ആഗോള പ്രവണതകളിലും വിദേശ ഫണ്ട് നീക്കത്തിലും ശ്രദ്ധ കേന്ദ്രീകരിക്കാൻ സാധ്യത

കൊച്ചി: മൂന്നാം പാദ ഫലങ്ങൾ അവസാനിക്കുകയും നിർണായകമായ ആഭ്യന്തര സംഭവങ്ങൾ ദൃശ്യമാകാതിരിക്കുകയും ചെയ്യുന്ന ഇന്നത്തെ സാഹചര്യത്തിൽ നിക്ഷേപകർ ഈ ആഴ്ച ആഗോള പ്രവണതകളിലും വിദേശ ഫണ്ട് നീക്കത്തിലും ശ്രദ്ധ കേന്ദ്രീകരിക്കുമെന്ന് വിശകലന വിദഗ്ധർ പറഞ്ഞു. കൂടാതെ, ബ്രെന്റ് ക്രൂഡ് ഓയിൽ ചലനവും രൂപയുടെ പ്രവണതയും ഈ ആഴ്ച ശ്രദ്ധാ കേന്ദ്രങ്ങളാവും.

"കഴിഞ്ഞ കുറച്ച് ദിവസങ്ങളായി എഫ്‌ഐഐകൾ പർച്ചേസിംഗിൽ കുറച്ച് താൽപ്പര്യം കാണിച്ചിട്ടുണ്ടെങ്കിലും, കഴിഞ്ഞ ആഴ്ച കുറച്ച് ബ്ലോക്ക് പർച്ചേസുകൾ നടന്നിരുന്നു, അതിനാൽ അവയുടെ ഒഴുക്ക് നിർണായകമാകും," സ്വസ്തിക ഇൻവെസ്റ്റ്മാർട്ട് ലിമിറ്റഡ് റിസർച്ച് മേധാവി സന്തോഷ് മീണ പറഞ്ഞു.

ഫെബ്രുവരി 7 മുതൽ 12 വരെ 3,920 കോടി രൂപയുടെ അറ്റ ഒഴുക്കിൽ നിന്ന് 7,600 കോടി രൂപയുടെ അറ്റ നിക്ഷേപവുമായി എഫ്‌പിഐകൾ കഴിഞ്ഞ ആഴ്‌ച വാങ്ങുന്നവരായി മാറി.

"ആഗോള വിപണികളുടെ പ്രകടനം, പ്രത്യേകിച്ച് യുഎസിന്റെ, സൂചനകൾക്കായി ഏവരും ശ്രദ്ധിച്ചിരിക്കുകയാണ്. കൂടാതെ, ക്രൂഡ്, രൂപയുടെ ചലനം എന്നിവയും അതിനിടയിൽ സൂചനകൾ നൽകുന്നത് തുടരും," റെലിഗേർ ബ്രോക്കിംഗ് ലിമിറ്റഡ്, വിപി (ടെക്നിക്കൽ റിസർച്ച്) അജിത് മിശ്ര പറഞ്ഞു.

കഴിഞ്ഞയാഴ്ച ബിഎസ്ഇ ബെഞ്ച്മാർക്ക് 319.87 പോയിന്റ് അഥവാ 0.52 ശതമാനം ഉയർന്നു. എന്നിരുന്നാലും, പ്രതീക്ഷിച്ചതിലും ഉയർന്ന പണപ്പെരുപ്പത്തിന്റെ പ്രതികൂലമായ സംയോജനവും യുഎസ്-ലെ ശക്തമായ തൊഴിൽ വിപണിയും ആഴ്ചാവസാനം വിപണികളെ താഴേക്ക് വലിച്ചിഴച്ചു, ഇത് കർശനമായ പണ നയത്തെക്കുറിച്ചുള്ള ആശങ്കകൾ ഉയർത്തുന്നു," ജിയോജിത് ഫിനാൻഷ്യൽ റിസർച്ച് മേധാവി വിനോദ് നായർ പറഞ്ഞു.

അടുത്ത സാമ്പത്തിക വർഷം ഇന്ത്യ 6 ശതമാനം വളർച്ച കൈവരിക്കാൻ സാധ്യതയുണ്ടെന്നും കഴിഞ്ഞ എട്ട് വർഷത്തിനിടെ നരേന്ദ്ര മോദി സർക്കാർ നടത്തിയ നിരവധി പരിഷ്‌കാരങ്ങൾ കാരണം രാജ്യത്തിന് ഉയർന്ന വളർച്ചാ നിരക്കിൽ തുടരാനാകുമെന്നും നിതി ആയോഗ് മുൻ വൈസ് ചെയർമാൻ രാജീവ് കുമാർ ഞായറാഴ്ച പറഞ്ഞു. എങ്കിലും വടക്കേ അമേരിക്കൻ, യൂറോപ്യൻ സമ്പദ്‌വ്യവസ്ഥകളിലെ മാന്ദ്യത്തിൽ നിന്ന് മുന്നോട്ട് പോകുന്നത് അത്ര എളുപ്പമല്ല, കുമാർ പറഞ്ഞു.

