ആഗോള ഡാറ്റകൾ അനുകൂലമാവുമ്പോഴും ജാഗ്രത പുലർത്തണമെന്ന് വിദഗ്‌ധർ

കൊച്ചി: ചില ഭക്ഷണ സാധനങ്ങളുടെ വിലയിൽ വന്ന കുറവ് മൂലം കാർഷിക, ഗ്രാമീണ തൊഴിലാളികളുടെയിടയിലെ ചില്ലറ പണപ്പെരുപ്പം നവംബറിൽ യഥാക്രമം 6.87 ശതമാനമായും 6.99 ശതമാനമായും ഉയർന്നു.

നാലാം പാദത്തിൽ സേവന മേഖലയിലെ നിയമനം 77 ശതമാനമായതായി ലേബർ ബ്യൂറോയുടെ പുതിയ റിപ്പോർട്ട് പറയുന്നു. മുൻ പാദത്തിൽ ഇത് 73 ശതമാനമായിരുന്നു. 2023 മാർച്ചിൽ അവസാനിക്കുന്ന സാമ്പത്തിക വർഷത്തിൽ ഇന്ത്യയുടെ സമ്പദ്‌വ്യവസ്ഥ 7 ശതമാനമായി വളരാൻ സാധ്യതയുണ്ടെന്ന് ഫിച്ച് റേറ്റിംഗ്സ് പറയുന്നു. ഈ വർഷം ജൂണിൽ രാജ്യത്തിന് നൽകിയ "സ്ഥിരമായ കാഴ്ചപ്പാട്" നിലനിർത്തിക്കൊണ്ടുതന്നെ ഇന്ത്യയുടെ ദീർഘകാല വിദേശ-കറൻസി ഇഷ്യൂവർ ഡിഫോൾട്ട് റേറ്റിംഗ് (IDR) 'ബിബിബി-' ൽ സ്ഥിരീകരിച്ചതായി ഏജൻസി അറിയിച്ചു. ഇങ്ങനെ ഇന്ത്യയുടെ സമ്പദ് വ്യവസ്ഥ ലോകമെങ്ങും ആസന്നമായ മാന്ദ്യത്തിൽ നിന്ന് വേറിട്ട് നിൽക്കുന്നതായുള്ള വാർത്തകളാണ് പുറത്തു വരുന്നത്.

എന്നാൽ, നേരിട്ടുള്ള വിദേശ നിക്ഷേപം (FDI) 2022 ഏപ്രിൽ-ഒക്ടോബർ കാലയളവിൽ 4800 കോടി രൂപയിൽ നിന്ന് 4400 കോടി രൂപയായി മിതമായതായി ഇന്നലെ ആർബിഐ ഇറക്കിയ പ്രതിമാസ ബുള്ളറ്റിനിൽ പറയുന്നു.എഫ് ഡി ഐ വരവിൽ ഭൂരിഭാഗവും മാനുഫാക്ചറിംഗ്, റീട്ടെയിൽ, മൊത്തവ്യാപാരം, സാമ്പത്തിക സേവനങ്ങൾ, കമ്പ്യൂട്ടർ സേവനങ്ങൾ, കമ്മ്യൂണിക്കേഷൻ സേവനങ്ങൾ എന്നിവയിലേക്കാണ് നയിച്ചതെന്ന് ഡാറ്റ കാണിക്കുന്നു.

