പലിശയുള്ള വിദേശ കറന്‍സി അക്കൗണ്ടുകള്‍ ഇനി വ്യക്തികള്‍ക്കും തുടങ്ങാം

പലിശ വരുമാനം നല്‍കുന്ന വിദേശ കറന്‍സി അക്കൗണ്ടുകള്‍ (എഫ്‍സിഎ) തുടങ്ങുന്നതിന് വ്യക്തികള്‍ക്കുണ്ടായിരുന്ന നിയന്ത്രണങ്ങള്‍ റിസര്‍വ് ബാങ്ക് ഓഫ് ഇന്ത്യ നീക്കി. കൂടാതെ, എഫ്‌സി‌എ അക്കൗണ്ടിൽ 15 ദിവസം വരെ നിഷ്‌ക്രിയമായി അവശേഷിക്കുന്ന ഏതെങ്കിലും ഫണ്ടുകൾ തിരിച്ച് ആഭ്യന്തര അക്കൗണ്ടിലേക്ക് മാറ്റണമെന്ന നിബന്ധനയും കേന്ദ്ര ബാങ്ക് ഇല്ലാതാക്കി.

വ്യാവസായിക ലോകം ആർബിഐയില്‍ നിന്ന് ദീർഘകാലമായി കാത്തിരുന്ന പരിഷ്‌ക്കരണമാണിത്. ഇന്ത്യയുടെ ഇന്റർനാഷണൽ ഫിനാൻഷ്യൽ സർവീസസ് സെന്റർ (IFSC) കൂടുതൽ ആകർഷകമാക്കുന്നത് ലക്ഷ്യമിട്ടാണ് ആര്‍ബിഐ പുതിയ നടപടികള്‍ പ്രഖ്യാപിച്ചത്. പണമയയ്‌ക്കലിന്റെ കാര്യത്തിൽ മറ്റു രാജ്യങ്ങളിലെ സെന്‍ററുകള്‍ക്ക് സമാനമായ തലത്തിലേക്ക് ഇതിലൂടെ ഐഎഫ്‌എസ്‌സി എത്തുന്നതായാണ് വിലയിരുത്തപ്പെടുന്നത്.

ലിബറലൈസ്ഡ് റെമിറ്റൻസ് സ്കീമിന് (എല്‍ആര്‍എസ്) കീഴിൽ ഇന്ത്യയിൽ സ്ഥാപിതമായ ഐഎഫ്എസ്‍സികളിലേക്ക് പണമയയ്ക്കുന്നതിന് ഇന്ത്യയില്‍ സ്ഥിരതാമസമുള്ള വ്യക്തികൾക്ക് 2021 ഫെബ്രുവരിയില്‍ ആര്‍ബിഐ അംഗീകാരം നല്‍കിയിരുന്നു. എന്നിരുന്നാലും, ഐഎഫ്എസ്‍സി സെക്യൂരിറ്റികളിലെ നിക്ഷേപങ്ങൾക്ക് മാത്രമേ ഈ പേയ്‌മെന്റുകൾ ഉപയോഗിക്കാനാവുമായിരുന്നുള്ളൂ.

കൂടാതെ, എല്‍ആര്‍എസിനു കീഴില്‍ പലിശയില്ലാത്ത എഫ്‍സിഎകള്‍ മാത്രമേ ഐഎഫ്‍എസ്‍സികളില്‍ അനുവദിച്ചിരുന്നുള്ളു. കൂടാതെ രസീത് തീയതി മുതൽ 15 ദിവസം വരെ അക്കൗണ്ടിൽ നിഷ്‌ക്രിയമായി അവശേഷിക്കുന്ന ഏതൊരു ഫണ്ടും നിക്ഷേപകന്റെ ഇന്ത്യയിലെ ആഭ്യന്തര അക്കൗണ്ടിലേക്ക് തൽക്ഷണം തിരികെ ട്രാൻസ്ഫർ ചെയ്യേണ്ടതുമായിരുന്നു.ആർബിഐ ഇപ്പോള്‍ പുറത്തിറക്കിയ സർക്കുലറിലൂടെ ഈ പ്രധാന നിയന്ത്രണങ്ങൾ നീങ്ങുകയാണ്.

ആർബിഐയുടെ ഏറ്റവും പുതിയ തീരുമാനം ഐഎഫ്എസ്‌സിയിലെ ബാങ്കുകള്‍ക്ക് പണത്തിലേക്കുള്ള ആക്‌സസ് ചെലവു കു‌റഞ്ഞതാക്കുമെന്ന് വിലയിരുത്തപ്പെടുന്നു. കൂടുതൽ മത്സരാധിഷ്ഠിതമായ നിരക്കിൽ വായ്പ നൽകാൻ ഇത് വഴിയൊരുക്കും.

നിയമപരമായ ഏതൊരു ഇടപാടുകൾക്കുമായി ഒരു സാമ്പത്തിക വർഷത്തിൽ 250,000 ഡോളർ വരെ പണമയയ്ക്കുന്നതിന് ഇന്ത്യയില്‍ സ്ഥിരതാമസമുള്ള വ്യക്തികള്‍ക്ക് സൗകര്യമൊരുക്കുന്നതിന് അംഗീകൃത ഡീലർമാർക്ക് എല്‍ആര്‍എസ് അംഗീകാരം നല്‍കിയിട്ടുണ്ട്.