കാളകള്‍ പതുങ്ങിയത് കുതിക്കാനോ? ഏഷ്യന്‍ വിപണികള്‍ ഉണര്‍വില്‍; ഇന്ന് വിപണി തുറക്കും മുമ്പ് അറിയേണ്ടത്

ആറു ദിവസത്തെ തുടര്‍ച്ചയായ കയറ്റത്തിനു ശേഷം ഇന്നലെ ബെഞ്ച്മാര്‍ക്ക് സൂചികകള്‍ തിരുത്തലിന് വിധേയമായി. തുടര്‍ച്ചയായ റാലിക്ക് ശേഷമുള്ള ലാഭമെടുക്കലും കണ്‍സോളിഡേഷനും അല്‍പ്പം കൂടി തുടര്‍ന്നേക്കാമെന്നാണ് വിദഗ്ധര്‍ വിലയിരുത്തുന്നത്. എങ്കിലും കാളകള്‍ ഇപ്പോഴും വിപണിയില്‍ ശക്തരാണെന്നും ഈ തിരുത്തലിനു ശേഷം അധികം വൈകാതെ പുതിയ ഉയരങ്ങളിലേക്ക് സൂചികകള്‍ പോകാമെന്നും ഇവര്‍ ചൂണ്ടിക്കാണിക്കുന്നു.

നിഫ്റ്റിയുടെ പ്രതിരോധവും പിന്തുണയും

പിവറ്റ് പോയിൻ്റ് കാൽക്കുലേറ്റർ സൂചിപ്പിക്കുന്നത് നിഫ്റ്റി 22,005 ലും തുടർന്ന് 21,945ലും 21,849ലും ഉടനടി പിന്തുണ സ്വീകരിക്കാൻ സാധ്യതയുണ്ട് എന്നാണ്. ഉയർന്ന ഭാഗത്ത് 22,256ലും തുടര്‍ന്ന് 22,352ലും 22,197ലും ഉടനടി പ്രതിരോധം കണ്ടേക്കാം.

ആഗോള വിപണികളില്‍ ഇന്ന്

യുഎസ് വിപണികള്‍ സമ്മിശ്ര തലത്തിലാണ് ബുധനാഴ്ചത്തെ വ്യാപാരം അവസാനിപ്പിച്ചിട്ടുള്ളത്. നാസ്‍ഡാഖ് തുടര്‍ച്ചയായ മൂന്നാം ദിവസവും ഇടിവ് നേരിട്ടു. എസ് & പി 500 0.13 ശതമാനം ഉയർന്ന് 4,981.80 പോയിൻ്റിൽ സെഷൻ അവസാനിപ്പിച്ചു. നാസ്‌ഡാക്ക് 0.32 ശതമാനം ഇടിഞ്ഞ് 15,580.87 പോയിൻ്റിലും ഡൗ ജോൺസ് ഇൻഡസ്ട്രിയൽ ആവറേജ് 0.13 ശതമാനം ഉയർന്ന് 38,612.24 പോയിൻ്റിലുമെത്തി.

ഏഷ്യ പസഫിക് വിപണികള്‍ പൊതുവില്‍ നേട്ടത്തിലാണ് ഇന്ന് വ്യാപാരം ആരംഭിച്ചിട്ടുള്ളത്. ചൈനയുടെ ഷാങ്ഹായ്, ജപ്പാനിന്‍റെ നിക്കി, ഹോംഗ്കോംഗിന്‍റെ ഹാങ്സെങ്, ദക്ഷിണ കൊറിയയുടെ കോസ്പി തുടങ്ങിയവയെല്ലാം നേട്ടത്തിലാണ്. ഓസ്ട്രേലിയ എഎസ്എക്സ് ഇടിവ് നേരിടുന്നു.

