സ്വര്‍ണം ഗ്രാമിന് 10 രൂപയുടെ വര്‍ധന

സംസ്ഥാനത്തെ സ്വര്‍ണവിലയില്‍ ഇന്ന് നേരിയ വര്‍ധന. 22 കാരറ്റ് സ്വര്‍ണം ഗ്രാമിന് 10 രൂപയുടെ വര്‍ധനയോടെ 5425 രൂപയാണ് ഇന്നത്തെ വില. പവന് 43,400 രൂപയാണ് വില , ഇന്നലത്തെ വിലയില്‍ നിന്ന് 80 രൂപയുടെ വര്‍ധന. കഴിഞ്ഞയാഴ്ചയ്ക്ക് സമാനമായി ഈയാഴ്ചയും സ്വര്‍ണ വിലയില്‍ ചാഞ്ചാട്ടമാണ് പ്രകടമാകുന്നത്. രണ്ടു ദിവസത്തെ വര്‍ധനയ്ക്ക് ശേഷം ജൂലൈ 3 തിങ്കളായ്ച സ്വര്‍ണവില താഴോട്ടു പോയിരുന്നു. അതിനു ശേഷം ചൊവ്വാഴ്ച വീണ്ടും വില ഉയര്‍ന്നു. ഇന്നലെ വില മാറ്റമില്ലാതെ തുടരുകയായിരുന്നു.

ജൂണില്‍ ഭൂരിഭാഗം ദിവസങ്ങളിലും സ്വര്‍ണവിലയില്‍ ഇടിവാണ് പ്രകടമായിട്ടുള്ളത്. വെറും 7 ദിവസങ്ങളില്‍ മാത്രമാണ് വര്‍ധന രേഖപ്പെടുത്തിയത്. അതിനു മുമ്പ് ഏപ്രിലിലും മേയ് തുടക്കത്തിലും സ്വര്‍ണവില ഉയരങ്ങളിലേക്ക് കുതിച്ചിരുന്നു.

24 കാരറ്റ് സ്വര്‍ണത്തിന്‍റെ വിലയിലും ഇന്ന് 10 രൂപയുടെ വര്‍ധനയാണ് ഉണ്ടായിട്ടുള്ളത്. ഇന്ന് ഗ്രാമിന് 5916 രൂപയാണ് വില. 24 കാരറ്റ് പവന്‍ ഇന്ന് 47,328 രൂപയാണ്. ആഗോള തലത്തിലും സ്വര്‍ണവില ചാഞ്ചാട്ടം പ്രകടമാക്കുകയാണ്. ഔണ്‍സിന് ശരാശരി 1920 ഡോളര്‍ എന്ന നിലയിലാണ് വ്യാപാരം പുരോഗമിക്കുന്നത്.

വെള്ളി വിലയിലും ഇന്നും മാറ്റമുണ്ടായിട്ടില്ല. ഇന്ന് ഗ്രാമിന് 75.80 രൂപയാണ് വെള്ളിവില. കഴിഞ്ഞ രണ്ട് ദിവസങ്ങളിലും ഇതേ വില തന്നെയായിരുന്നു. 8 ഗ്രാം വെള്ളിയുടെ വില 606.40 രൂപയാണ്. ഡോളറിനെതിരേ ഇന്ന് രൂപയുടെ മൂല്യം 1 ഡോളറിന് 82.13 രൂപ എന്ന നിലയിലാണ്.