ക്രെഡ് മാഫിയ വളരുന്നു : ക്രെഡിൽ നിന്ന് പിറന്നത് 28 പുതിയ സംരംഭങ്ങൾ

ക്രെഡ് മാഫിയ വളർന്നു കൊണ്ടിരിക്കുന്നു. ക്രെഡിറ്റ് കാർഡ് പേയ്മെന്റ് ആപ്പ് ആയ ക്രെഡിൽ നിന്നും ഇതുവരെ 30 മുൻ ജീവനക്കാർ സംരംഭകരായി മാറി 28 സ്റ്റാർട്ടപ്പുകൾ സ്ഥാപിച്ചു. ഇത്തരത്തിൽ ഒരു കമ്പനിയിൽ നിന്ന് പുറത്തുപോയി സ്വന്തം സംരംഭങ്ങൾ തുടങ്ങുന്ന മുൻ ജീവനക്കാരെയും സ്ഥാപകരെയും ഉൾപ്പെടുന്ന ശൃംഖലയെ "സ്റ്റാർട്ട് അപ്പ് മാഫിയ" എന്ന് വിളിക്കുന്നു. മറ്റൊരു വാക്കിൽ പറഞ്ഞാൽ, മുൻ കമ്പനി ജീവനക്കാർ പുതിയ ബിസിനസുകൾ ആരംഭിക്കുന്നതിനുള്ള ഒരു ഇക്കോസിസ്റ്റമാണ് ഇത്. ഒന്നാം തലമുറയിൽ നിന്ന് പ്രചോദനം ഉൾക്കൊണ്ട്, രണ്ടാം തലമുറയിൽ വമ്പൻ വിജയങ്ങൾ നേടിയ സ്റ്റാർട്ടപ്പുകളുടെ ഒരു വിശാലമായ ശൃംഖലയാണ്, 'സ്റ്റാർട്ടപ്പ് മാഫിയ'.

അനുഭവപരിചയത്തിന്റെ കരുത്തും പങ്കിട്ട വിജയങ്ങളുടെ പ്രചോദനവും വ്യക്തിപരമായ ബന്ധങ്ങളുടെ ശക്തിയും ചേർന്ന് അവർ ലോകമെമ്പാടും വേരു പടർത്തുന്നു. മുൻ കമ്പനിയിൽ നിന്നുള്ള അറിവും കഴിവുകളും പങ്കിടുന്നതിലൂടെ പുതിയ സ്റ്റാർട്ടപ്പുകൾക്ക് വളരാനുള്ള വേഗത കൂട്ടാൻ സാധിക്കും. ഈ ശൃംഖലയിലുള്ള കമ്പനികൾ പരസ്പരം സഹായിക്കുകയും പിന്തുണയ്ക്കുകയും ചെയ്യുന്നു. ഇത് വിപണിയിൽ മികച്ച രീതിയിൽ പ്രവർത്തിക്കാനും വളരാനും അവരെ സഹായിക്കുന്നു.

ക്രെഡിന്റെ വ്യത്യസ്ത വഴി

ക്രെഡ് സ്ഥാപകനായ കുനാൽ ഷായുടെ നേതൃത്വത്തിൽ 5 പുതിയ ഉൽപ്പന്നങ്ങൾ 2023 ൽ പുറത്തിറങ്ങി. പക്ഷേ, മറ്റ് ഫിൻടെക് കമ്പനികളെപ്പോലെ ഒരു സൂപ്പർ ആപ്ലിക്കേഷൻ ആകാനുള്ള മത്സരത്തിൽ ക്രെഡ് പങ്കെടുക്കുന്നില്ല. ഷായുടെ മാതൃക ആപ്പിളും മെഴ്സിഡീസും പോലുള്ള കമ്പനികളാണ്.

