സ്വര്‍ണ വില ഇന്നും ഇടിഞ്ഞു

സ്വര്‍ണ വിലയില്‍ ഇന്ന് വീണ്ടും ഇടിവ്. 22 കാരറ്റ് സ്വര്‍ണം ഗ്രാമിന് ഇന്ന് 15 രൂപ കുറഞ്ഞ് 5635 രൂപയായി, ശനിയാഴ്ച 10 രൂപയുടെ ഇടിവ് രേഖപ്പെടുത്തിയിരുന്നു. പവന് ഇന്ന് 120 രൂപ കുറഞ്ഞ് 45,080 രൂപയിലാണ് വ്യാപാരം നടക്കുന്നത്. 24 കാരറ്റ് സ്വര്‍ണം ഗ്രാമിന് ഇന്ന് 17 രൂപ കുറഞ്ഞ് 6,147 രൂപയാണ്. എട്ട് ഗ്രാമിന് 136 രൂപ കുറഞ്ഞ് 49,176 രൂപ.

സ്വര്‍ണത്തിന് മാര്‍ച്ച് അവസാനം മുതല്‍ മേയ് പകുതി വരെ വലിയ മുന്നേറ്റം പ്രകടമായിരുന്നു. ഈ വലിയ കുതിപ്പിന് ശേഷം പിന്നീട് താഴോട്ടിറങ്ങിയ സ്വര്‍ണം ചാഞ്ചാട്ടത്തിന്റെ പാതയിലായിരുന്നു. സെപ്റ്റംബറിലും ഒക്‌റ്റോബറിന്റെ തുടക്കത്തിലും സ്വര്‍ണം ഇടിവിലേക്ക് നീങ്ങി. പശ്ചിമേഷ്യയിലെ യുദ്ധത്തിന്റെ പശ്ചാത്തലത്തില്‍, സുരക്ഷിത നിക്ഷേപം എന്ന നിലയില്‍ സ്വര്‍ണത്തിന്റെ ആകര്‍ഷണീയത ഉയര്‍ന്നതാണ് തുടര്‍ന്ന് സ്വര്‍ണ വിലയെ റെക്കൊഡ് ഉയരത്തിലേക്ക് എത്തിച്ചത്.

നവംബര്‍ തുടക്കം മുതല്‍ അനിശ്ചിതത്വമാണ് സ്വര്‍ണ വിലയില്‍ കാണാനാകുന്നത്. ആഗോള തലത്തിലും ഇന്ന് സ്വര്‍ണവില താഴോട്ടിറങ്ങിയിട്ടുണ്ട്. ഔണ്‍സിന് 1982 -1993 ഡോളര്‍ എന്ന നിലയിലാണ് വ്യാപാരം പുരോഗമിക്കുന്നത്.

വെള്ളി വില ഇന്ന് ഉയരുകയാണ് ചെയ്തിട്ടുള്ളത്. ഗ്രാമിന് 20 പൈസ വര്‍ധിച്ച് 78 .20 രൂപയായി. എട്ട് ഗ്രാമിന് 1.60 രൂപ ഉയര്‍ന്ന് 625.60 രൂപയിലെത്തി.