പത്ത് ലക്ഷം രൂപയ്ക്ക് മുകളിലുള്ള ചെക്കുകള്‍ പോസിറ്റീവ് പേ സിസ്റ്റം വഴി സ്ഥിരീകരിച്ചതിന് ശേഷമേ പാസാക്കൂ എന്ന് പഞ്ചാബ് നാഷണല്‍ ബാങ്ക്....
പത്ത് ലക്ഷം രൂപയ്ക്ക് മുകളിലുള്ള ചെക്കുകള്‍ പോസിറ്റീവ് പേ സിസ്റ്റം വഴി സ്ഥിരീകരിച്ചതിന് ശേഷമേ പാസാക്കൂ എന്ന് പഞ്ചാബ് നാഷണല്‍ ബാങ്ക്. ഏപ്രില്‍ നാല് മുതല്‍ പുതിയ തീരുമാനത്തിന് പ്രാബല്യമുണ്ടാകും. വലിയ മൂല്യമുള്ള ചെക്കുകളിലെ തട്ടിപ്പുകള്‍ തടയുന്നതിനുള്ള നടപടിയുടെ ഭാഗമായിട്ടാണ് തീരുമാനം. നേരത്തെ 50,000 രൂപ വരെ മൂല്യമുള്ള തുകയുടെ ചെക്കുകള്‍ക്ക് ഈ സംവിധാനം ഏര്‍പ്പെടുത്തിയിരുന്നു. സുരക്ഷ വര്‍ധിപ്പിക്കുന്നതിന്റെ ഭാഗമായി ആര്‍ ബി ഐ നിര്‍ദേശമനുസരിച്ചാണ് നടപടി.
എന്താണ് പോസിറ്റീവ് പേ?
ചെക്ക് തട്ടിപ്പുകള്‍ പുതിയ സംഭവമല്ല. പല വിധത്തിലാണ് തട്ടിപ്പുകാര്‍ ചെക്കുകള്‍ ഉപയോഗിക്കുന്നത്. എന്നാല്‍ ഉയര്‍ന്ന മൂല്യമുള്ള ചെക്കുകളിലെ ഇത്തരം അപകടങ്ങള്‍ക്ക് തടയിടാന്‍ ആര്‍ ബി ഐ കൊണ്ടു വന്ന സംവിധാനമാണ് 'പോസിറ്റിവ് പേ'. ഇതനുസരിച്ച് ചെക്ക് പണമാക്കി മാറ്റാന്‍ ബാങ്കിലെത്തുമ്പോള്‍ ചെക്ക് കൈമാറിയ ആള്‍ മുമ്പേ നല്‍കിയിട്ടുള്ള വിവരങ്ങള്‍ ഒത്തു നോക്കിയാവും പണം കൈമാറുക.
50,000 രൂപയില്‍ കൂടുതല്‍ മൂല്യമുള്ള ചെക്കുകള്‍ക്കാണ് ബാങ്കുകള്‍ ഈ സംവിധാനം സുരക്ഷാ തട്ട് എന്ന നിലയില്‍ ഏര്‍പ്പെടുത്തിരിക്കുന്നത്. അതായത് തടസമേതുമില്ലാതെ പണകൈമാറ്റം പൂര്‍ത്തിയാക്കാന്‍ അര ലക്ഷത്തിന് മുകളിലുള്ള ചെക്കുകള്‍ നല്‍കുമ്പോള്‍ നിങ്ങള്‍ ബാങ്കില്‍ വിവരം അറിയിച്ചിരിക്കണം. അല്ലെങ്കില്‍ ചെക്ക് മടങ്ങിയേക്കാം.
ബാങ്കിനെ അറിയിക്കാം
പോസിറ്റീവ് പേ സംവിധാനത്തില്‍ ഉയര്‍ന്ന മൂല്യമുള്ള ചെക്ക് നല്‍കുമ്പോള്‍ അതിന്റെ വിശദാംശങ്ങള്‍ ബാങ്കിനെ നെറ്റ് ബാങ്കിംഗ് വഴിയോ മൊബൈല്‍ ബാങ്കിംഗ് വഴിയോ അറിയിച്ചിരിക്കണം. പേര്, ചെക്ക് നമ്പര്‍, തുക, തീയതി, അക്കൗണ്ട് നമ്പര്‍, എന്നിവയാണ് ബാങ്ക് ശാഖയില്‍ നല്‍കേണ്ടത്. നേരിട്ടും അറിയിക്കാം. ഈ വര്‍ഷം ജനുവരി 21 മുതലാണ് ഇത് പ്രാബല്യത്തില്‍ വന്നതെങ്കിലും ബാങ്കുകള്‍ ഇപ്പോഴാണ് ഇത് നടപ്പാക്കുന്നത്.
50,000 രൂപയ്ക്ക് മുകളില്‍ മൂല്യമുള്ള ചെക്കുകള്‍ക്കാണ് ഇത് നടപ്പിലാക്കിയിട്ടുള്ളതെങ്കിലും വേണമെങ്കില്‍ മാത്രം ഈ സൗകര്യം ഉപയോഗിച്ചാല്‍ മതിയാകും. എന്നാല്‍ 5 ലക്ഷം രൂപയ്ക്ക് മുകളിലാണ് ചെക്ക് എങ്കില്‍ ഇത് നിര്‍ബന്ധമാക്കിയിട്ടുമുണ്ട്. പക്ഷെ പല ബാങ്കുകളും ഇത് നടപ്പിലാക്കി തുടങ്ങിയിട്ടില്ല.
Login 
പഠിക്കാം & സമ്പാദിക്കാം 
Home
