800 പോയിന്‍റ് കുതിച്ച് സെന്‍സെക്സ്, വിപണികള്‍ റെക്കോഡ് ഉയരത്തില്‍

ആഭ്യന്തര ഓഹരി വിപണി സൂചികകൾ ഇന്ന് വ്യാപാരം അവസാനിപ്പിച്ചത് എക്കാലത്തെയും മികച്ച ക്ലോസിങ്ങ് തലത്തില്‍. വിദേശ ഫണ്ടുകളുടെ ഒഴുക്കും ആഗോള വിപണിയിലെ ഉറച്ച പ്രവണതയും മണ്‍സൂണ്‍ വ്യാപനത്തിലെ ആശാവഹമായ പുരോഗതിയും നിക്ഷേപക വികാരത്തെ നയിച്ചു. 30-ഷെയർ ബിഎസ്ഇ സെൻസെക്‌സ് 803.14 പോയിന്റ് അഥവാ 1.26 ശതമാനം ഉയർന്ന് 64,718.56 എന്ന റെക്കോഡ് തലത്തില്‍ വ്യാപാരം അവസാനിപ്പിച്ചു. പകൽ സമയത്ത്, സെന്‍സെക്സ് 853.16 പോയിന്റ് അഥവാ 1.33 ശതമാനം ഉയര്‍ന്ന് 64,768.58 എന്ന സര്‍വകാല ഉയരം കുറിച്ചിരുന്നു. തുടര്‍ച്ചയായ മൂന്നാം ദിവസമാണ് സെന്‍സെക്സ് നേട്ടത്തില്‍ വ്യാപാരം അവസാനിപ്പിക്കുന്നത്.

എൻഎസ്ഇ നിഫ്റ്റി 216.95 പോയിന്റ് അഥവാ 1.14 ശതമാനം ഉയർന്ന് 19,189.05 എന്ന റെക്കോർഡ് ഉയരത്തിൽ വ്യാപാരം അവസാനിച്ചു. പകൽ സമയത്ത്, 229.6 പോയിന്റ് അഥവാ 1.21 ശതമാനം ഉയർന്ന് എക്കാലത്തെയും ഏറ്റവും ഉയർന്ന ഇൻട്രാ-ഡേ നിലയായ 19,201.70ല്‍ എത്തിയിരുന്നു.

ഇൻഫോസിസ്, എച്ച്‌ഡിഎഫ്‌സി ഇരട്ടകൾ, റിലയൻസ് ഇൻഡസ്ട്രീസ്, ടിസിഎസ് എന്നിവയിലെ തീവ്രമായ വാങ്ങൽ നിക്ഷേപകരുടെ പൊതു വികാരത്തെ കൂടുതൽ ശക്തിപ്പെടുത്തിയതായി ട്രേഡര്‍മാര്‍ പറയുന്നു. ബിഎസ്ഇ-ലിസ്‌റ്റഡ് സ്ഥാപനങ്ങളുടെ മൊത്തം വിപണി മൂലധനം ഇന്നത്തെ തുടക്ക വ്യാപാരത്തിൽ എക്കാലത്തെയും ഉയർന്ന തലമായ ₹295.72 ലക്ഷം കോടിയിലെത്തി. മിക്കവാറും എല്ലാ മേഖലകളുടെയും സൂചികകള്‍ നേട്ടത്തോടെയാണ് വ്യാപാരം അവസാനിപ്പിച്ചത്. ഐടി, ഓട്ടോ, പിഎസ്‌യു ബാങ്ക് എന്നിവയുടെ സൂചികകള്‍ 2 ശതമാനത്തിലധികം ഉയർന്നു. ബാങ്ക്, ഫാർമ, ഫിനാൻസ് എന്നിവ ഒരു ശതമാനത്തോളം നേട്ടമുണ്ടാക്കി. മെറ്റൽ സൂചിക ഫ്ലാറ്റായാണ് വ്യാപാരം അവസാനിപ്പിച്ചിട്ടുള്ളത്.

സെൻസെക്‌സ് പാക്കിൽ മഹീന്ദ്ര ആൻഡ് മഹീന്ദ്ര ഏറ്റവും മികച്ച പ്രകടനം നടത്തി, 4 ശതമാനത്തിലധികം ഉയർന്നു, ഇൻഡസ്ഇൻഡ് ബാങ്ക്, ഇൻഫോസിസ്, ടാറ്റ കൺസൾട്ടൻസി സർവീസസ്, മാരുതി, ലാർസൻ ആൻഡ് ടൂബ്രോ, ടെക് മഹീന്ദ്ര, വിപ്രോ, പവർ ഗ്രിഡ്, എച്ച്‌ഡിഎഫ്‌സി ബാങ്ക്, എച്ച്‌ഡിഎഫ്‌സി, ബജാജ് ഫിനാൻസ്, റിലയൻസ് ഇൻഡസ്ട്രീസ് എന്നിവയാണ് നേട്ടമുണ്ടാക്കിയ മറ്റ് പ്രമുഖ ഓഹരികള്‍. മറുവശത്ത്, ഐസിഐസിഐ ബാങ്കും എൻടിപിസിയും നഷ്ടം കുറിച്ചു.