മോണിംഗ്സ്റ്റാർ ഇന്ത്യ സമാഹരിച്ച ഡാറ്റ അനുസരിച്ച്, കഴിഞ്ഞ വർഷം മൊത്തം 228 പുതിയ ഫണ്ട് സ്കീമുകൾ അവതരിപ്പിച്ചു, ഇത് 2021 ൽ സമാരംഭിച്ച 140 സ്കീമുകളേക്കാൾ വളരെ കൂടുതലാണ്.എങ്കിലും ഇവയിലൂടെയുള്ള മ്യൂച്വൽ ഫണ്ടുകളുടെ ശേഖരണം 2022-ൽ കുറവായിരുന്നു; ഈ വര്ഷം പുതിയ സ്‌കീമുകളിലൂടെ 62,000 കോടി രൂപ സമാഹരിച്ചപ്പോൾ 2021 -ൽ 99,704 കോടി രൂപയായിരുന്നു സമാഹരണം.

സിംഗപ്പൂർ എസ് ജി എക്സ് നിഫ്റ്റി സൂചിക ഇന്ന് രാവിലെ 7.30 ന് 28.00 പോയിന്റ് ഉയർന്നാണ് വ്യാപാരം നടത്തുന്നത്. ഇത് ആഭ്യന്തര വിപണിയിൽ ഒരു ഗാപ് അപ് തുടക്കത്തിന് പ്രേരകമാവാനിടയുണ്ട്.

വെള്ളിയാഴ്ച, 30-ഷെയർ ബിഎസ്ഇ സെൻസെക്സ് 316.94 പോയിന്റ് താഴ്ന്ന് 61,002.57 ലും നിഫ്റ്റി 91.65 പോയിന്റ് ഇടിഞ്ഞു 17944.20 ലും എത്തി. ബാങ്ക് നിഫ്റ്റിയാകട്ടെ 499.60 പോയിന്റ് താഴ്ന്ന് 41,131.75-ലാണ് അവസാനിച്ചത്.

എഫ് ഐഐ/ഡിഐഐ

എൻഎസ്ഇ കണക്കുകൾ പ്രകാരം വ്യാഴാഴ്ച (ഫെബ്രുവരി 16) ആഭ്യന്തര നിക്ഷേപ സ്ഥാപനങ്ങൾ -85.29 കോടി രൂപക്കും വിദേശ നിക്ഷേപ സ്ഥാപനങ്ങൾ -624.61 കോടി രൂപക്കും ഓഹരികൾ അധികം വിറ്റു..

കേരള കമ്പനികൾ

വെള്ളിയാഴ്ച കേരളം ആസ്ഥാനമായുള്ള കമ്പനികളിൽ ആസ്റ്റർ ഡി എം, ധനലക്ഷ്മി ബാങ്ക്, കല്യാൺ ജൂവല്ലേഴ്‌സ്, കേരളം കെമിക്കൽസ്, മുത്തൂറ്റ് ക്യാപിറ്റൽ, വി ഗാർഡ്, വണ്ടർ ല എന്നിവ ഒഴിച്ച് ബാക്കിയെല്ലാം ചുവപ്പിലാണവസാനിച്ചത്.

റിയാലിറ്റി കമ്പനികളിൽ പി എൻ സി ഇൻഫ്രയും പുറവങ്കരയും നഷ്ടത്തിലായപ്പോൾ ശോഭ ഉയർന്നു.

ആഗോള വിപണി

ഏഷ്യൻ വിപണികൾ ഇന്ന് പൊതുവെ മിശ്രിതമാണ്. തായ്‌വാൻ (26.60), ദക്ഷിണ കൊറിയ കോസ്‌പി (5.42), ജപ്പാൻ നിക്കേ (15.52), ജക്കാർത്ത കോമ്പോസിറ്റ് (0.05), ചൈന ഷാങ്ങ്ഹായ് (5.55 എന്നിവ ഉയർച്ചയിലാണ്. ഹോങ്കോംഗ് ഹാങ്ങ് സെങ് (-133.28) രാവിലെ നേരിയ താഴ്ചയിലും.

