ഒന്നേകാല്‍ ലക്ഷം കോടി രൂപയുടെ അര്‍ദ്ധചാലക പദ്ധതികള്‍ക്ക് തുടക്കം

ഒന്നേകാല്‍ലക്ഷം കോടി രൂപയുടെ അര്‍ദ്ധചാലക പദ്ധതികള്‍ക്ക് പ്രധാനമന്ത്രി തുടക്കംകുറിച്ചു. ഇന്ത്യയില്‍ അര്‍ദ്ധചാലക പ്ലാന്റിന്റെ പ്രാധാന്യം അടിവരയിടുന്ന തരത്തില്‍ തായ്വാനില്‍ നിന്നുള്ള നേതാക്കളും പരിപാടിയില്‍ പങ്കെടുത്തതായി റിപ്പോര്‍ട്ടുണ്ട്.

ഗുജറാത്തിലെ ധോലേര സ്‌പെഷ്യല്‍ ഇന്‍വെസ്റ്റ്മെന്റ് റീജിയണിലെ (ഡിഎസ്‌ഐആര്‍) സെമികണ്ടക്ടര്‍ ഫാബ്രിക്കേഷന്‍ ഫെസിലിറ്റി, അസമിലെ മോറിഗാവില്‍ ഔട്ട്സോഴ്സ്ഡ് സെമികണ്ടക്ടര്‍ അസംബ്ലി ആന്‍ഡ് ടെസ്റ്റ് (ഒസാറ്റ്) സൗകര്യം, ഗുജറാത്തിലെ സാനന്ദില്‍ മറ്റൊരു ഒസാറ്റ് സൗകര്യം എന്നീ പദ്ധതികള്‍ക്കാണ് പ്രധാനമന്ത്രി തറക്കല്ലിട്ടത്.

അര്‍ദ്ധചാലക രൂപകല്‍പന, നിര്‍മ്മാണം, സാങ്കേതിക വികസനം എന്നിവയുടെ ആഗോള കേന്ദ്രമായി ഇന്ത്യയെ പ്രതിഷ്ഠിക്കാനുള്ള ഇന്ത്യയുടെ ശ്രമത്തിന്റെ ഭാഗമാണിത്. രാജ്യത്തെ യുവജനങ്ങള്‍ക്ക് തൊഴിലവസരങ്ങള്‍ സൃഷ്ടിക്കാനും ഇത് ലക്ഷ്യമിടുന്നു.

ടാറ്റ ഇലക്ട്രോണിക്സ് പ്രൈവറ്റ് ലിമിറ്റഡും (ടിഇപിഎല്‍) തായ്വാനിലെ പവര്‍ചിപ്പ് സെമികണ്ടക്ടര്‍ മാനുഫാക്ചറിംഗ് കോര്‍പ്പറേഷനും (പിഎസ്എംസി) സംയുക്തമായി ധോലേരയില്‍ സെമികണ്ടക്ടര്‍ ഫാബ്രിക്കേഷന്‍ സൗകര്യം സ്ഥാപിക്കും. 91,000 കോടി രൂപയിലധികം നിക്ഷേപമുള്ളതായിരിക്കും ഈ സൗകര്യം. ഇന്ത്യയിലെ ആദ്യത്തെ വാണിജ്യ അര്‍ദ്ധചാലക ഫാബിനെ ഇത് അടയാളപ്പെടുത്തും. ഈ സംരംഭം നേരിട്ടും അല്ലാതെയും ഏകദേശം 20,000 വിദഗ്ധ തൊഴിലവസരങ്ങള്‍ സൃഷ്ടിക്കുമെന്ന് കണക്കാക്കപ്പെടുന്നു. പ്ലാന്റ് 2026 അവസാനത്തോടെ ചിപ്പ് ഉല്‍പ്പാദനം ആരംഭിക്കുമെന്ന് പ്രതീക്ഷിക്കുന്നു.

അസമിലെ മോറിഗാവിലാണ് ഔട്ട്സോഴ്സ്ഡ് സെമികണ്ടക്ടര്‍ അസംബ്ലി ആന്‍ഡ് ടെസ്റ്റ് സൗകര്യം സ്ഥാപിക്കുന്നത്. അര്‍ദ്ധചാലക അസംബ്ലി, ടെസ്റ്റിംഗ്, പാക്കേജിംഗ് (എടിഎംപി) എന്നിവയ്ക്കായുള്ള മോഡിഫൈഡ് സ്‌കീമിന് കീഴില്‍ ഏകദേശം 27,000 കോടി രൂപയുടെ നിക്ഷേപമാണ് ഈ സൗകര്യത്തിന് ഉണ്ടാവുക.

ഇന്ത്യയുടെ അര്‍ദ്ധചാലക ആവാസവ്യവസ്ഥയെ ശക്തിപ്പെടുത്തുന്നതിനും ഇലക്ട്രോണിക്‌സ്, ടെലികോം തുടങ്ങിയ അനുബന്ധ മേഖലകളില്‍ തൊഴിലവസരങ്ങള്‍ സൃഷ്ടിക്കുന്നതിനും ഈ സൗകര്യം സഹായിക്കും. 30,000-ലധികം ആളുകള്‍ക്ക് ഇവിടെ തൊഴിലവസരം ലഭിക്കുമെന്ന് കരുതുന്നു.

ഗുജറാത്തിലെ സാനന്ദിലുള്ള ഒസാറ്റ് സൗകര്യത്തിനായി 7500 കോടിയും നിക്ഷേപം ഉണ്ടാകും.