എല്ലാ കമ്പനികളും ഓൾ-ഇൻ-വൺ ഫിൻടെക് ആപ്പ് ആകാൻ ശ്രമിക്കുമ്പോൾ, ക്രെഡ് തങ്ങളുടെ ഉൽപ്പന്ന നയങ്ങൾക്ക് വിരുദ്ധമാകാതെ ശ്രദ്ധയോടെ മുന്നോട്ടുപോകുന്നു. ക്രെഡിന്റെ ഉപഭോക്താക്കളുടെ ആവശ്യങ്ങൾക്ക് അനുയോജ്യമായ ഉൽപ്പന്നങ്ങളാണ് ഷാ തിരഞ്ഞെടുക്കുന്നത്. ഉദാഹരണത്തിന്, എല്ലാ ഫിൻടെക് കമ്പനികളും ഒരിടത്തുതന്നെ എല്ലാ സേവനങ്ങളും നൽകുന്ന "ഓൾ-ഇൻ-ഒൺ" ആപ്പുകൾ ആകാൻ ശ്രമിക്കുമ്പോൾ, ക്രെഡ് ഉപഭോക്താക്കളുടെ ആവശ്യങ്ങൾക്കനുസരിച്ച് ഉൽപ്പന്നങ്ങൾ തിരഞ്ഞെടുക്കുകയാണ് ചെയ്തത്.

ക്രെഡിറ്റ് ഗാരേജ് പോലുള്ള വാഹന മാനേജ്മെന്റ് സേവനം അപ്രതീക്ഷിതമായി പുറത്തിറക്കിയപ്പോൾ പോലും അത് പ്ലാറ്റ്‌ഫോമിൽ യോജിച്ചുപോയി. ആദ്യത്തെ 3 ആഴ്ചകളിൽത്തന്നെ 10 ലക്ഷം വാഹനങ്ങൾ ഗാരേജിൽ രജിസ്റ്റർ ചെയ്തതായി അവകാശപ്പെടുന്നു. സ്റ്റാർട്ടപ്പ് ഇതുവരെ ലാഭകരമായിട്ടില്ല, എന്നാൽ ആപ്പിൾ, മെഴ്‌സിഡസ് പോലുള്ള മികച്ച കമ്പനികൾ ഉൽപ്പന്ന വികസനത്തിന് സമയമെടുക്കുന്നു എന്നാണ് ഷായുടെ അഭിപ്രായം. അത് ഒരു കാറോ സ്മാർട്ട്‌ഫോണോ ലാപ്‌ടോപ്പോ അല്ലെങ്കിൽ ഫിൻടെക് ആപ്പോ ആകട്ടെ.

കഴിഞ്ഞ 5 വർഷങ്ങളായി ക്രെഡ് നഷ്ടത്തിൽ തുടരുകയാണ് എന്നതാണ് വസ്തുത. എന്നാൽ, അനേകർ ക്രെഡ് പോലെ ഒരു സ്ഥാപനത്തിൽ നിന്ന് പുറത്തുപോയി വിജയകരമായ സംരംഭങ്ങൾ കെട്ടിപ്പടുക്കുന്നു. ഇതിനു പിന്നിലുള്ള രഹസ്യം ആണ് ഇപ്പോൾ എല്ലാവർക്കും അറിയേണ്ടത്.

ഇൻക് 42 ഡാറ്റ അനുസരിച്ച്, മുൻ ക്രെഡ് ക്ലബ് ജീവനക്കാരിൽ നിന്നും 30 പേർ ഇതുവരെ 28 സ്റ്റാർട്ടപ്പുകൾ സ്ഥാപിച്ചിട്ടുണ്ട്. ക്രെഡ് മാഫിയ ഇന്ത്യൻ സ്റ്റാർട്ടപ്പ് രംഗത്തെ കൂടുതൽ ശക്തിപ്പെടുത്തുകയും പുതിയ തൊഴിലവസരങ്ങൾ സൃഷ്ടിക്കുകയും ചെയ്യുമെന്ന് പ്രതീക്ഷിക്കുന്നു.