Login 
പഠിക്കാം & സമ്പാദിക്കാം 
Home
18 Dec 2024 4:12 AM GMT
Summary
- ലയനം ഏറ്റവും വലിയ കാര്‍ നിര്‍മാതാക്കളായ ടൊയോട്ടയെ നേരിടാനെന്ന് സൂചന
- പുതിയ ഹോള്‍ഡിംഗ് കമ്പനിയുടെ സൃഷ്ടിയാണ് പരിഗണിക്കുന്ന ഒരു ഓപ്ഷന്‍
- ടെസ്ല, ചൈനീസ് വാഹന നിര്‍മ്മാതാക്കള്‍ എന്നിവര്‍ക്കെതിരെ മത്സരിക്കാനും ലയനം അനിവാര്യം
ഏറ്റവും വലിയ കാര്‍ നിര്‍മാതാക്കളായ ടൊയോട്ടയെ നേരിടാന്‍ ഹോണ്ട മോട്ടോര്‍ കമ്പനിയും നിസ്സാന്‍ മോട്ടോര്‍ കമ്പനിയും ലയനം പരിഗണിക്കുന്നതായി റിപ്പോര്‍ട്ട്.
ലയനം, മൂലധന ബന്ധം അല്ലെങ്കില്‍ ഒരു ഹോള്‍ഡിംഗ് കമ്പനി സ്ഥാപിക്കല്‍ എന്നിവയുള്‍പ്പെടെ നിരവധി ഓപ്ഷനുകള്‍ ഹോണ്ട പരിഗണിക്കുന്നുണ്ടെന്ന് എക്സിക്യൂട്ടീവ് വൈസ് പ്രസിഡന്റ് ഷിന്‍ജി സൂചിപ്പിക്കുന്നു.
ചര്‍ച്ചകള്‍ തീര്‍ത്തും സ്വകാര്യമാണ്. ഒരു പുതിയ ഹോള്‍ഡിംഗ് കമ്പനിയുടെ സൃഷ്ടിയാണ് പരിഗണിക്കുന്ന ഒരു ഓപ്ഷന്‍. അതിന് കീഴില്‍ സംയുക്ത ബിസിനസുകള്‍ പ്രവര്‍ത്തിക്കുമെന്ന് വിഷയത്തെക്കുറിച്ച് അറിയാവുന്ന ഉദ്യോഗസ്ഥന്‍ പറയുന്നു. നിസ്സാനുമായി ഇതിനകം മൂലധന ബന്ധമുള്ള മിത്സുബിഷി മോട്ടോഴ്സ് കോര്‍പ്പറേഷനെ ഉള്‍പ്പെടുത്തി ഇടപാട് വിപുലീകരിക്കാന്‍ കഴിയുമെന്നും അദ്ദേഹം കൂട്ടിച്ചേര്‍ത്തു.
അതേസമയം ചര്‍ച്ചകള്‍ പ്രാരംഭ ഘട്ടത്തിലാണെന്നും അത് ധാരണയിലേക്ക് നയിച്ചേക്കില്ലെന്നും മറ്റ്ചിലര്‍ കരുതുന്നു.
കരാര്‍ സാധ്യമായാല്‍ അത് ജാപ്പനീസ് വാഹന വ്യവസായത്തെ രണ്ട് പ്രധാന ക്യാമ്പുകളായി ഏകീകരിക്കും. ഒന്ന് ഹോണ്ട, നിസ്സാന്‍, മിത്സുബിഷി എന്നിവ നിയന്ത്രിക്കും. ടൊയോട്ട ഗ്രൂപ്പ് കമ്പനികള്‍ അടങ്ങിയതാണ് മറ്റൊന്ന്.
മറ്റ് കാര്‍ നിര്‍മ്മാതാക്കളുമായുള്ള ദീര്‍ഘകാല പങ്കാളിത്തം വെട്ടിക്കുറച്ചതിന് ശേഷം ആഗോളതലത്തില്‍ വലിയ സമപ്രായക്കാരുമായി മത്സരിക്കാന്‍ ഇത് അവര്‍ക്ക് കൂടുതല്‍ വിഭവങ്ങള്‍ നല്‍കും. ഫ്രാന്‍സിന്റെ റെനോ എസ്എയുമായുള്ള ബന്ധം നിസ്സാന്‍ ഒഴിവാക്കിയിട്ടുണ്ട്. ജനറല്‍ മോട്ടോഴ്സ് കമ്പനിയുമായുള്ള സഹകരണത്തില്‍നിന്നും ഹോണ്ടയും പിന്മാറി.
ഇലക്ട്രിക് വാഹന ബാറ്ററികളിലും സോഫ്റ്റ്വെയറിലും ഒരുമിച്ച് പ്രവര്‍ത്തിക്കാനുള്ള ഇരു കമ്പനികളും ഈ വര്‍ഷം ആദ്യം എടുത്ത തീരുമാനത്തെ തുടര്‍ന്നാണ് ലയനത്തിലേക്കുള്ള നീക്കം. ആ സമയത്ത്, ഹോണ്ട ചീഫ് എക്സിക്യൂട്ടീവ് ഓഫീസര്‍ തോഷിഹിറോ മിബ് നിസ്സാനുമായി ഒരു മൂലധന ബന്ധത്തിന്റെ സാധ്യതകള്‍ ചര്‍ച്ച ചെയ്തിരുന്നു.
'ലയനം യാഥാര്‍ത്ഥ്യമാകുകയാണെങ്കില്‍, അത് നിസാന്റെ സാമ്പത്തിക പ്രതിസന്ധികള്‍ക്ക് ഹ്രസ്വകാല ആശ്വാസം നല്‍കും,' ബ്ലൂംബെര്‍ഗ് ഇന്റലിജന്‍സ് സീനിയര്‍ ഓട്ടോ അനലിസ്റ്റ് ടാറ്റ്‌സുവോ യോഷിദ പറഞ്ഞു.
ടെസ്ല, ചൈനീസ് വാഹന നിര്‍മ്മാതാക്കള്‍ തുടങ്ങിയ ഇലക്ട്രിക് വാഹനങ്ങളിലെ എതിരാളികളോട് മത്സരിക്കാന്‍ നിര്‍മ്മാതാക്കളെ ലയനം സഹായിക്കും.
ചില തരത്തില്‍, ജപ്പാനിലെ ദുര്‍ബലരായ കമ്പനികള്‍ക്കിടയില്‍ ഒരു പ്രതിരോധ ലയനമായി ഇതിനെ കാണാം. ഹോണ്ടയും നിസ്സാനും മിത്സുബിഷിയും ചേര്‍ന്ന് വര്‍ഷത്തിലെ ആദ്യ ആറ് മാസങ്ങളില്‍ ആഗോളതലത്തില്‍ ഏകദേശം 4 ദശലക്ഷം വാഹനങ്ങള്‍ വിറ്റു. അതേസമയം ടൊയോട്ട വില്‍പ്പന നടത്തിയത് 5.2 ദശലക്ഷം വാഹനങ്ങളാണ്. ലോകത്തെ ഏറ്റവും വലിയ വാഹന നിര്‍മ്മാതാക്കളായ ടൊയോട്ടയെ സ്വദേശത്തും വിദേശത്തും തടയാന്‍ ഇരു കമ്പനികളെയും ഒരു ലയനം സഹായിച്ചേക്കും.
