അര്‍ബന്‍ സഹകരണ ബാങ്കുകള്‍ക്കുള്ള പ്രൊവിഷനിംഗ് വ്യവസ്ഥകള്‍ ഏകീകരിച്ചു

സ്റ്റാൻഡേർഡ് ആസ്തികൾക്കായുള്ള പ്രൊവിഷനിംഗ് മാനദണ്ഡങ്ങൾ എല്ലാ വിഭാഗത്തിലുള്ള അർബൻ കോ-ഓപ്പറേറ്റീവ് ബാങ്കുകൾക്കും (യുസിബി) ബാധകമാകുന്ന തരത്തില്‍ ഏകീകരിച്ചുകൊണ്ട് റിസര്‍വ് ബാങ്ക് ഉത്തരവിറക്കി. റെഗുലേറ്ററി ആവശ്യങ്ങൾക്കായി കഴിഞ്ഞ വർഷം ഡിസംബറിൽ ആർബിഐ നഗര സഹകരണ ബാങ്കുകളെ ടയർ 1, 2, 3, 4 എന്നിങ്ങനെ നാല് തട്ടുകളായി തരംതിരിച്ചിരുന്നു. അതിനുമുമ്പ് ടയർ 1, ടയർ 2 വിഭാഗങ്ങള്‍ മാത്രമായിരുന്നു യുസിബികള്‍ക്ക് ഉണ്ടായിരുന്നത്.

പരിഷ്‌ക്കരിച്ച ചട്ടക്കൂടിന് കീഴില്‍ എല്ലാ വിഭാഗത്തിലുള്ള യുസിബികളും കാർഷിക, എസ്എംഇ മേഖലകളിലേക്കുള്ള നേരിട്ടുള്ള വായ്പകളില്‍, ഫണ്ട് ചെയ്ത കുടിശ്ശികയുടെ 0.25 ശതമാനം പോർട്ട്‌ഫോളിയോ അടിസ്ഥാനത്തിൽ പ്രൊവിഷനിംഗ് നടത്തണമെന്നാണ് നിബന്ധന. വാണിജ്യ റിയൽ എസ്റ്റേറ്റ് (CRE) മേഖലയിലേക്കുള്ള വായ്പകളില്‍ പോർട്ട്ഫോളിയോ അടിസ്ഥാനത്തിൽ ഫണ്ട് ചെയ്ത കുടിശ്ശികയുടെ 1 ശതമാനം ഏകീകൃതമായ പ്രൊവിഷനിംഗ് ആവശ്യമാണ്.

കൊമേഴ്‌സ്യൽ റിയൽ എസ്റ്റേറ്റ്-റെസിഡൻഷ്യൽ ഹൗസിംഗ് സെക്‌ടറിന്റെയും (CRE-RH) മറ്റ് എല്ലാ വായ്പകളുടെയും അഡ്വാൻസുകളുടെയും കാര്യത്തിൽ, പ്രൊവിഷനിംഗ് ആവശ്യകതകൾ യഥാക്രമം 0.75 ശതമാനവും 0.4 ശതമാനവും ആയിരിക്കും.

ആർബിഐ എല്ലാ യൂണിറ്റ് യുസിബികളെയും ശമ്പളം വാങ്ങുന്നവരുടെ യുസിബികളെയും (ഡെപ്പോസിറ്റ് വലുപ്പം കണക്കിലെടുക്കാതെ) 100 കോടി രൂപ വരെ നിക്ഷേപമുള്ള മറ്റെല്ലാ യുസിബികളെയും ടയർ 1 ൽ തരംതിരിച്ചിട്ടുണ്ട്.

ടയർ 2-ൽ, 100 കോടിയിലേറെയും 1,000 കോടി രൂപ വരെയും നിക്ഷേപമുള്ള യുസിബികളാണ്. 1,000 കോടി രൂപയിൽ കൂടുതലും 10,000 കോടി രൂപ വരെ നിക്ഷേപമുള്ള ബാങ്കുകളാണ് ടയർ 3യിലുള്ളത്. 10,000 കോടി രൂപയിലധികം നിക്ഷേപമുള്ള യുസിബികളെ ടയർ 4 ആയി തരംതിരിച്ചിട്ടുണ്ട്.