ഏഷ്യൻ വിപണികളിൽ, സിയോൾ, ഷാങ്ഹായ് എന്നിവ നേട്ടത്തില്‍ വ്യാപാരം അവസാനിപ്പിച്ചപ്പോള്‍ൽ അവസാനിച്ചപ്പോൾ ടോക്കിയോയും ഹോങ്കോങ്ങും താഴ്ന്ന നിലയിലാണ്. യൂറോപ്പിലെ ഇക്വിറ്റി വിപണികൾ നേട്ടത്തോടെയാണ് വ്യാപാരം നടത്തുന്നത്. വ്യാഴാഴ്ച രാത്രി വ്യാപാരത്തിൽ യുഎസ് വിപണികൾ പ്രധാനമായും നേട്ടത്തോടെയാണ് അവസാനിച്ചത്.

"പ്രതിരോധശേഷി പ്രകടമാക്കുന്ന ആഭ്യന്തര മാക്രോ ഇക്കണോമിക് പശ്ചാത്തലം ഉണ്ടായിരുന്നിട്ടും, ആഗോള പിന്തുണയുടെ അഭാവം ഇന്ത്യൻ സൂചികകളെ റെക്കോർഡ് ഉയരങ്ങൾ കുറിക്കുന്നതില്‍ നിന്ന് ഇതുവരെ തടയുകയായിരുന്നു. ഇന്ന് ആഗോള വിപണിയിലെ ഉന്മേഷവും തെക്കുപടിഞ്ഞാറൻ മൺസൂണിന്റെ മുന്നേറ്റവും സഹായകമായ പോസിറ്റീവ് സൂചകങ്ങളും ആഭ്യന്തര വിപണികളെ അതിലേക്ക് വിജയിച്ചു. യുഎസിലെ മികച്ച സാമ്പത്തിക ഫലങ്ങളാണ് മുന്നേറ്റത്തിന്‍റെ പ്രധാന പ്രഭവ കേന്ദ്രം ," ജിയോജിത് ഫിനാൻഷ്യൽ സർവീസസിലെ റിസർച്ച് മേധാവി വിനോദ് നായർ പറഞ്ഞു.

ശക്തമായ സാമ്പത്തിക ഡാറ്റയെ തുടര്‍ന്ന് നിക്ഷേപകരുടെ വികാരം മെച്ചപ്പെട്ടതിനാൽ വാൾസ്ട്രീറ്റ് ഓഹരികൾ അതിവേഗം നേട്ടത്തിലേക്ക് കുതിച്ചു. ഒന്നാം പാദ ജിഡിപി സംബന്ധിച്ച പ്രതീക്ഷ ഉയര്‍ത്തിയത്, തൊഴിലില്ലായ്മ ക്ലെയിമുകളിലെ കാര്യമായ ഇടിവ്, യുഎസ് ഫെഡറൽ റിസർവിന്റെ സ്ട്രെസ് ടെസ്റ്റിൽ നിന്നുള്ള പോസിറ്റീവ് ഫലങ്ങൾ എന്നിവയാണ് നിക്ഷേപകരെ ആവേശത്തിലാക്കിയത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.61 ശതമാനം ഉയർന്ന് ബാരലിന് 74.79 ഡോളറിലെത്തി.

വിദേശ സ്ഥാപന നിക്ഷേപകർ (എഫ്‌ഐഐ) ബുധനാഴ്ച 12,350 കോടി രൂപയുടെ ഇക്വിറ്റികൾ വാങ്ങിയതായി എക്സ്ചേഞ്ച് ഡാറ്റ വ്യക്തമാക്കുന്നു. ബി‌എസ്‌ഇ ബെഞ്ച്മാർക്ക് 499.39 പോയിന്റ് അഥവാ 0.79 ശതമാനം ഉയർന്ന് 63,915.42ലാണ് ബുധനാഴ്ച വ്യാപാരം അവസാനിപ്പിച്ചിരുന്നത്. നിഫ്റ്റി 154.70 പോയിന്റ് അഥവാ 0.82 ശതമാനം ഉയർന്ന് 18,972.10 എന്ന നിലയിലാണ് ക്ലോസ് ചെയ്തത്. വ്യാഴാഴ്ച ബക്രീദ് പ്രമാണിച്ച് വിപണികള്‍ക്ക് അവധിയായിരുന്നു.