കൂടാതെ, ഓഹരികളിലുള്ള ഗാർഹിക നിക്ഷേപം അതിവേഗം കുറയുന്നതും, വിദേശ നിക്ഷേപം ശോഷിക്കുന്നതും, ബാങ്ക് ഡെപ്പോസിറ്റ് നിരക്കുകൾ വർധിക്കുന്നതും നിഫ്റ്റിയെ 4 ശതമാനം ഇടിവിലേക്ക് നയിച്ച് 18,000 പോയിന്റിലേക്ക് കൊണ്ടുപോകുമെന്ന് സ്വിസ് ബ്രോക്കറേജ് യുബിഎസ് സെക്യൂരിറ്റീസ് പറയുന്നൂ. അടുത്തയാഴ്ച വർഷം അവസാനിക്കുമ്പോൾ വിപണിയെ കാത്തിരിക്കുന്ന ഒരു പ്രധാന കണക്ക് നാളെ പുറത്തിറങ്ങുന്ന യുഎസ് ജിഡിപി ഡാറ്റയാണ്. ഇത് യുഎസ് സമ്പദ്‌വ്യവസ്ഥയുടെ ഒരു ചിത്രം നൽകും.

ഇന്നലെ സെന്‍സെക്‌സ് 103.90 പോയിന്റ് താഴ്ന്നു 61,702.29ലും നിഫ്റ്റി 35.15 പോയിന്റ് താഴ്ന്നു 18,385.30 ലുമാണ് ക്ലോസ് ചെയ്തത്. ബാങ്ക് നിഫ്റ്റി 54.25 പോയിന്റ് താഴ്ന്ന് 43, 359.50 ൽ അവസാനിച്ചു.

രാവിലെ 7.45-ന് സിംഗപ്പൂർ എസ് ജി എക്സ് നിഫ്റ്റി 71.50 പോയിന്റ് ഉയർന്ന് വ്യാപാരം നടത്തുന്നത് ആഭ്യന്തര വിപണിയിൽ ഒരു ഗാപ് അപ് തുടക്കത്തിനുള്ള സാധ്യത തുറക്കുന്നു.

കേരള ലിസ്റ്റഡ് കമ്പനികൾ

കല്യാൺ ജൂവല്ലേഴ്‌സും കേരള കെമിക്കൽസും ചൊവ്വാഴ്ച 52 ആഴ്ച ഉയരത്തിൽ യഥാക്രമം 131.80 ലും 784.90-ലും എത്തി.

കേരളം ആസ്ഥാനമായുള്ള മറ്റ്‌ കമ്പനികളിൽ ആസ്റ്റർ ഡി എമ്മും, കൊച്ചിൻ ഷിപ് യാഡും, ഫാക്റ്റും, ഹാരിസൺ മലയാളവും, എച് എം ടീയും, കിറ്റെക്‌സും, വി ഗാർഡും, ലാഭത്തിൽ അവസാനിച്ചു; എന്നാൽ, സിഎസ്‌ബി ബാങ്കും, ധനലക്ഷ്മി ബാങ്കും, ഫെഡറൽ ബാങ്കും, ജിയിജിത്തും, ജ്യോതി ലാബും, കിംസും, മണപ്പുറവും, മുത്തൂറ്റ് ക്യാപിറ്റലും, മുത്തൂറ്റ് ഫൈനാൻസും, സൗത്ത് ഇന്ത്യൻ ബാങ്കും, വണ്ടർ ലയും ചുവപ്പിലേക്ക് വീണിട്ടുണ്ട്. റീയൽട്ടി കമ്പനികളായ ശോഭയും പി എൻ സി ഇൻഫ്രയും പുറവങ്കരയും ഇന്ന് നഷ്ടത്തിൽ അവസാനിച്ചു.

എഫ് ഐഐ/ഡിഐഐ

എൻഎസ്ഇയിൽ ലഭ്യമായ താൽക്കാലിക കണക്കുകൾ പ്രകാരം ഇന്നലെ (ഡിസംബർ 20) ആഭ്യന്തര നിക്ഷേപ സ്ഥാപനങ്ങൾ 494.74 കോടി രൂപയ്ക്കും വിദേശ നിക്ഷേപ സ്ഥാപനങ്ങൾ 455.94 കോടി രൂപയ്ക്കും ഓഹരികൾ അധികം വാങ്ങി.

