എന്താണ് ക്യാമറയിലെ മെഗാപിക്‌സല്‍

ഒരു ഫോണ്‍ വാങ്ങുമ്പോഴും ക്യാമറ വാങ്ങുമ്പോഴും നമ്മള്‍ ആദ്യം ചോദിക്കുന്ന ചോദ്യം, ഇതെത്ര മെഗാ പിക്‌സല്‍ ആണെന്നായിരിക്കും. എന്താണ് ഈ മെഗാപിക്‌സല്‍ എന്നറിഞ്ഞിട്ടാണോ എല്ലാവരും ഇതു ചോദിക്കുന്നത്? ക്യാമറയുമായി ബന്ധപ്പെട്ട പദമാണിതെന്ന് കൊച്ചു കുഞ്ഞിനു പോലുമറിയാം. ശരിക്കും എന്താണ് ഈ പദം അര്‍ത്ഥമാക്കുന്നത്?

ഒരു ഡിജിറ്റല്‍ ക്യാന്‍വാസ് സൃഷ്ടിക്കാന്‍ പസിലിന്റെയോ മൊസൈക്കിന്റെയോ കഷ്ണങ്ങള്‍ പോലെ ഒരുമിച്ച് ചേര്‍ത്തിരിക്കുന്ന ചെറിയ ചതുരങ്ങളാണ് പിക്‌സലുകള്‍. ഒരു നിശ്ചിത യൂണിറ്റില്‍ ഒരുമിച്ച് പാക്ക് ചെയ്യുന്ന പിക്‌സലുകളാണ് സാധാരണയായി ഇമേജ് റെസലൂഷന്‍ നിര്‍ണ്ണയിക്കുന്നത് . ഉയര്‍ന്ന പിക്‌സല്‍ ചിത്രങ്ങള്‍ക്ക് മികച്ച റെസല്യൂഷന്‍ നല്‍കുന്നു. എന്നാല്‍ പിക്‌സലുകള്‍ വളരെ ചെറിയ യൂണിറ്റ് ആയതിനാല്‍ മെഗാപിക്‌സല്‍ ഫോര്‍മാറ്റില്‍ ആണ് പൊതുവെ പറയുന്നത്. പത്തുലക്ഷം (1 മില്യണ്‍) പിക്‌സലുകളാണ് ഒരു മെഗാപിക്‌സല്‍ കൊണ്ട് അര്‍ത്ഥമാക്കുന്നത്.

ഒരു ഇഞ്ചില്‍ എത്ര പിക്‌സലുകളും മെഗാപിക്‌സലുകളും എന്ന തോത് ആണ് ചിത്രത്തിന്റെ ഡിജിറ്റല്‍ ഇമേജ് റെസലൂഷന്‍ നിര്‍ണ്ണയിക്കുന്നത്. ഉദാഹരണത്തിന്, 12-മെഗാപിക്‌സല്‍ ക്യാമറ സെന്‍സറുപയോഗിച്ച് ഒരു ഇഞ്ചിന് 12 ദശലക്ഷം പിക്‌സലുകള്‍ (PPI) ഉള്ള ചിത്രങ്ങള്‍ എടുക്കാന്‍ കഴിയും. അതുപോലെ, 8 എംപി ക്യാമറ സെന്‍സറിന് എട്ട് ദശലക്ഷം പിപിഐ ഉപയോഗിച്ച് ചിത്രങ്ങള്‍ എടുക്കാന്‍ കഴിയും. 12 എംപി സെന്‍സര്‍ ഒരു ഇഞ്ചിന് കൂടുതല്‍ മെഗാപിക്‌സല്‍ ഉള്‍ക്കൊള്ളിക്കുന്നതിനാല്‍, 8 എംപി സെന്‍സറുമായി താരതമ്യപ്പെടുത്തുമ്പോള്‍ കൂടുതല്‍ ക്ലാരിറ്റിയുള്ള ചിത്രങ്ങളാണ് ഉണ്ടാകുന്നത്. എന്നിരുന്നാലും, ചിത്രത്തിന്റെ ഗുണനിലവാരം മെഗാപിക്സലിന്റെ എണ്ണത്തെ മാത്രമല്ല നിര്‍ണ്ണയിക്കുന്നത്. കളര്‍ ശ്രേണി, പ്രകാശ സംവേദനക്ഷമത, ഡീറ്റെയ്ല്‍ ഒപ്റ്റിമൈസേഷനുകള്‍ എന്നിവയും ചിത്രത്തിന്റെ ഗുണനിലവാരം നിര്‍ണ്ണയിക്കുന്ന മറ്റ് ചില ഘടകങ്ങളാണ്.

ഉയര്‍ന്ന മെഗാപിക്‌സലുകളുള്ള ഫോണുകളില്‍ മാത്രമേ ഒരു ഫോട്ടോ സൂം ഇന്‍ ചെയ്യാനും ക്രോപ് ചെയ്യാനും സാധിക്കുന്നുള്ളൂ. ചില ഫോണുകള്‍ ഒപ്റ്റിക്കല്‍ സൂം ലെന്‍സ് ഇല്ലാതെ തന്നെ ഗുണനിലവാരം നഷ്ടപ്പെടാതെ 'സൂം ഇന്‍' ചെയ്യാന്‍ അനുവദിക്കുന്നു. ഉദാഹരണത്തിന്, ക്യാമറ പകര്‍ത്തിയ യഥാര്‍ത്ഥ 23 മെഗാപിക്‌സല്‍ ചിത്രത്തിന്റെ മധ്യഭാഗത്ത് നിന്ന് 8 മെഗാപിക്‌സല്‍ ഫോട്ടോ ക്രോപ്പ് ചെയ്തുകൊണ്ടാണ് ഇങ്ങനെ ചെയ്യുന്നത്.

കൂടുതല്‍ മെഗാപിക്‌സലുകളുള്ള ഫോട്ടോകള്‍ക്ക് ക്വാളിറ്റി കൂടുതല്‍ ആണ് . ഇത്തരം ഫോട്ടോകളുടെ ഫയല്‍ സൈസും വലുതായിരിക്കും. അതിനാല്‍ കൈമാറ്റം ചെയ്യുമ്പോഴും അയക്കേണ്ടി വരുമ്പോഴും കൂടുതല്‍ സമയമെടുക്കുന്നു. ഇവയുടെ സൈസ് വലുതായത് കൊണ്ടു തന്നെ ഫോണില്‍ സൂക്ഷിക്കാന്‍ കുറച്ചധികം സ്‌പേസും വേണ്ടി വരുന്നു. മിക്ക ക്യാമറകള്‍ക്കും ക്യാമറ ഫോണുകള്‍ക്കും വേണമെങ്കില്‍ കുറഞ്ഞ റെസല്യൂഷനില്‍ (ചെറുത്) ഫോട്ടോകള്‍ എടുക്കാനുള്ള ഓപ്ഷന്‍ ഉണ്ട്. നിങ്ങളുടെ ഫോണ്‍ മെമ്മറി കുറവാണെങ്കില്‍ സ്ഥലം ലാഭിക്കാന്‍ ഇത്തരം കുറഞ്ഞ റെസല്യൂഷനില്‍ ഫോട്ടോ എടുക്കുന്നത് ഉപയോഗപ്രദമാകും.