വിപണി വിഹിതം 53.58 ലേക്ക് ഉയര്‍ത്തി സ്വകാര്യ ഇന്‍ഷുറന്‍സ് കമ്പനികള്‍

സ്വകാര്യ ജനറല്‍ ഇൻഷുറൻസ് കമ്പനികളുടെ സംയോജിത വിപണി വിഹിതം നടപ്പ് സാമ്പത്തിക വർഷത്തിന്റെ ആദ്യ പകുതിയിൽ 53.58 ശതമാനത്തിലേക്ക് ഉയർത്തി. മുൻവർഷം സമാന കാലയളവില്‍ മൊത്തം നേരിട്ടുള്ള പ്രീമിയത്തിന്‍റെ 50.81 ശതമാനമായിരുന്നു സ്വകാര്യ കമ്പനികളുടെ വിഹിതം.

ഇൻഷുറൻസ് റെഗുലേറ്ററി ഡെവലപ്‌മെന്റ് അതോറിറ്റി ഓഫ് ഇന്ത്യ (ഐആര്‍ഡിഎഐ). പുറത്തുവിട്ട, നേരിട്ടുള്ള മൊത്തം പ്രീമിയങ്ങളുടെ കണക്കുകൾ പ്രകാരം ഈ സാമ്പത്തിക വർഷത്തിന്റെ ആദ്യ പകുതിയിൽ നോൺ-ലൈഫ് വിഭാഗത്തിലെ 31 ഇൻഷുറൻസ് കമ്പനികൾ 1.43 ലക്ഷം കോടി രൂപയുടെപ്രീമിയം അടച്ചിട്ടുണ്ട്.

സ്വകാര്യ ഇൻഷുറൻസ് കമ്പനികൾ മൊത്തത്തിലുള്ള ഡയറക്റ്റ് പ്രീമിയത്തിൽ 14.86 ശതമാനം വാർഷിക വർധന രേഖപ്പെടുത്തി. 2022-23 ഏപ്രിൽ-സെപ്റ്റംബർ കാലയളവിൽ നോൺ-ലൈഫ് വ്യവസായം 1,25,194 കോടി രൂപ നേരിട്ടുള്ള പ്രീമിയം (ജിഡിപി) അണ്ടർറൈറ്റ് ചെയ്തിട്ടുണ്ട്.

മുന്നില്‍ ന്യൂ ഇന്ത്യാ അഷ്വറന്‍സ്

13.09 ശതമാനം വിപണി വിഹിതമുള്ള ന്യൂ ഇന്ത്യ അഷ്വറൻസ് കമ്പനിക്കാണ് നോണ്‍-ലൈഫ് വിഭാഗത്തില്‍ ഏറ്റവും ഉയര്‍ന്ന പങ്കാളിത്തമുള്ളത്. ഐസിഐസിഐ ലോംബാർഡ് ജനറൽ ഇൻഷുറൻസ് കമ്പനി (8.67 ശതമാനം), ബജാജ് അലയൻസ് ജനറൽ ഇൻഷുറൻസ് കമ്പനി (7.69 ശതമാനം) എന്നിവയാണ് അടുത്ത സ്ഥാനങ്ങളില്‍ വരുന്നത്. ഈ മികച്ച 3 ഇൻഷുറൻസ് കമ്പനികൾക്ക് 18.45 ശതമാനം വളർച്ചാ നിരക്കോടെ മൊത്തം 29.46 ശതമാനം വിപണി വിഹിതമുണ്ട്.

പൊതുമേഖലാ ജനറല്‍ ഇൻഷുറൻസ് കമ്പനികൾക്ക് ഏപ്രിൽ-സെപ്റ്റംബർ കാലയളവിൽ 31.99 ശതമാനം വിപണി വിഹിതം ഉണ്ടായിരുന്നു, മുന്‍ വര്‍ഷം ഇതേ കാലയളവിലെ 32.76 ശതമാനം വിപണി വിഹിതവുമായി താരതമ്യപ്പെടുത്തുമ്പോൾ 12.16 ശതമാനം ഇടിവ്.

മേഖലകളില്‍ മുന്നില്‍ ആരോഗ്യം

സെപ്റ്റംബർ വരെയുള്ള കണക്ക് അനുസരിച്ച് ആരോഗ്യ ഇൻഷുറൻസാണ് ഏറ്റവും വലിയ നോൺ-ലൈഫ് വിഭാഗം, അതിനുശേഷം വാഹന ഇന്‍ഷുറന്‍സും വിള ഇൻഷുറൻസും വരുന്നു. മറൈൻ കാർഗോ, മറൈൻ ഹൾ, വിള ഇൻഷുറൻസ്, ബാധ്യത ഇന്‍ഷുറന്‍സ് എന്നിവ നെഗറ്റീവ് വളർച്ചാ നിരക്ക് രേഖപ്പെടുത്തിയതായും ഐആര്‍ഡിഎഐ ഡാറ്റ കാണിക്കുന്നു.

തീ, മറൈൻ കാർഗോ, മറൈൻ ഹൾ, മോട്ടോർ തേർഡ് പാർട്ടി, ഓവർസീസ് മെഡിക്കൽ ഇൻഷുറൻസ്, വിള ഇൻഷുറൻസ്, ക്രെഡിറ്റ് ഇൻഷുറൻസ്, ബാധ്യത തുടങ്ങിയ വിഭാഗങ്ങളിലെല്ലാം മുൻ വർഷം സമാന കാലയളവിലെ വളര്‍ച്ചയെ അപേക്ഷിച്ച് കുറഞ്ഞ വളര്‍ച്ചയാണ് രേഖപ്പെടുത്തിയിട്ടുള്ളത്.