ഒറ്റ ചാർജിൽ 460 കി.മീ, എംജിയുടെ പുതിയ ഇവി, വില 21.99 ലക്ഷം മുതൽ

എംജി മോട്ടോർ ഇന്ത്യ 2022 ഇസഡ്എസ് ഇവി ഇന്ത്യയിൽ അവതരിപ്പിച്ചു. 2020-ൽ ആദ്യമായി അവതരിപ്പിച്ച ഇസഡ്എസ് ഇവി കമ്പനിയുടെ രാജ്യത്തെ ആദ്യത്തെ ഇലക്ട്രിക് എസ്‌യുവിയായിരുന്നു. ഇപ്പോൾ ഒട്ടെറെ പുതുമകളോടെയാണ് പുതിയ മോഡൽ നിരത്തിലിറക്കിയിരിക്കുന്നത്.പഴയ ഫീച്ചറുകൾ ഏറെക്കുറെ അതേപടി നിലനിൽക്കുമെങ്കിലും കാറിന്റെ രൂപഭാവത്തിൽ ഒട്ടേറെ മാറ്റങ്ങൾ വരുത്തിയിട്ടുണ്ട്. രണ്ട് വകഭേദങ്ങളാണ് ഇപ്പോൾ പുറത്തിറക്കിയിരിക്കുന്നത്. എക്സൈറ്റ്, എക്സ്ക്ലൂസീവ്. ഇസഡ്എസ് ഇവി യുടെ വിലകൾ : 21.99 ലക്ഷം രൂപ (എക്‌സൈറ്റ്) മുതൽ എക്‌സ്‌ക്ലൂസീവ് വേരിയന്റിന് 25.88 ലക്ഷം രൂപ വരെയാണ്. കാറിന്റെ എക്‌സൈറ്റ് വേരിയന്റ് ഈ വർഷം ജൂലൈ മുതൽ ലഭ്യമാകുമെന്ന് കമ്പനി അറിയിച്ചു. അതേസമയം എക്‌സ്‌ക്ലൂസീവ് വേരിയന്റ് ഇപ്പോൾ ലഭ്യമാണ്. മുമ്പ്, ഇസഡ്എസ് ഇവി ഇന്ത്യയിൽ അവതരിപ്പിച്ചത് 19.88 ലക്ഷം രൂപ മുതലാണ്. ഹ്യൂണ്ടായ് കോനയും ഇതേ സമയത്താണ് ലോഞ്ച് ചെയ്തത് എന്നതിനാൽ ശക്തമായ മത്സരമായിരുന്നു.

ഇസഡ്എസ് ഇവി എക്സ്റ്റീരിയർ

2022 ഇസഡ്എസ് ഇവി യുടെ പുറംഭാഗത്ത് ശ്രദ്ധേയമായ മാറ്റങ്ങളുണ്ട്. ആഴത്തിലുള്ള കോൺകേവ് ലേഔട്ടിന് പകരം ഒരു അടച്ച ഗ്രില്ലാണ് വച്ചിരിക്കുന്നത്. അതേസമയം ചാർജിംഗ് സോക്കറ്റ് എംജി ലോഗോയുടെ ഇടതുവശത്തേക്ക് നീക്കിയിരിക്കുന്നു. മുൻവശത്തെ ബമ്പറിന് ഭംഗിയുള്ള ഡിസൈനും വീതിയേറിയ സെൻട്രൽ എയർ ഡാമും നൽകി രണ്ടറ്റത്തും ലംബമായ ഇൻടേക്കുകളോടെ പുനർരൂപകൽപ്പന ചെയ്തിട്ടുണ്ട്. 17 ഇഞ്ച് അലോയ് വീലുകളാണ് ഇതിനുള്ളത്. അതേസമയം പിന്നിൽ ഒരു പുതിയ ടെയിൽ-ലൈറ്റ് ഡിസൈനും പുതുക്കിയ ബമ്പറുകളും നൽകിയിരിക്കുന്നു. എൽഇഡി ഡിആർഎല്ലുകൾ, എൽഇഡി ടെയിൽലൈറ്റുകൾ, റൂഫ് റെയിലുകൾ, റിയർ സ്‌പോയിലർ, സൈഡ് ഇൻഡിക്കേറ്ററുകളോട് കൂടിയ ഒആർവിഎം എന്നിവയുള്ള ലണ്ടൻ-ഐ പ്രൊജക്ടർ ഹെഡ്‌ലാമ്പുകൾ എന്നിവ പഴയത് പോലെ തന്നെ നിലനിർത്തിയിട്ടുണ്ട്.

ഇസഡ്എസ് ഇവി ഇന്റീരിയർ

കാബിൻറെ പുതുമ നിലനിർത്തുന്ന ഒട്ടേറെ മാറ്റങ്ങളാണ് ഇൻറീരിയറിൽ വരുത്തിയിരിക്കുന്നത്. പിൻ സീറ്റുകൾക്കുള്ള സെന്റർ ആംറെസ്റ്റ്, വ്യക്തിഗത കപ്പ് ഹോൾഡറുകൾ, സെന്റർ ഹെഡ്‌റെസ്റ്റ്, പിൻ എസി വെന്റുകൾ എന്നിവയും പുതിയ ഫീച്ചറുകളാണ്.

പവർട്രെയിൻ

50.3 kWh ബാറ്ററി പായ്ക്കാണ് നൽകിയിരിക്കുന്നത്. ഒറ്റ ചാർജിൽ ഇതിന് 461 കിലോമീറ്റർ ലഭിക്കും. 0-100 കിലോമീറ്റർ വേഗതയിലേക്ക് വെറും 8.5 സെക്കൻഡിൽ എത്താൻ കഴിയും.

സവിശേഷതകൾ

പഴയ 8 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റത്തിന് പകരമായി 2022 എംജി ഇസഡ്എസ് ഇവിക്ക് പുതിയ 10.1 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റമാണ്. ഈ സെഗ്‌മെൻറിലെ ആദ്യത്തെ ആൻഡ്രോയിഡ് ഓട്ടോയും ആപ്പിൾ കാർപ്ലേ കണക്റ്റിവിറ്റിയും പ്രത്യേകതകളാണ്. പനോരമിക് സൺറൂഫ്, പവർഡ് ഡ്രൈവർ സീറ്റ്, വൈപ്പറുകളോട് കൂടിയ ഓട്ടോമാറ്റിക് ഹെഡ്‌ലാമ്പുകൾ, കണക്‌റ്റ് ചെയ്‌ത കാർ സാങ്കേതികവിദ്യ, ആറ് എയർബാഗുകൾ, ഹിൽ സ്റ്റാർട്ട്/ഡിസെന്റ് കൺട്രോൾ, ഇലക്ട്രോണിക് സ്റ്റെബിലിറ്റി കൺട്രോൾ എന്നിവയും ഇതിലുണ്ട്.