ഗിഫ്റ്റ് നിഫ്റ്റി ഇന്ന് 83.50 പോയിന്‍റിന്‍റെ നേട്ടത്തോടെയാണ് വ്യാപാരം ആരംഭിച്ചിട്ടുള്ളത്. ബെഞ്ച്മാര്‍ക്ക് സൂചികകള്‍ നേട്ടത്തോടെ തുടങ്ങുമെന്ന സൂചനയാണ് ഡെറിവേറ്റിവ് വിപണി നല്‍കുന്നത്.

ഇന്ന് ശ്രദ്ധ നേടുന്ന ഓഹരികള്‍

യുറീക്ക ഫോർബ്‌സ്: യുറീക്ക ഫോർബ്‌സിൻ്റെ പ്രൊമോട്ടറായ ലുനോലക്‌സ് വിപണിയിലെ ബ്ലോക്ക് ഡീലുകളിലൂടെ 12 ശതമാനം ഓഹരികൾ അഥവാ 2.3 കോടി ഓഹരികൾ വരെ വിൽക്കാൻ സാധ്യതയുണ്ടെന്ന് റിപ്പോര്‍ട്ട്. ഇടപാടിൻ്റെ തറ വില 3 ശതമാനം ഡിസ്കൌണ്ടോടു കൂടി 494.75 രൂപയാണ്. 1,150 കോടി രൂപയാണ് മൊത്തം ഡീല്‍ വലുപ്പം.

ഹോംഫസ്റ്റ് ഫിനാൻസ്: ലൈഫ്, ജനറൽ, ഹെൽത്ത് ഇൻഷുറൻസ് എന്നിവ നല്‍കുന്നതിനായി കമ്പനിക്ക് ഐആർഡിഎഐയിൽ നിന്ന് കോർപ്പറേറ്റ് ഏജൻ്റ് (കോമ്പോസിറ്റ്) ലൈസൻസ് ലഭിച്ചു. ഒരു കോർപ്പറേറ്റ് ഏജൻ്റ് എന്ന നിലയിൽ കമ്പനിക്ക് അതിൻ്റെ ഉപഭോക്താക്കൾക്ക് ഇൻഷുറൻസ് ഉൽപ്പന്നങ്ങൾ ലഭ്യമാക്കാന്‍ കഴിയും.

അപ്പോളോ മൈക്രോസിസ്റ്റംസ്: എസ്ബിഐ 110 കോടി രൂപ ടേം ലോൺ അനുവദിച്ചതായി കമ്പനി അറിയിച്ചു. ഹൈദരാബാദിലെ ഹാർഡ്‌വെയർ പാർക്കിൽ ഇൻ്റഗ്രേറ്റഡ് പ്ലാൻ്റ് ഫോർ ഇൻജീനിയസ് ഡിഫൻസ് സിസ്റ്റംസ് (ഐപിഐഡിഎസ്) സ്ഥാപിക്കുന്നതിനാണ് ഫണ്ട് ഉപയോഗിക്കുന്നത്.

ബ്രിഗേഡ് എൻ്റർപ്രൈസസ്: ചെന്നൈയിലെ പെരമ്പൂരിൽ 16 ഏക്കറിൽ വ്യാപിച്ചുകിടക്കുന്ന ,2.5 ദശലക്ഷം ചതുരശ്ര അടി വിസ്തീർണ്ണമുള്ള റെസിഡൻഷ്യൽ പ്രോജക്റ്റ് വികസിപ്പിക്കുന്നതിന് പിവിപി വെഞ്ചേഴ്‌സുമായി കമ്പനി സംയുക്ത വികസന കരാറിൽ ഒപ്പുവച്ചു. ഏകദേശം 2,000 കോടി രൂപയുടെ വരുമാന സാധ്യതയുള്ള പദ്ധതിയാണിത്.

