കയറ്റത്തിനു പിന്നാലെ ഇറക്കം; ഇന്ന് സ്വര്‍ണ വിലയില്‍‌ ഇടിവ്

ഇന്നലത്തെ വര്‍ധനയ്ക്ക് ശേഷം സംസ്ഥാനത്തെ സ്വര്‍ണവിലയില്‍ ഇന്ന് ഇടിവ് രേഖപ്പെടുത്തി. ഇന്ന് 22 കാരറ്റ് സ്വര്‍ണം ഗ്രാമിന് 30 രൂപയുടെ ഇടിവോടെ 5510 രൂപയില്‍ എത്തി. പവന് 240 രൂപയുടെ ഇടിവോടെ 44,080 രൂപയില്‍ എത്തി. കഴിഞ്ഞ രണ്ടാഴ്ചയായി ഉയര്‍ന്നും താഴ്ന്നും നീങ്ങുകയാണ് സ്വര്‍ണ വില. ഇന്ന് 24 കാരറ്റ് സ്വര്‍ണം ഗ്രാമിന് ഇന്ന് 33 രൂപയുടെ ഇടിവോടെ 6,011 രൂപയാണ് വില. പവന് 48,088 രൂപയാണ് ഇന്നത്തെ വില, ഇന്നലത്തെ വിലയില്‍ നിന്നും 264 രൂപയുടെ ഇടിവ്. ഔണ്‍സിന് 1943 - 1953 ഡോളര്‍ എന്ന തലത്തിലാണ് ആഗോള തലത്തില്‍ ഇന്ന് സ്വര്‍ണവില പുരോഗമിക്കുന്നത്.

മാര്‍ച്ച് അവസാനം മുതല്‍ മേയ് രണ്ടാം വാരം വരെയുള്ള കാലയളവില്‍ സ്വര്‍ണം വലിയ കുതിപ്പിന്‍റെ പാതയിലായിരുന്നു. എന്നാല്‍ തുടര്‍ന്നങ്ങോട്ട് വിലയില്‍ തുടര്‍ച്ചയായ ചാഞ്ചാട്ടവും ക്രമേണയുള്ള ഇടിവും ഉണ്ടാകുകയായിരുന്നു. ജൂണില്‍ വെറും 7 ദിവസങ്ങളില്‍ മാത്രമാണ് സ്വര്‍ണ വിലയില്‍ വര്‍ധന രേഖപ്പെടുത്തിയത്. ജൂലൈയില്‍ പൊതുവേ ചാഞ്ചാട്ടമാണ് വിലയില്‍ കണ്ടത്. ഇത് ഓഗസ്റ്റിലും തുടരുകയാണ്.

സംസ്ഥാനത്തെ വെള്ളിവിലയിലും ഇന്ന് ഇടിവാണ് പ്രകടമായിട്ടുള്ളത് . വെള്ളി വില ഗ്രാമിന് 70 പൈസയുടെ ഇടിവോടെ 80.30 രൂപയില്‍ എത്തി. 8 ഗ്രാം വെള്ളിക്ക് 642.40 രൂപയാണ് വില, 5.60 രൂപയുടെ ഇടിവ്. ഇന്ന് 1 ഡോളറിന് 82.57 രൂപ എന്ന മൂല്യത്തിലാണ് ഇന്ത്യയിലെ വിനിമയം നടക്കുന്നത്.