ഇന്ത്യയിലെ തൊഴില്‍ നിയമ പ്രകാരം ഇരുപതോ അതിലധികമോ ജീവനക്കാര്‍ ജോലി ചെയ്യുന്ന എല്ലാ സ്ഥാപനങ്ങളും തങ്ങളുടെ ജീവനക്കാരെ എംപ്ലോയ്‌മെന്റ്...
ഇന്ത്യയിലെ തൊഴില്‍ നിയമ പ്രകാരം ഇരുപതോ അതിലധികമോ ജീവനക്കാര്‍ ജോലി ചെയ്യുന്ന എല്ലാ സ്ഥാപനങ്ങളും തങ്ങളുടെ ജീവനക്കാരെ എംപ്ലോയ്‌മെന്റ് പ്രൊവിഡന്റ് ഫണ്ടില്‍ (ഇ പി എഫ്) ചേര്‍ത്തിരിക്കണം. പ്രൊപ്രൈറ്ററി സ്ഥാപനങ്ങള്‍, പാര്‍ട്ണര്‍ഷിപ്പുകള്‍, കമ്പനികള്‍ എന്നിങ്ങനെ സംഘടിത മേഖലയില്‍ ജോലി ചെയ്യുന്ന ജീവനക്കാര്‍ക്കാണ് ഇപിഎഫില്‍ അംഗത്വം ലഭിക്കുക. കേന്ദ്ര സര്‍ക്കാരിന്റെ എംപ്ലോയീസ് ഫണ്ട് ഓര്‍ഗനൈസഷനാണ് ഇത്തരം നിക്ഷേപങ്ങളുടെ പലിശ നിരക്ക് തീരുമാനിക്കുന്നത്. നിലവില്‍ 8.5 ശതമാനം പലിശയാണ് നിശ്ചയിച്ചിട്ടുള്ളത്. സര്‍ക്കാരിന്റെ പിന്തുണയോടെ ജീവനക്കാര്‍ക്ക് മെച്ചപ്പെട്ട വരുമാനം ഉറപ്പാക്കുന്നൊരു ദീര്‍ഘകാല നിക്ഷേപ പദ്ധതിയാണ് എംപ്ലോയ്‌മെന്റ് പ്രൊവിഡന്റ് ഫണ്ട്.
പുതിയ വിവരങ്ങള്‍ ചേര്‍ക്കാം
ഇ പി എഫ് ഒ അംഗങ്ങള്‍ക്ക് അവരുടെ ബാങ്ക് അക്കൗണ്ട് അവരുടെ ഇ പി എഫ് അക്കൗണ്ടുമായി ലിങ്ക് ചെയ്തിട്ടുണ്ടെങ്കില്‍, പി എഫ് പിന്‍വലിക്കുക, കൈമാറ്റം ചെയ്യുക തുടങ്ങിയ കാര്യങ്ങള്‍ ഓണ്‍ലൈനായി ചെയ്യാം. സമ്പാദിച്ച പലിശയുടെ വിശദാംശങ്ങള്‍ അറിയുന്നതിന് കെ വൈ സിയില്‍ ഇ പി എഫ് അക്കൗണ്ടിനൊപ്പം ഒരു ബാങ്ക് അക്കൗണ്ടും ആധാറും ഉണ്ടായിരിക്കണം. നിങ്ങളുടെ ഇ പി എഫ് അക്കൗണ്ട് കെ വൈ സി കൃത്യമാണെങ്കില്‍ എംപ്ലോയീസ് പ്രൊവിഡന്റ് ഫണ്ട് ഓര്‍ഗനൈസേഷന്റെ (ഇ പി എഫ് ഒ) ഇ-സേവാ പോര്‍ട്ടലില്‍ നിങ്ങള്‍ക്ക് ഇതുമായി ബന്ധപ്പെട്ട എല്ലാ സേവനങ്ങളും ഓണ്‍ലൈനായി ലഭ്യമാണ്. മൂന്ന് ലളിതമായ ഘട്ടങ്ങളിലൂടെ നിങ്ങളുടെ ബാങ്ക് അക്കൗണ്ട് വിവരങ്ങള്‍ ഓണ്‍ലൈനായി പുതുക്കാന്‍ കഴിയും.
പുതുക്കുന്ന രീതി
എംപ്ലോയീസ് പ്രൊവിഡന്റ് ഫണ്ട് ഓര്‍ഗനൈസേഷന്റെ (ഇ പി എഫ് ഒ) ഇ-സേവാ പോര്‍ട്ടലായ യൂണിഫൈഡ് മെമ്പര്‍ പോര്‍ട്ടലില്‍ യൂണിവേഴ്സല്‍ അക്കൗണ്ട് നമ്പറും പാസ്വേര്‍ഡും ഉപയോഗിച്ച് ലോഗിന്‍ ചെയ്യുക. ശേഷം മാനേജ് ടാബില്‍ ക്ലിക്ക് ചെയ്ത് ഡ്രോപ്പ് ഡൗണ്‍ മെനുവില്‍ നിന്ന് 'കെ വൈ സി' ഓപ്ഷന്‍ തിരഞ്ഞെടുക്കുക. ഇനി 'ഡോക്യുമെന്റ്സ്' തിരഞ്ഞെടുത്ത ശേഷം ബാങ്ക് അക്കൗണ്ട് നമ്പറും ഐ എഫ് എസ്സ് സിയും നല്‍കി സേവ് ചെയ്യുക.
പുതിയ ബാങ്ക് വിവരങ്ങള്‍ സേവ് ചെയ്ത ശേഷം 'കെ വൈ സി' പെന്‍ഡിംഗ് ഫോര്‍ അപ്രൂവല്‍' കാണിക്കും. ഇനി തൊഴിലുടമയ്ക്ക് രേഖകള്‍ സമര്‍പ്പിക്കുക. തൊഴിലുടമ അവ പരിശോധിച്ച് കഴിഞ്ഞാല്‍ 'കെ വൈ സി പെന്‍ഡിംഗ് ഫോര്‍ അപ്രൂവല്‍' എന്നത് 'ഡിജിറ്റലി അപ്രൂവ്ഡ് കെ വൈ സി' ആയി മാറും. ഇനിയാണ് ബാങ്കിന്റെ ഘട്ടം. സ്റ്റേറ്റ് ബാങ്ക് ഓഫ് ഇന്ത്യയിലുള്ള (എസ് ബി ഐ) ബാങ്ക് അക്കൗണ്ടുകള്‍ ബാങ്ക് തന്നെ ഡിജിറ്റലായി പരിശോധിക്കും. തൊഴില്‍ദാതാവ് അല്ലെങ്കില്‍ എസ് ബി ഐ ബാങ്ക് വിശദാംശങ്ങള്‍ പരിശോധിച്ചതിന് ശേഷം അംഗങ്ങള്‍ക്ക് വിവരങ്ങള്‍ പുതുക്കിയതായി എംപ്ലോയീസ് പ്രൊവിഡന്റ് ഫണ്ട് ഓര്‍ഗനൈസേഷനില്‍ നിന്ന് സ്ഥിരീകരണ സന്ദേശം ലഭിക്കും.
Login 
പഠിക്കാം & സമ്പാദിക്കാം 
Home
