ഒരുലക്ഷം ഡോളറും കടന്ന് ബിറ്റ്‌കോയിന്‍

അവസാനം ബിറ്റ്‌കോയിന്‍ ആദ്യമായി 100,000 ഡോളറിന് മുകളിലേക്ക് ഉയര്‍ന്നു. അമേരിക്കയുടെ പ്രസിഡന്റായി ഡൊണാള്‍ഡ് ട്രംപിനെ തിരഞ്ഞെടുത്തതിനുശേഷം തുടര്‍ച്ചയായി ബിറ്റ്‌കോയിന്‍ അതിന്റെ മൂല്യ വര്‍ധനവ് നടത്തിക്കൊണ്ടിരിക്കുകയാണ്.

അവസാന റിപ്പോര്‍ട്ടനുസരിച്ച് ബിറ്റ്‌കോയിന്‍ മൂല്യം 102,388.46 ഡോളറിലെത്തി. വിപണി മൂലധനം 6.84 ശതമാനം ഉയര്‍ന്ന് 2.03 ട്രില്യണ്‍ ഡോളറിലെത്തുകയും ചെയ്തു. കോയിന്‍ മാര്‍ക്കറ്റിലെ ഡാറ്റ പ്രകാരം ഇന്ന് രാവിലെ ടോക്കണ്‍ 103,047.71 ഡോളറിലെത്തി. 2022-ല്‍ ബിറ്റ്‌കോയിന്‍ മൂല്യം 16,000 ഡോളര്‍ മാത്രമായിരുന്നു.

ഈ വര്‍ഷം ബിറ്റ്കോയിന്റെ മൂല്യം ഇരട്ടിയിലധികമാണ് വര്‍ധിച്ചത്. ട്രംപിന്റെ വന്‍ വിജയത്തിന് ശേഷമുള്ള നാലാഴ്ചയ്ക്കുള്ളില്‍ ബിറ്റ്‌കോയിന്റെ മൂല്യം 45 ശതമാനം ഉയര്‍ന്നു. ട്രംപിനെക്കൂടാതെ മറ്റ് ക്രിപ്റ്റോ അനുകൂല നേതാക്കളും കോണ്‍ഗ്രസിലേക്ക് തിരഞ്ഞെടുക്കപ്പെട്ടിട്ടുണ്ട്.

'ഞങ്ങള്‍ ഒരു മാതൃകാപരമായ മാറ്റത്തിന് സാക്ഷ്യം വഹിക്കുന്നു. ബിറ്റ്‌കോയിനും മുഴുവന്‍ ഡിജിറ്റല്‍ അസറ്റ് ഇക്കോസിസ്റ്റവും സാമ്പത്തിക മുഖ്യധാരയിലേക്ക് പ്രവേശിക്കുന്നതിന്റെ വക്കിലാണ്,' യുഎസ് ക്രിപ്‌റ്റോ സ്ഥാപനമായ ഗാലക്‌സി ഡിജിറ്റലിന്റെ സ്ഥാപകനും സിഇഒയുമായ മൈക്ക് നോവോഗ്രാറ്റ്‌സ് പറഞ്ഞു.

സൃഷ്ടിച്ച് 16 വര്‍ഷത്തിലേറെയായി, നിരാകരണവും വിവാദങ്ങളുടെ ചരിത്രവും ഉണ്ടായിരുന്നിട്ടും, ബിറ്റ്‌കോയിന്‍ ഇന്ന് മുഖ്യധാരാ സ്വീകാര്യതയുടെ കൊടുമുടിയില്‍ എത്തിയിരിക്കുന്നു.

റിപ്പിള്‍, ക്രാക്കന്‍, സര്‍ക്കിള്‍ എന്നിവയുള്‍പ്പെടെയുള്ള ഒരു കൂട്ടം ക്രിപ്റ്റോ കമ്പനികള്‍ ട്രംപിന്റെ വാഗ്ദാനം ചെയ്ത ക്രിപ്റ്റോ അഡൈ്വസറി കൗണ്‍സിലില്‍ ഇടം നേടുന്നതിനായി തടിച്ചുകൂടിയിരിക്കുകയാണെന്ന് നിരവധി ഡിജിറ്റല്‍ അസറ്റ് ഇന്‍ഡസ്ട്രി എക്സിക്യൂട്ടീവുകള്‍ അഭിപ്രായപ്പെടുന്നു.

ട്രംപിന്റെ ബിസിനസുകള്‍ക്കും ഈ മേഖലയില്‍ ഓഹരി പങ്കാളിത്തമുണ്ടായേക്കാം. സെപ്റ്റംബറില്‍ അദ്ദേഹം വേള്‍ഡ് ലിബര്‍ട്ടി ഫിനാന്‍ഷ്യല്‍ എന്ന പുതിയ ക്രിപ്‌റ്റോ ബിസിനസ്സ് അവതരിപ്പിച്ചു. ട്രംപിന്റെ സോഷ്യല്‍ മീഡിയ കമ്പനി ക്രിപ്റ്റോ ട്രേഡിംഗ് സ്ഥാപനമായ ബക്ക്റ്റ് വാങ്ങാനുള്ള വിപുലമായ ചര്‍ച്ചകളിലുമാണ്.

ട്രംപിന്റെ പ്രധാന സഖ്യകക്ഷിയായ ബില്യണയര്‍ എലോണ്‍ മസ്‌കും ക്രിപ്റ്റോകറന്‍സികളുടെ വക്താവാണ്.

തെരഞ്ഞെടുപ്പിന് ശേഷം യുഎസ് ലിസ്റ്റുചെയ്ത ബിറ്റ്‌കോയിന്‍ എക്‌സ്‌ചേഞ്ച്-ട്രേഡഡ് ഫണ്ടുകളിലേക്ക് 4 ബില്യണ്‍ ഡോളറിലധികം സ്ട്രീം ചെയ്തിട്ടുണ്ട്.