എൻടിപിസി ഗ്രീൻ എനർജിയുടെ ഐപിഒ നാളെ മുതൽ, ലക്ഷ്യം 10000 കോടി രൂപ

കേന്ദ്ര പൊതുമേഖലാ സ്ഥാപനമായ എൻടിപിസിയുടെ ഉപസ്ഥാപനമായ എൻടിപിസി ഗ്രീൻ എനർജിയുടെ പ്രാരംഭ ഓഹരി വിൽപന നവംബർ 19ന് ആരംഭിക്കും. 10,000 കോടി രൂപയുടെ സമാഹരണമാണ് കമ്പനി ലക്ഷ്യമിടുന്നത്.

102-108 രൂപയാണ് ഓഹരിയൊന്നിന് വില നിശ്ചയിച്ചിരിക്കുന്നത്. നിക്ഷേപകർക്ക് മിനിമം 138 ഓഹരികൾക്കായി അപേക്ഷിക്കാം. 75% ഓഹരികൾ യോഗ്യരായ നിക്ഷേപസ്ഥാപനങ്ങൾക്കും 10% ചെറുകിട നിക്ഷേപകർക്കും, 15% സ്ഥാപനേതര നിക്ഷേപകർക്കുമായാണ് നീക്കിവച്ചിരിക്കുന്നത്. 92.5 കോടി ഓഹരികളാണ് വിറ്റഴിക്കുന്നത്. കമ്പനിയുടെ ജീവനക്കാർക്കായി 200 കോടി രൂപയുടെ ഓഹരികൾ സംവരണം ചെയ്തിട്ടുണ്ട്. ഇവർക്ക് ഓഹരി ഒന്നിന് 5 രൂപ ഡിസ്കൗണ്ട് ഉണ്ടാകും. നവംബർ 22ന് ഓഹരി വിൽപന അവസാനിക്കും.