വിദഗ്ധാഭിപ്രായം

ഡോ. വി കെ വിജയകുമാർ, ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ്, ജിയോജിത് ഫിനാൻഷ്യൽ സർവീസസ്: "ആഗോള വിപണിയെ ഇപ്പോൾ ഉറ്റുനോക്കുന്ന ഒരു പ്രധാന പ്രവണത 2023-ൽ യുഎസ് മാന്ദ്യത്തിനുള്ള സാധ്യതയാണ്. യുഎസ് സമ്പദ്‌വ്യവസ്ഥ മാന്ദ്യം നേരിടേണ്ടി വരുമെന്ന് പൊതുവെ ധാരണയുണ്ടെങ്കിലും അത് എത്രത്തോളം നിയന്ത്രിക്കാൻ അവർക്ക് കഴിയും എന്നതിനെക്കുറിച്ച് വ്യത്യസ്തമായ അഭിപ്രായങ്ങൾ ഉണ്ട്. സാമ്പത്തിക ഡാറ്റ സൂചിപ്പിക്കുന്നത് ഫെഡറൽ റിസർവ് നിരക്ക് വർദ്ധനവ് മന്ദഗതിയിലാക്കുമെന്നാണ്. ഈ തോന്നൽ സ്ഥിരീകരിച്ചത് അത് ഓഹരി വിപണികളിൽ ഒരു പുനരുജ്ജീവനത്തിന് ഇടയാക്കും. സാമ്പത്തിക, വിപണി സൂചകങ്ങൾ സൂചിപ്പിക്കുന്നത് ഇന്ത്യയുടെ മികച്ച പ്രകടനം 2023 ലും തുടരാനാകുമെന്നാണ്. മൂല്യനിർണ്ണയം ഉയർന്നതിനാൽ 2023-ൽ ഒരു 'മൾട്ടി-അസറ്റ് അലോക്കേഷൻ' തന്ത്രം കൈക്കൊള്ളുന്നത് ഉചിതമായിരിക്കും. ഓഹരി കൂടാതെ, സ്ഥിര വരുമാന ആസ്തികളും സ്വർണ്ണവും 2023-ൽ പോർട്ട്ഫോളിയോയുടെ അവിഭാജ്യ ഘടകമായിരിക്കണം."

ലോക വിപണി

ഇന്ന് ഏഷ്യൻ വിപണികളിൽ ഹോങ്കോങ് ഹാങ്‌സെങ് (84.18), ചൈന ഷാങ്ഹായ് (4.15), സൗത്ത് കൊറിയൻ കോസ്‌പി (5.28), തായ്‌വാൻ (93.11) എന്നിവയെല്ലാം ഉയർന്നാണ്. തുടക്കം. ജപ്പാൻ നിക്കേ (-20.63), ജക്കാർത്ത കോമ്പസിറ്റ് (-11.38) എന്നിവ ചുവപ്പിലാണ്.

ചൊവ്വാഴ്ച അമേരിക്കൻ വിപണിയിൽ ഡൗ ജോൺസ്‌ ഇൻഡസ്ട്രിയൽ ആവറേജ് (92.20), എസ് ആൻഡ് പി 500 (3.96), നസ്‌ഡേക് കോമ്പസിറ്റ് (1.08) എന്നിവയെല്ലാം നേരിയ തോതിൽ ഉയർന്നു.

എന്നാൽ, യൂറോപ്പിൽ ഫ്രാങ്ക്ഫർട് ഡി എ എക്സ് (-58.21), പാരീസ് യുറോനെക്സ്റ്റ് (-22.86), എന്നിവ താഴ്ന്നപ്പോൾ ലണ്ടൻ ഫുട്‍സീ (9.31) നേട്ടത്തിൽ അവസാനിച്ചു.

