മാറ്റമില്ലാതെ സ്വര്‍ണ വില , ഇടിവ് തുടര്‍ന്ന് വെള്ളി

സംസ്ഥാനത്തെ സ്വര്‍ണ വിലയില്‍ ഇന്ന് മാറ്റമില്ല. കഴിഞ്ഞ രണ്ട് ദിവസങ്ങളിലും ഇടിവാണ് വിലയില്‍ രേഖപ്പെടുത്തിയിരുന്നത്. ഇന്ന് 22 കാരറ്റ് സ്വര്‍ണം ഗ്രാമിന് 5495 രൂപയിയാണ്. ജൂലൈ 12നു ശേഷമുള്ള ഏറ്റവും താഴ്ന്ന നിലയാണിത് . പവന് 43,960 രൂപയാണ്. കഴിഞ്ഞ രണ്ടാഴ്ചയായി ഉയര്‍ന്നും താഴ്ന്നും നീങ്ങുകയാണ് സ്വര്‍ണ വില. ഇന്ന് 24 കാരറ്റ് സ്വര്‍ണം ഗ്രാമിന്‍റെ വിലയിലും മാറ്റമില്ല, 5995 രൂപ. പവന് 47,960 രൂപയാണ് ഇന്നത്തെ വില. ഔണ്‍സിന് 1932 - 1938 ഡോളര്‍ എന്ന തലത്തിലാണ് ആഗോള തലത്തില്‍ ഇന്ന് സ്വര്‍ണവില പുരോഗമിക്കുന്നത്.

മാര്‍ച്ച് അവസാനം മുതല്‍ മേയ് രണ്ടാം വാരം വരെയുള്ള കാലയളവില്‍ സ്വര്‍ണം വലിയ കുതിപ്പിന്‍റെ പാതയിലായിരുന്നു. എന്നാല്‍ തുടര്‍ന്നങ്ങോട്ട് വിലയില്‍ തുടര്‍ച്ചയായ ചാഞ്ചാട്ടവും ക്രമേണയുള്ള ഇടിവും ഉണ്ടാകുകയായിരുന്നു. ജൂണില്‍ വെറും 7 ദിവസങ്ങളില്‍ മാത്രമാണ് സ്വര്‍ണ വിലയില്‍ വര്‍ധന രേഖപ്പെടുത്തിയത്. ജൂലൈയില്‍ പൊതുവേ ചാഞ്ചാട്ടമാണ് വിലയില്‍ കണ്ടത്. ഇത് ഓഗസ്റ്റിലും തുടരുകയാണ്.

സംസ്ഥാനത്തെ വെള്ളിവിലയില്‍ ഇന്ന് ഇടിവ് പ്രകടമായി. വെള്ളി വില ഗ്രാമിന് 0.30 രൂപയുടെ ഇടിവോടെ 78.20 രൂപയില്‍ എത്തി. 8 ഗ്രാം വെള്ളിക്ക് 625.60 രൂപയാണ് വില, 2.40 രൂപയുടെ ഇടിവ്. ഇന്ന് ഡോളറിനെതിരേ രൂപയുടെ മൂല്യം ഇടിഞ്ഞു. 1 ഡോളറിന് 82.79 രൂപ എന്ന മൂല്യത്തിലാണ് ഇന്ത്യയിലെ വിനിമയം നടക്കുന്നത്.