ഇടിവിന് പിന്നാലെ ഉണര്‍വ്, സ്വര്‍ണം പവന് 480 രൂപ വര്‍ധന

കൊച്ചി: രണ്ടു ദിവസത്തെ തുടര്‍ച്ചയായ ഇടിവിന് പിന്നാലെ കേരളത്തില്‍ സ്വര്‍ണവിലയില്‍ വര്‍ധന. ഇന്ന് പവന് 480 രൂപ വര്‍ധിച്ച് 43,840 രൂപയായിട്ടുണ്ട് (22 കാരറ്റ്). ഗ്രാമിന് 60 രൂപ വര്‍ധിച്ച് 5,480 രൂപയാണ് വിപണി വില. കഴിഞ്ഞ ദിവസം പവന് 640 രൂപ കുറഞ്ഞ് 43,360 രൂപയായിരുന്നു. ഈ മാസം 18ന് സ്വര്‍ണവില പവന് 1,200 രൂപ വര്‍ധിച്ച് 44,240 രൂപയായിരുന്നു. ഇത് സംസ്ഥാനത്ത് ഇതുവരെയുള്ളതിലെ റെക്കോര്‍ഡ് നിരക്കാണ്.

ഇന്ന് 24 കാരറ്റ് സ്വര്‍ണം പവന് 520 രൂപ വര്‍ധിച്ച് 47,824 രൂപയായി. ഗ്രാമിന് 65 രൂപ വര്‍ധിച്ച് 5,978 രൂപയായിട്ടുണ്ട്. ഇന്ന് വെള്ളി വിലയിലും വര്‍ധനയുണ്ടായിട്ടുണ്ട്. എട്ട് ഗ്രാമിന് 11.20 രൂപ വര്‍ധിച്ച് 603.20 രൂപയും, ഗ്രാമിന് 1.40 രൂപ വര്‍ധിച്ച് 75.40 രൂപയും ആയിട്ടുണ്ട്.

ആഭ്യന്തര ഓഹരി വിപണി ഇടിവിലാണ് രാവിലെ വ്യാപാരം ആരംഭിച്ചത്. സെന്‍സെക്സ് 341 പോയിന്റ് ഇടിഞ്ഞ് 57,873.59 ലും നിഫ്റ്റി 97.8 പോയിന്റ് താഴ്ന്ന് 17,054.10ലും എത്തി. ആദ്യഘട്ട വ്യാപാരത്തില്‍ യുഎസ് ഡോളറിനെതിരെ രൂപ നേട്ടത്തിലാണ്.

ഡോളറിനെതിരെ രൂപയുടെ മൂല്യം 27 പൈസ ഉയര്‍ന്ന് 82.32ല്‍ എത്തിയിട്ടുണ്ട്. ഇന്റര്‍ബാങ്ക് ഫോറിന്‍ എക്‌സ്‌ചേഞ്ചില്‍ വ്യാപാരം ആരംഭിക്കുമ്പോള്‍ 82.38 എന്ന നിലയിലായിരുന്നു രൂപ. ബ്രെന്റ് ക്രൂഡ് വില ബാരലിന് 76.06 യുഎസ് ഡോളറായിട്ടുണ്ട്.