ശ്രദ്ധിക്കേണ്ട ഓഹരികൾ

ലോകാരോഗ്യ സംഘടനയുടെ മരുന്ന് നിർമാണ മാനദണ്ഡങ്ങൾ പാലിക്കുന്നതിൽ പരാജയപ്പെട്ടുവെന്ന് ചൂണ്ടിക്കാട്ടി നേപ്പാളിലെ ഡ്രഗ് റെഗുലേറ്ററി അതോറിറ്റി 16 ഇന്ത്യൻ ഫാർമസ്യൂട്ടിക്കൽ കമ്പനികളെ കരിമ്പട്ടികയിൽ പെടുത്തി. പതഞ്ജലി ഉൽപ്പന്നങ്ങൾ നിർമ്മിക്കുന്ന ദിവ്യ ഫാർമസി, മെർക്കുറി ലബോറട്ടറീസ് (ഓഹരി വില: 722 രൂപ), ഐപിസിഎ ലബോറട്ടറീസ് (ഓഹരി വില: 872.85 രൂപ), കാഡില ഹെൽത്ത്‌കെയർ (ഓഹരി വില: 411.35 രൂപ) എന്നിവ ഉൾപ്പെടുന്നു.

മൈൻഡ്‌സ്‌പേസ് ബിസിനസ് പാർക്ക്‌സ് (ഓഹരി വില: 338.82 രൂപ), പ്രതിവർഷം 7.2 പലിശ നിരക്കിൽ മൂന്ന് മാസത്തെ കാലാവധിക്ക് 100 കോടി രൂപയുടെ വാണിജ്യ പേപ്പറുകൾ വിതരണം പൂർത്തിയാക്കിയതായി ഒരു റെഗുലേറ്ററി ഫയലിംഗിൽ അറിയിച്ചു.

എൻസിഎൽടി-യുടെ നേതൃത്വത്തിലുള്ള റെസല്യൂഷൻ പ്രക്രിയയിൽ മിത്തൽ കോർപ്പറേഷൻ ലിമിറ്റഡ് ഏറ്റെടുത്തതിലൂടെ സ്റ്റെയിൻലെസ് സ്റ്റീൽ ബിസിനസിലേക്ക് ചുവടുവെച്ചതായി ശ്യാം മെറ്റാലിക്‌സ് ആൻഡ് എനർജി ലിമിറ്റഡ് (ഓഹരി വില: 291.55 രൂപ) ചൊവ്വാഴ്ച അറിയിച്ചു. അടുത്ത 4-5 വർഷത്തിനുള്ളിൽ 7,500 കോടി രൂപ നിക്ഷേപിക്കാനാണ് ഉദ്ദേശം.

യു‌പി‌എല്ലിന്റെ (ഓഹരി വില: 754.85 രൂപ) ഒരു വിഭാഗമായ സസ്റ്റൈനബിൾ അഗ്രി സൊല്യൂഷൻസ് ലിമിറ്റഡിന്റെ (യു‌പി‌എൽ എസ്‌എ‌എസ്) ന്യൂനപക്ഷ ഓഹരി ഏറ്റെടുക്കുന്നതിന് വുഡ്‌ഹാൾ ഹോൾഡിംഗ്‌സ് ലിമിറ്റഡിന് കോമ്പറ്റീഷൻ കമ്മീഷൻ ഓഫ് ഇന്ത്യ അംഗീകാരം നൽകി. വുഡ്‌ഹാൾ 1,580 കോടി രൂപ നിക്ഷേപിക്കുമെന്നാണ് പ്രതീക്ഷിക്കുന്നത്.

ഭാരതി എയർടെൽ (ഓഹരി വില: 828.95 രൂപ) അതിന്റെ സ്റ്റാർട്ടപ്പ് ആക്‌സിലറേറ്റർ പ്രോഗ്രാമിന് കീഴിൽ ബെംഗളൂരു ആസ്ഥാനമായുള്ള ലെംനിസ്‌കിന്റെ 8 ശതമാനത്തോളം തന്ത്രപ്രധാനമായ ഓഹരികൾ ഏറ്റെടുത്തതായി കമ്പനി ചൊവ്വാഴ്ച അറിയിച്ചു.

