7 ടോപ് 10 കമ്പനികളുടെ മൊത്തം എംക്യാപില്‍ 3.04 ലക്ഷം കോടിയുടെ നേട്ടം

ഇക്വിറ്റികളിലെ മൊത്തത്തിലുള്ള ശുഭകരമായി പ്രവണതയ്‌ക്കിടയിൽ, വിപണി മൂല്യത്തില്‍ മുന്നില്‍ നില്‍ക്കുന്ന 10 സ്ഥാപനങ്ങളിൽ ഏഴിന്റെയും മൊത്തം വിപണി മൂല്യം കഴിഞ്ഞയാഴ്ച 3,04,477.25 കോടി രൂപ ഉയർന്നു.എച്ച്‌ഡിഎഫ്‌സി ബാങ്കും എൽഐസിയും ഏറ്റവും വലിയ നേട്ടമുണ്ടാക്കി. കഴിഞ്ഞയാഴ്ച ബിഎസ്ഇ ബെഞ്ച്മാർക്ക് 2,344.41 പോയിന്റ് അഥവാ 3.47 ശതമാനമാണ് ഉയർന്നത്.

എച്ച്‌ഡിഎഫ്‌സി ബാങ്ക്, ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യ (എൽഐസി), ഐസിഐസിഐ ബാങ്ക്, ടാറ്റ കൺസൾട്ടൻസി സർവീസസ്, റിലയൻസ് ഇൻഡസ്ട്രീസ് എന്നിവ വിപണി മൂല്യത്തിൽ കൂട്ടിച്ചേർക്കലുകൾ രേഖപ്പെടുത്തിയ കമ്പനികളിൽ ഉൾപ്പെടുന്നു.

എച്ച്‌ഡിഎഫ്‌സി ബാങ്കിന്റെ മൂല്യം 74,076.15 കോടി രൂപ ഉയർന്ന് 12,54,664.74 കോടി രൂപയായി. ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യയുടെ എംക്യാപ് 65,558.6 കോടി രൂപ ഉയർന്ന് 4,89,428.32 കോടി രൂപയിലെത്തി. വ്യാഴാഴ്ച കമ്പനിയുടെ ഓഹരികൾ 52 ആഴ്ചയിലെ ഏറ്റവും ഉയർന്ന നിലയിലെത്തിയപ്പോള്‍ എൽഐസി 5 ലക്ഷം കോടി രൂപയുടെ എംക്യാപ് വീണ്ടും സ്വന്തമാക്കിയിരുന്നു. എങ്കിലും വെള്ളിയാഴ്ച എല്‍ഐസി ഓഹരി താഴെപ്പോയി.

ഐസിഐസിഐ ബാങ്ക് എംക്യാപ് 45,466.21 കോടി രൂപ ഉയർന്ന് 7,08,836.92 കോടി രൂപയായി. ടാറ്റ കൺസൾട്ടൻസി സർവീസസ് (ടിസിഎസ്) എംക്യാപ് 42,737.72 കോടി രൂപ ഉയർന്ന് 13,26,918.39 കോടി രൂപയായും റിലയൻസ് ഇൻഡസ്ട്രീസ് ലിമിറ്റഡിന്റേത് 42,454.66 കോടി രൂപ ഉയർന്ന് 16,61,787.10 കോടി രൂപയായും മാറി.

സ്റ്റേറ്റ് ബാങ്ക് ഓഫ് ഇന്ത്യയുടെ മൂല്യം 37,617.24 കോടി രൂപ ഉയർന്ന് 5,47,971.17 കോടി രൂപയിലും ഇൻഫോസിസിന്റെ മൂല്യം 15,916.92 കോടി രൂപ ഉയർന്ന് 6,18,663.93 കോടി രൂപയിലും എത്തി.

എന്നിരുന്നാലും, ഹിന്ദുസ്ഥാൻ യുണിലിവറിന്റെ വിപണി മൂല്യം 9,844.79 കോടി രൂപ കുറഞ്ഞ് 5,92,414.19 കോടി രൂപയായും ഭാരതി എയർടെല്ലിന്റെ വിപണി മൂല്യം 8,569.98 കോടി രൂപ ഇടിഞ്ഞ് 5,61,896.90 കോടി രൂപയായും മാറി. കൂടാതെ, ഐടിസിയുടെ എംക്യാപ് 935.48 കോടി രൂപ കുറഞ്ഞ് 5,60,223.61 കോടി രൂപയായി.

ടോപ്പ്-10 സ്ഥാപനങ്ങളുടെ റാങ്കിംഗിൽ, റിലയൻസ് ഇൻഡസ്ട്രീസ് ലിമിറ്റഡ് ഏറ്റവും മൂല്യമുള്ള സ്ഥാപനം എന്ന പദവി നിലനിർത്തി. ടിസിഎസ്, എച്ച്ഡിഎഫ്‌സി ബാങ്ക്, ഐസിഐസിഐ ബാങ്ക്, ഇൻഫോസിസ്, ഹിന്ദുസ്ഥാൻ യുണിലിവർ ലിമിറ്റഡ്, ഭാരതി എയർടെൽ, ഐടിസി, സ്റ്റേറ്റ് ബാങ്ക് ഓഫ് ഇന്ത്യ, ലൈഫ് ഇൻഷുറൻസ്. കോർപ്പറേഷൻ ഓഫ് ഇന്ത്യ എന്നിവ യഥാക്രമം പിന്നീടുള്ള സ്ഥാനങ്ങളില്‍ വരുന്നു.