എഥനോള്‍ ഇന്ധനകാര്‍ ടൊയോട്ട പുറത്തിറക്കി

പൂര്‍ണമായും എഥനോള്‍ ഇന്ധനത്തില്‍ ഓടുന്ന ലോകത്തിലെ ആദ്യത്തെ കാര്‍, ടൊയോട്ട ഇന്നോവ, കേന്ദ്ര ഗതാഗത, ഹൈവേ മന്ത്രി നിതിന്‍ ഗഡ്കരി ന്യൂഡല്‍ഹിയില്‍ നടന്ന ചട്ങ്ങില്‍ പുറത്തിറക്കി. രാജ്യത്തെ ശുദ്ധ ഇന്ധന ഉപയോഗം വര്‍ധിപ്പിക്കുകയെന്ന ലക്ഷ്യത്തോടെയുള്ള കേന്ദ്രസര്‍ക്കാരിന്റെ നീക്കത്തിന്റെ ഭാഗമായാണ് ഈ വാഹനം.

പുറത്തിറക്കല്‍ ചടങ്ങില്‍ കേന്ദ്ര പെട്രോളിയം, പ്രകൃതിവാതക മന്ത്രി ഹര്‍ദീപ് സിങ് പുരിയും സന്നിഹിതനായിരുന്നു.

ലോകത്തിലെ ആദ്യത്തെ ബി എസ് 6 ( സ്‌റ്റേജ് -2) ഇലക്ട്രിക് ഫ്‌ളെക്‌സ് വാഹനമാണ് ടൊയോട്ട കിര്‍ലേസ്‌കര്‍ മോട്ടോര്‍ പുറത്തിറക്കിയിട്ടുള്ള ഈ കാര്‍. ഇലക്ട്രിക് മോഡിലും ഈ കാര്‍ പ്രവര്‍ത്തിപ്പിക്കുവാന്‍ സാധിക്കും.

ബദല്‍ ഇന്ധനങ്ങളില്‍ പ്രവര്‍ത്തിക്കുന്നതും പരിസ്ഥിതി സൗഹൃദവുമായ ഇന്ധനങ്ങളില്‍ പ്രവര്‍ത്തിക്കുന്ന കാറുകള്‍ രൂപകല്‍പ്പന ചെയ്യാന്‍ മന്ത്രി ഗഡ്കരി കാര്‍ നിര്‍മാതാക്കളോട് ആവശ്യപ്പെട്ടു.

ഒന്നില്‍ കൂടുതല്‍ ഇന്ധനങ്ങളില്‍ ഓടുന്ന വാഹനങ്ങളെയാണ് ഫ്‌ളെക്‌സ് ഫ്യുവല്‍ വെഹിക്കിള്‍ ( എഫ് എഫ് വി) എന്നു വിളിക്കുന്നത്. ഫ്‌ളെക്‌സ് ഫ്യുവല്‍ വാഹനങ്ങളെ പൊതുവേ ഇ- 85 എന്നാണ് വിളിക്കുന്നത്. ഇതിലുപയോഗിക്കുന്ന ഇന്ധനത്തില്‍ 85 ശതമാനം എഥനോളും 15 ശതമാനം പെട്രോള്‍, ഡീസല്‍ എന്നിവയോ ആയിരിക്കും. എന്നാല്‍ ഇപ്പോള്‍ പുറത്തിറക്കിയിട്ടുള്ള ടൊയോട്ട ഹൈക്രോസ് ഇന്നോവ ഇ-100 വിഭാഗത്തില്‍പ്പെടുന്നതാണ്.

പാരമ്പര്യമായി ഉപയോഗിക്കുന്ന പെട്രോള്‍, ഡീസല്‍ ഇന്ധനങ്ങളേക്കാള്‍ 25 ശതമാനം മൈലേജ് കുറവാണ് എന്നതാണ് എഫ് എഫ് വികളുടെ ന്യൂനത.