രാജ്യത്ത് ഏറ്റവും കൂടുതല്‍ കോളേജുകള്‍ ഉത്തര്‍പ്രദേശില്‍

ഇന്ത്യയില്‍ ഏറ്റവുമധികം കോളേജുകള്‍ ഉള്ളത് ഉത്തര്‍പ്രദേശിലാണെന്ന് റിപ്പോര്‍ട്ട്. കേന്ദ്രത്തിന്റെ ഉന്നത വിദ്യാഭ്യാസത്തിനായുള്ള ഓള്‍ ഇന്ത്യ സര്‍വേ (എഐഎസ്എച്ച്ഇ) 2021-22 പ്രകാരമുള്ള കണക്കാണിത്. തൊട്ടടുത്ത സ്ഥാനങ്ങളില്‍ മഹാരാഷ്ട്രയും കര്‍ണാടകയുമാണ്.വിദ്യാഭ്യാസ മന്ത്രാലയമാണ് എഐഎസ്എച്ച്ഇ സര്‍വേ പുറത്തുവിട്ടത്.

ഇന്ത്യയിലെ കോളേജുകളുടെ എണ്ണത്തില്‍ ഏറ്റവും മികച്ച 10 സംസ്ഥാനങ്ങളില്‍ രാജസ്ഥാന്‍, തമിഴ്നാട്, മധ്യപ്രദേശ്, ആന്ധ്രാപ്രദേശ്, ഗുജറാത്ത്, തെലങ്കാന, പശ്ചിമ ബംഗാള്‍ എന്നിവ ഉള്‍പ്പെടുന്നു. ഓരോന്നിനും ഒരു ലക്ഷം ജനസംഖ്യയില്‍ 30-ഓ അതിലധികമോ കോളേജുകള്‍ ഉണ്ട്.

സര്‍വേ റിപ്പോര്‍ട്ട് പ്രകാരം ഉത്തര്‍പ്രദേശില്‍ 8,375 കോളേജുകളാണുള്ളത്. മുന്‍വര്‍ഷം ഇത് 8,114 കോളേജുകളായിരുന്നു. ഒരു ലക്ഷം ജനസംഖ്യയ്ക്ക് 30 കോളേജുകളാണുള്ളത്.

അതുപോലെ, ഒരു ലക്ഷം ജനസംഖ്യയില്‍ ഏറ്റവും കൂടുതല്‍ കോളേജുകളുള്ളത് കര്‍ണാടകയിലാണ് (66), തെലങ്കാന (52), ആന്ധ്രാപ്രദേശ് (49), ഹിമാചല്‍ പ്രദേശ് (47), പുതുച്ചേരി (53), കേരളം (46) എന്നിങ്ങനെയാണ് കണക്കുകള്‍.

4,692 കോളേജുകളുമായി മഹാരാഷ്ട്ര രണ്ടാം സ്ഥാനത്താണ്. 4,430 കോളേജുകളുമായി കര്‍ണാടക മൂന്നാം സ്ഥാനത്തും 3,934 കോളേജുകളുമായി രാജസ്ഥാന്‍ നാലാം സ്ഥാനത്തുമാണ്. തമിഴ്‌നാട് 2,829 കോളേജുകളുമായി അഞ്ചാം സ്ഥാനത്താണ്. മധ്യപ്രദേശില്‍ 2,702 കോളേജുകളാണുള്ളത്.

സര്‍വേയില്‍ പങ്കെടുത്ത 42,825 കോളേജുകളില്‍ 60 ശതമാനത്തിലധികം പൊതുസ്വഭാവമുള്ളവയാണെന്നും 8.7 ശതമാനം കോളേജുകള്‍ വിദ്യാഭ്യാസത്തിലോ അധ്യാപക വിദ്യാഭ്യാസത്തിലോ സ്‌പെഷ്യലൈസ്ഡ് ആണെന്നും 6.1 ശതമാനം കോളേജുകള്‍ എഞ്ചിനീയറിംഗ്, ടെക്‌നോളജി സ്ഥാപനങ്ങളാണെന്നും സര്‍വേ റിപ്പോര്‍ട്ട് ചൂണ്ടിക്കാട്ടി. 4.3 ശതമാനം നഴ്‌സിംഗ് കോളേജുകളും 3.5 ശതമാനം മെഡിക്കല്‍ കോളേജുകളുമുണ്ട്.

2.7 ശതമാനം കോളേജുകള്‍ ആര്‍ട്സ് കോഴ്സുകള്‍ വാഗ്ദാനം ചെയ്യുമ്പോള്‍, 2.4 ശതമാനം ഫാര്‍മസി കോഴ്സുകള്‍ക്കും 0.7 ശതമാനം സയന്‍സ് കോളേജുകള്‍ക്കും 1.4 ശതമാനം സംസ്‌കൃത കോളേജുകളുമുണ്ട്.

ജില്ലകളില്‍, ബെംഗളൂരു അര്‍ബന്‍ ജില്ലയിലാണ് ഏറ്റവും കൂടുതല്‍ കോളേജുകളുള്ളത് (1,106). ജയ്പൂര്‍ (703), ഹൈദരാബാദ് (491), പൂനെ (475), പ്രയാഗ്രാജ് (398), രംഗറെഡ്ഡി (349), ഭോപ്പാല്‍ (344), ഗാസിപൂര്‍ (333) ), സിക്കാര്‍ (330), നാഗ്പൂര്‍ (326) തുടങ്ങിയവയാണ് തൊട്ടുപിന്നില്‍.