പശ്ചിമാഞ്ചൽ വിദ്യുത് വിതരൺ നിഗം ലിമിറ്റഡിൽ നിന്ന് ഏകദേശം 750 കോടി രൂപയുടെ ഓർഡറുകൾ ലഭിച്ചതായി സലാസർ ടെക്‌നോ എഞ്ചിനീയറിംഗ് ലിമിറ്റഡ് (ഓഹരി വില: 56.35 രൂപ) ചൊവ്വാഴ്ച അറിയിച്ചു.

ലോജിസ്റ്റിക്‌സ് സ്ഥാപനമായ ഡൽഹിവെരി (ഓഹരി വില: 348.15 രൂപ) ചൊവ്വാഴ്ച പൂനെ ആസ്ഥാനമായുള്ള സപ്ലൈ ചെയിൻ സൊല്യൂഷൻ പ്രൊവൈഡറായ അൽഗോരിഥം ടെക്കിനെ ഏറ്റെടുക്കുമെന്ന് പ്രഖ്യാപിച്ചു.

സ്വർണം 22 കാരറ്റ്, 1 ഗ്രാം (കൊച്ചി) = 4,960 രൂപ (0 രൂപ)

യുഎസ് ഡോളർ = 82.70 രൂപ (-8 പൈസ).

ബ്രെന്റ് ക്രൂഡോയില്‍ (ബാരലിന്) = 79.91 ഡോളർ (+1.10%)

ബിറ്റ് കോയിൻ = 14,46,011 രൂപ.

ആറ് കറൻസികളുടെ ഗ്രുപ്പിനെതിരെ ഗ്രീൻബാക്കിന്റെ ശക്തി അളക്കുന്ന ഡോളർ സൂചിക +0.07% ശതമാനം ഉയർന്ന് 103.66 ആയി.

ഐപിഒ

കെ ഫിൻ ടെക്‌നോളജീസിന്റെ പ്രാരംഭ പബ്ലിക് ഓഫർ രണ്ടാം ദിനത്തിൽ 70 ശതമാനം സബ്‌സ്‌ക്രൈബുചെയ്‌തു. എൻഎസ്ഇ ഡാറ്റ പ്രകാരം ഓഫറിലെ 2,37,75,215 ഓഹരികൾക്കെതിരെ 1,66,01,920 ഓഹരികൾക്കാണ് ബിഡ് ലഭിച്ചത്. ഐ പി ഓ ഇന്ന് (ഡിസംബർ 21) അവസാനിക്കും. ഒരു ഷെയറിന് 347-366 രൂപ പ്രൈസ് ബാൻഡ് ആണ് നിശ്ചയിച്ചിട്ടുള്ളത്.

ഇലക്‌ട്രോണിക്‌സ് മാനുഫാക്‌ചറിംഗ് സേവന കമ്പനിയായ എലിൻ ഇലക്ട്രോണിക്‌സിന്റെ പ്രാരംഭ ഓഹരി വിൽപ്പനയ്ക്ക് ചൊവ്വാഴ്ച ആദ്യ ദിനത്തിൽ 37 ശതമാനം സബ്‌സ്‌ക്രിപ്‌ഷൻ ലഭിച്ചു. എൻഎസ്ഇ ഡാറ്റ പ്രകാരം, ഓഫറിലെ 1,42,09,386 ഓഹരികളിൽ നിന്ന് 52,35,360 ഓഹരികൾക്കാണ് ബിഡ് ലഭിച്ചത്. ഐപിഒയ്ക്ക് 175 കോടി രൂപ വരെയുള്ള പുതിയ ഇഷ്യൂവും 300 കോടി രൂപ വരെ വിൽപ്പനയ്ക്കുള്ള ഓഫറും ഉണ്ട്. ഒരു ഓഹരിക്ക് 234-247 രൂപയാണ് വില.