ഇവി പ്രൊമോഷന്‍ സ്‌കീമുകളെ പ്രശംസിച്ച് സിയാം

ഇലക്ട്രിക് വെഹിക്കിള്‍ പ്രൊമോഷന്‍ സ്‌കീമുകളെ പ്രശംസിച്ച് വാഹന വ്യവസായ സംഘടനയായ സിയാം. ഇവികള്‍ പ്രോത്സാഹിപ്പിക്കുന്നതിനായി 14,335 കോടി രൂപയുടെ രണ്ട് പദ്ധതികള്‍ക്ക് അംഗീകാരം നല്‍കാനുള്ള സര്‍ക്കാരിന്റെ തീരുമാനത്തെപ്പറ്റി പ്രതികരിക്കുകയായിരുന്നു സംഘടന. ഈ നയം ക്ലീനും ഹരിതവുമായ ഗതാഗതം എല്ലാവര്‍ക്കും പ്രാപ്യമാക്കുമെന്നും അവര്‍ കൂട്ടിച്ചേര്‍ത്തു.

രണ്ട് വര്‍ഷത്തിനുള്ളില്‍ 10,900 കോടി രൂപ മുതല്‍മുടക്കുന്ന പിഎം ഇലക്ട്രിക് ഡ്രൈവ് റെവല്യൂഷന്‍ ഇന്‍ ഇന്നൊവേറ്റീവ് വെഹിക്കിള്‍ എന്‍ഹാന്‍സ്മെന്റ് (പിഎം ഇ-ഡ്രൈവ്) പദ്ധതി, 3,435 കോടിയുടെ പിഎം-ഇബസ് സേവ-പേയ്മെന്റ് സെക്യൂരിറ്റി മെക്കാനിസം (പിഎസ്എം) എന്നീ രണ്ട് പദ്ധതികള്‍ക്ക് കേന്ദ്ര മന്ത്രിസഭ ബുധനാഴ്ച അംഗീകാരം നല്‍കിയിരുന്നു.

പ്രഖ്യാപനത്തോട് പ്രതികരിച്ച് സൊസൈറ്റി ഓഫ് ഇന്ത്യന്‍ ഓട്ടോമൊബൈല്‍ മാനുഫാക്ചറേഴ്സ് (സിയാം) പ്രസിഡന്റ് ശൈലേഷ് ചന്ദ്ര ഈ നീക്കത്തെ 'സുസ്ഥിര മൊബിലിറ്റി പ്രോത്സാഹിപ്പിക്കുന്നതിനുള്ള ഉറച്ച പ്രതിബദ്ധത അടിവരയിടുന്ന ചുവടുവെപ്പ്' എന്ന് വിശേഷിപ്പിച്ചു.

ഈ സംരംഭം, ഇലക്ട്രിക് മൊബിലിറ്റിയിലേക്കുള്ള ഇന്ത്യയുടെ മാറ്റത്തിന് സര്‍ക്കാരിന്റെ പിന്തുണയെ പ്രതിഫലിപ്പിക്കുന്നതായും ഈ മേഖലയിലെ നവീകരണവും നിക്ഷേപവും പ്രോത്സാഹിപ്പിക്കുന്നുവെന്നും ചന്ദ്ര കൂട്ടിച്ചേര്‍ത്തു.

ഹരിത ഭാവിക്കായുള്ള രാജ്യത്തിന്റെ ലക്ഷ്യങ്ങളുമായി ഞങ്ങളുടെ ശ്രമങ്ങളെ വിന്യസിച്ചുകൊണ്ട് ഇവി സാങ്കേതികവിദ്യയിലും അടിസ്ഥാന സൗകര്യങ്ങളിലും പുരോഗതി ഉറപ്പാക്കുന്നതിന് സര്‍ക്കാരുമായി സഹകരിച്ച് പ്രവര്‍ത്തിക്കുന്നത് തുടരാന്‍ ഓട്ടോമോട്ടീവ് വ്യവസായം തയ്യാറാണ്, ചന്ദ്ര അഭിപ്രായപ്പെട്ടു.

ആഗോള മാറ്റത്തെ നയിക്കുന്നതില്‍ ഇന്ത്യയുടെ നേതൃത്വത്തെ ഈ നയം ശക്തിപ്പെടുത്തുമെന്ന് ജെബിഎം ഓട്ടോ ലിമിറ്റഡ് വൈസ് ചെയര്‍മാനും മാനേജിംഗ് ഡയറക്ടറുമായ നിശാന്ത് ആര്യ പറഞ്ഞു.

'ഇന്ത്യയെ ലോകത്തിന്റെ ഇവി തലസ്ഥാനമാക്കി മാറ്റുന്നതിനുള്ള സുപ്രധാന പ്രഖ്യാപനമാണിത്, കൂടാതെ ഇന്ത്യയുടെ നെറ്റ്-സീറോ 2070 ലക്ഷ്യങ്ങള്‍ സാക്ഷാത്കരിക്കുന്നതില്‍ വാഹന മേഖല നിര്‍ണായക പങ്ക് വഹിക്കുന്നു,' അദ്ദേഹം പറഞ്ഞു.