എല്‍ടിഐമൈന്‍റ്‍ട്രീ: യൂറോപ്പിലും ഇന്ത്യയിലും ജെന്‍ എഐ & ഡിജിറ്റൽ ഹബ്ബുകൾ സ്ഥാപിക്കുന്നതിനുള്ള ധാരണാപത്രത്തിൽ കമ്പനി ഒപ്പുവച്ചു. പോളണ്ട്, യൂറോപ്പ്, മുംബൈ എന്നിവിടങ്ങളിലാണ് സൗകര്യങ്ങൾ വികസിപ്പിക്കുക. ഗ്രീസിലെ ഇൻഷുറൻസ് ബിസിനസുകൾക്കായി നൂതനമായ പരിഹാരങ്ങൾ വികസിപ്പിക്കുന്നതിന് ഏഥൻസിൽ യൂറോലൈഫ് ജനറേറ്റീവ് എഐ-ഡിജിറ്റൽ ഹബ് സ്ഥാപിക്കും, എല്‍ടിഐ മൈന്‍റ്ട്രീ പോളണ്ടിലെയും മുംബൈയിലെയും തങ്ങളുടെ ഫെസിലിറ്റികളില്‍ നിന്ന് ആഴത്തിലുള്ള ഡൊമെയ്ൻ വൈദഗ്ധ്യവും പിന്തുണയും നൽകും.

ക്രൂഡ് ഓയില്‍ വില

മിഡിൽ ഈസ്റ്റിൽ ഭൗമരാഷ്ട്രീയ പിരിമുറുക്കങ്ങൾ രൂക്ഷമായതിനാൽ ബുധനാഴ്ച എണ്ണവില 1 ശതമാനം ഉയർന്നു. യുഎസ് വെസ്റ്റ് ടെക്സസ് ഇൻ്റർമീഡിയറ്റ് ക്രൂഡ് ഫ്യൂച്ചേഴ്സ് (ഡബ്ല്യുടിഐ) 87 സെൻറ് അഥവാ 1.1 ശതമാനം ഉയർന്ന് ബാരലിന് 77.91 ഡോളറിലെത്തി, ബ്രെൻ്റ് ക്രൂഡ് 69 സെൻറ് അഥവാ 0.8 ശതമാനം ഉയർന്ന് ബാരലിന് 83.03 ഡോളറിലെത്തി.

വിദേശ ഫണ്ടുകളുടെ ഗതി

വിദേശ സ്ഥാപന നിക്ഷേപകർ (എഫ്ഐഐ) ഇന്നലെ ഓഹരികളില്‍ 284.66 കോടി രൂപയുടെ അറ്റ വാങ്ങല്‍ നടത്തി. ആഭ്യന്തര സ്ഥാപന നിക്ഷേപകർ (ഡിഐഐകൾ) 411.57 കോടി രൂപയുടെ അറ്റ വില്‍പ്പന നടത്തിയതായും എൻഎസ്ഇയിൽ നിന്നുള്ള താൽക്കാലിക കണക്കുകൾ വ്യക്തമാക്കുന്നു

ഓഹരി വിപണി വാര്‍ത്തകള്‍ അറിയാന്‍

നിരാകരണം: ഈ ലേഖനം വിജ്ഞാനത്തെ മാത്രം ഉദ്ദേശിച്ചുള്ളതാണ്, നിക്ഷേപ ശുപാര്‍ശയല്ല. ഓഹരി നിക്ഷേപം വിപണിയുടെ ലാഭ നഷ്ട സാധ്യതകൾക്ക് വിധേയമാണ്. ഓഹരി വിപണിയിൽ നിക്ഷേപിക്കും മുമ്പെ അംഗീകൃത സാമ്പത്തിക വിദഗ്ധന്റെ സേവനം തേടേണ്ടതാണ്. നിക്ഷേപങ്ങളിലൂടെയുണ്ടാകുന്ന നഷ്ടങ്ങള്‍ക്ക് ലേഖകനോ മൈഫിന്‍ പോയിന്‍റിനോ ഉത്തവരാദിത്തം ഉണ്ടായിരിക്കുന്നതല്ല.

വിപണി തുറക്കും മുന്‍പുള്ള മൈഫിന്‍ ടിവിയിലെ ലൈവ് അവലോകനം കാണാം