക്കുകളിലെ മാറ്റവും മാത്രമല്ല, ഇസ്രായേൽ-ഹമാസ് സംഘർഷത്തിന്റെ സംഭവവികാസങ്ങളും തീവ്രതയും ഇന്ത്യയിലെ എഫ്‌പിഐകളുടെ നിക്ഷേപത്തിന്റെ പാതയെ സ്വാധീനിക്കുമെന്ന് മോണിംഗ്‌സ്റ്റാർ ഇൻവെസ്റ്റ്‌മെന്റ് അഡ്വൈസർ ഇന്ത്യയിലെ അസോസിയേറ്റ് ഡയറക്ടർ, മാനേജർ റിസർച്ച് ഹിമാൻഷു ശ്രീവാസ്തവ പറഞ്ഞു.

ഭൗമരാഷ്ട്രീയ പിരിമുറുക്കങ്ങൾ അപകടസാധ്യത വർദ്ധിപ്പിക്കാൻ ഇടയുണ്ട്, ഇത് സാധാരണയായി ഇന്ത്യയെപ്പോലുള്ള വളർന്നുവരുന്ന വിപണികളിലേക്കുള്ള വിദേശ മൂലധനത്തിന്റെ ഒഴുക്കിനെ ബാധിക്കുന്നതാണെന്ന്, അദ്ദേഹം കൂട്ടിച്ചേർത്തു.

വര്‍ഷത്തിന്‍റെ കണക്കില്‍ അറ്റ നിക്ഷേപകര്‍

ഡിപ്പോസിറ്ററികളിലെ ഡാറ്റ അനുസരിച്ച്, ഈ മാസം (ഒക്ടോബർ 13 വരെ) വിദേശ പോർട്ട്ഫോളിയോ നിക്ഷേപകർ (എഫ്പിഐകൾ) 9,784 കോടി രൂപയുടെ അറ്റ വില്‍പ്പന ഓഹരികളില്‍ നടത്തി. മറുവശത്ത്, അവലോകന കാലയളവിൽ എഫ്പിഐകൾ രാജ്യത്തിന്റെ ഡെറ്റ് മാർക്കറ്റിൽ 4,000 കോടി രൂപയുടെ അറ്റ നിക്ഷേപം നടത്തി. ഇതോടെ, ഈ വർഷം ഇതുവരെ എഫ്‍പിഐകൾ ഇക്വിറ്റിയിൽ നടത്തിയ മൊത്തം നിക്ഷേപം 1.1 ലക്ഷം കോടി രൂപയിലും ഡെറ്റ് മാർക്കറ്റിൽ നടത്തിയ നിക്ഷേപം 33,000 കോടി രൂപയിലും എത്തി.

ധനകാര്യം, ഊർജ്ജം, ഐടി തുടങ്ങിയ മേഖലകളിലാണ് ശക്തമായ എഫ്‍പിഐ വില്‍പ്പന പ്രകടമായത്. എന്നിരുന്നാലും, അവർ മൂലധന ഉല്‍പ്പന്നങ്ങളിലും ഓട്ടോമൊബൈലിലും വാങ്ങലുകാരായി തുടര്‍ന്നു.