കുതിച്ചുയര്‍ന്ന് വിപണി മൂല്യം; 9 ടോപ് 10 കമ്പനികള്‍ കൂട്ടിച്ചേര്‍ത്ത് 2.26 ലക്ഷം കോടി

ഇക്വിറ്റികളിലെ മൊത്തത്തിലുള്ള ബുള്ളിഷ് പ്രവണതയ്ക്കിടയിൽ, വിപണി മൂല്യത്തില്‍ മുന്നില്‍ നില്‍ക്കുന്ന 10 കമ്പനികളില്‍ ഒമ്പതിന്റെയും സംയുക്ത വിപണി മൂല്യം പോയ വാരത്തില്‍ 2.26 ലക്ഷം കോടി രൂപ ഉയർന്നു. ടാറ്റ കൺസൾട്ടൻസി സർവീസസും (ടിസിഎസ്) ഇൻഫോസിസും ഏറ്റവും വലിയ നേട്ടമുണ്ടാക്കി.

കഴിഞ്ഞയാഴ്ച ബിഎസ്ഇ ബെഞ്ച്മാർക്ക് 1,658.15 പോയിന്റ് അഥവാ 2.37 ശതമാനം ഉയർച്ചയാണ് നേടിയത്. വെള്ളിയാഴ്ച സെൻസെക്‌സ് 969.55 പോയിന്റ് അഥവാ 1.37 ശതമാനം ഉയര്‍ന്ന് റെക്കോർഡ് ക്ലോസായ 71,483.75 ൽ എത്തി. പകൽ സമയത്ത്, ഇത് 1,091.56 പോയിന്റ് അല്ലെങ്കിൽ 1.54 ശതമാനം ഉയർന്ന് 71,605.76 എന്ന എക്കാലത്തെയും ഉയര്‍ന്ന ഇൻട്രാ-ഡേ നിലയില്‍ എത്തിയിരുന്നു.

ടോപ് 10 റിലയൻസ് ഇൻഡസ്ട്രീസ്, ടിസിഎസ്, ഐസിഐസിഐ ബാങ്ക്, ഇൻഫോസിസ് എന്നിവയുൾപ്പെടെ ഒമ്പത് കമ്പനികളുടെ സംയുക്ത വിപണി മൂല്യം 2,26,391.77 കോടി രൂപ ഉയർന്നപ്പോൾ ഭാരതി എയർടെൽ ഇടിവ് നേരിട്ടു.

ടിസിഎസിന്റെ വിപണി മൂല്യം 85,493.74 കോടി രൂപ ഉയർന്ന് 14,12,412.13 കോടി രൂപയിലെത്തി. ഇൻഫോസിസ് 36,793.61 കോടി രൂപ കൂട്ടിച്ചേര്‍ത്തതോടെ എംക്യാപ് 6,55,457.54 കോടി രൂപയായി. സ്റ്റേറ്റ് ബാങ്ക് ഓഫ് ഇന്ത്യയുടെ വിപണി മൂല്യം 30,700.67 കോടി രൂപ ഉയർന്ന് 5,78,671.84 കോടി രൂപയായും റിലയൻസ് ഇൻഡസ്ട്രീസിന്‍റേത് 26,386.16 കോടി രൂപ ഉയർന്ന് 16,88,173.26 കോടി രൂപയായും മാറി,

ഐസിഐസിഐ ബാങ്കിന്റെ വിപണി മൂലധനം 18,493.9 കോടി രൂപ ഉയർന്ന് 7,27,330.82 കോടി രൂപയിലും ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യയുടെ (എൽഐസി) എംക്യാപ്14,294.5 കോടി രൂപ 5,03,722.82 കോടി രൂപയിലും എത്തി. ഐടിസിയുടെ മൂല്യം 11,412.78 കോടി രൂപ ഉയർന്ന് 5,71,636.39 കോടി രൂപയായി. എച്ച്ഡിഎഫ്‌സി ബാങ്കിന്റെ മൂല്യം 2,428.72 കോടി രൂപ ഉയർന്ന് 12,57,093.46 കോടി രൂപയില്‍ എത്തി.

ഹിന്ദുസ്ഥാൻ യുണിലിവർ ലിമിറ്റഡ് 387.69 കോടി രൂപ കൂട്ടിച്ചേര്‍ത്തതോടെ മൂല്യം 5,92,801.88 കോടി രൂപയായി. എന്നിരുന്നാലും, ഭാരതി എയർടെല്ലിന്റെ മൂല്യം 3,654.15 കോടി രൂപ കുറഞ്ഞ് 5,58,242.75 കോടി രൂപയായി.

ഏറ്റവും മൂല്യമുള്ള സ്ഥാപനമെന്ന പദവി റിലയൻസ് ഇൻഡസ്ട്രീസ് നിലനിർത്തി. ടിസിഎസ്, എച്ച്ഡിഎഫ്‍സി ബാങ്ക്, ഐസിഐസിഐ ബാങ്ക്, ഇൻഫോസിസ്, ഹിന്ദുസ്ഥാൻ യുണിലിവർ, സ്റ്റേറ്റ് ബാങ്ക് ഓഫ് ഇന്ത്യ, ഐടിസി, ഭാരതി എയർടെൽ, എൽഐസി എന്നിവയാണ് യഥാക്രമം പിന്നീടുള്ള സ്ഥാനങ്ങളില്‍ വരുന്നത്.