വെള്ളിയാഴ്ച യുഎസ് സൂചികകളിൽ ഡൗ ജോൺസ്‌ 129.84 പോയിന്റ് ഉയർന്നപ്പോൾ എസ് ആൻഡ് പി -11.32 പോയിന്റും നസ്‌ഡേക് -68.56 പോയിന്റും താഴ്ചയിൽ അവസാനിച്ചു.

എന്നാൽ, യൂറോപ്പിൽ സൂചികകൾഎല്ലാം താഴ്ച്ചയിലാണ് അവസാനിച്ചത്; പാരീസ് യുറോനെക്സ്റ്റും (-18.44), ലണ്ടൻ ഫുട്‍സീയും (-8.17), ഫ്രാങ്ക്ഫർട് ഡി എ എക്‌സും (-8.17) ചുവപ്പിലേക്കു വീണു.

ശ്രദ്ധിക്കേണ്ട ഓഹരികൾ

രാജ്യത്തെ ഏറ്റവും വലിയ ഇരുചക്രവാഹന നിർമ്മാതാക്കളായ ഹീറോ മോട്ടോകോർപ്പ് (ഓഹരി വില 2535.55 രൂപ) അടുത്ത 18-24 മാസത്തിനുള്ളിൽ ഇലക്ട്രിക് ടൂവീലർ ശ്രേണി വിപുലീകരിക്കാൻ പദ്ധതിയിടുന്നതായി കമ്പനിയുടെ ഒരു മുതിർന്ന ഉദ്യോഗസ്ഥൻ പറഞ്ഞു.

2022-23ലെ മൂന്നാം പാദത്തിൽ വായ്പാ വളർച്ചാ ശതമാനത്തിന്റെ അടിസ്ഥാനത്തിൽ ബാങ്ക് ഓഫ് മഹാരാഷ്ട്ര (ഓഹരി വില 26.90 രൂപ) സർക്കാർ ഉടമസ്ഥതയിലുള്ള വായ്പാ ദാതാക്കളിൽ ഏറ്റവും മികച്ച പ്രകടനം കാഴ്ചവച്ചു. വാർഷികാടിസ്ഥാനത്തിൽ വരുമാനത്തിൽ അത് 21.67 ശതമാനം വർദ്ധനവ് രേഖപ്പെടുത്തി.

ഇന്ത്യയിലെ ഏറ്റവും വലിയ വാതക സ്ഥാപനമായ ഗെയിൽ (ഓഹരി വില 96.00 രൂപ) തങ്ങളുടെ പെട്രോകെമിക്കൽ പ്ലാന്റുകളിൽ പ്രകൃതിവാതകത്തിനും നാഫ്തയ്ക്കും പകരമായി യുഎസിൽ നിന്ന് ഈഥെയ്ൻ ഇറക്കുമതി ചെയ്യാൻ പദ്ധതിയിടുന്നു.

യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷൻ പ്രകാരം ബയോടെക്നോളജി പ്രമുഖരായ ബയോകോൺ (ഓഹരി വില 232.50 രൂപ) യുഎസ് വിപണിയിൽ നിന്ന് 3,665 കുപ്പി ആന്റിഫംഗൽ മരുന്നുകൾ തിരിച്ചുവിളിക്കുന്നു.

ആരോഗ്യകരമായ ഭക്ഷണ ഓപ്ഷനുകൾ വാഗ്ദാനം ചെയ്യുന്ന മാസ്റ്റർ ബ്രാൻഡായ സഫോളയ്ക്ക് ഇപ്പോൾ 2,000 കോടി രൂപയിലധികം മൂല്യമുണ്ടെന്ന് മാരികോ (ഓഹരി വില 489.50 രൂപ) എംഡിയും സിഇഒയുമായ സൗഗത ഗുപ്ത പറഞ്ഞു.

യുഎസ് ഡോളർ = 82.84 രൂപ (+14 പൈസ).

ബ്രെന്റ് ക്രൂഡോയില്‍ ഫ്യൂച്ചേഴ്‌സ് (ബാരലിന്) 83.65 ഡോളർ (-1.75%)

സ്വർണം 22 കാരറ്റ്, 1 ഗ്രാം (കൊച്ചി) = 5,220 രൂപ (0 രൂപ)

ബിറ്റ് കോയിൻ = 20,49,779 രൂപ.

ആറ് കറൻസികളുടെ ഗ്രുപ്പിനെതിരെ ഗ്രീൻബാക്കിന്റെ ശക്തി അളക്കുന്ന ഡോളർ സൂചിക 0.59 ശതമാനം ഉയർന്ന് 104.47 ന് വ്യാപാരം നടക്കുന്നു.