ഇന്ത്യയും യുഎസും വ്യാപാര കരാറിനായി കൈകോര്‍ക്കും

ഇന്ത്യയും യുഎസും ഏതാനും മാസങ്ങള്‍ക്കുള്ളില്‍ ഒരു പ്രധാന വ്യാപാര നീക്കത്തിനായി കൈകോര്‍ക്കുമെന്ന് വാണിജ്യ വ്യവസായ മന്ത്രി പീയൂഷ് ഗോയല്‍. ഇന്ത്യയും യുഎസും ഉഭയകക്ഷി വ്യാപാരം 500 ബില്യണ്‍ ഡോളറായി ഉയര്‍ത്തും. അടുത്ത 6-8 മാസത്തിനുള്ളില്‍ ഒരു വ്യാപാര കരാറിനായി ചര്‍ച്ചകള്‍ നടത്താനും ഇരുരാജ്യങ്ങളും പ്രതിജ്ഞാബദ്ധരാണെന്നും മന്ത്രിയെ ഉദ്ധരിച്ച് പെിടിഐ റിപ്പോര്‍ട്ട് ചെയ്തു.

പ്രധാനമന്ത്രി നരേന്ദ്ര മോദിയുടെ യുഎസ് സന്ദര്‍ശനവേളയിലാണ് ഇരു രാജ്യങ്ങളും തമ്മിലുള്ള ഉഭയകക്ഷി വ്യാപാരം ഇരട്ടിയിലധികം വര്‍ദ്ധിപ്പിക്കാനുള്ള ഒരു പദ്ധതി പ്രഖ്യാപിക്കപ്പെട്ടത്.

2025 അവസാനത്തോടെ പരസ്പര പ്രയോജനകരമായ, ബഹുമേഖലാ ഉഭയകക്ഷി വ്യാപാര കരാറിന്റെ (ബിടിഎ) പ്രാരംഭ ഘട്ടത്തെക്കുറിച്ചുള്ള ചര്‍ച്ചകള്‍ ആരംഭിക്കാനും മോദിയും ട്രംപും സമ്മതിച്ചു. വരാനിരിക്കുന്ന കരാറിനെക്കുറിച്ച് ഇരു രാജ്യങ്ങളിലെയും ബിസിനസുകള്‍ ആവേശഭരിതരാണെന്ന് ഗോയല്‍ അഭിപ്രായപ്പെട്ടു.

സാധാരണയായി, ഒരു സ്വതന്ത്ര വ്യാപാര കരാറില്‍, രണ്ട് പങ്കാളികളും തമ്മില്‍ കൈമാറ്റം ചെയ്യപ്പെടുന്ന ഭൂരിഭാഗം സാധനങ്ങളുടെയും കസ്റ്റംസ് തീരുവ ഇല്ലാതാക്കുകയോ ഗണ്യമായി കുറയ്ക്കുകയോ ചെയ്യും.

2023-ല്‍, യുഎസും ഇന്ത്യയും തമ്മിലുള്ള ചരക്കുകളുടെയും സേവനങ്ങളുടെയും ഉഭയകക്ഷി വ്യാപാരം ആകെ 190.08 ബില്യണ്‍ യുഎസ് ഡോളറായിരുന്നു, അതില്‍ 123.89 ബില്യണ്‍ യുഎസ് ഡോളറിന്റെ ചരക്കുകളും 66.19 ബില്യണ്‍ ഡോളറിന്റെ സേവനങ്ങളും ഉള്‍പ്പെടുന്നു.

ആ വര്‍ഷം, യുഎസിലേക്കുള്ള ഇന്ത്യയുടെ ചരക്ക് കയറ്റുമതി 83.77 ബില്യണ്‍ യുഎസ് ഡോളറിലെത്തി, അതേസമയം ഇറക്കുമതി ആകെ 40.12 ബില്യണ്‍ യുഎസ് ഡോളറായിരുന്നു. അതിന്റെ ഫലമായി ഇന്ത്യയ്ക്ക് 43.65 ബില്യണ്‍ യുഎസ് ഡോളറിന്റെ വ്യാപാര മിച്ചമുണ്ടായി.

2023-ല്‍ യുഎസിലേക്കുള്ള ഇന്ത്യന്‍ സേവന കയറ്റുമതി 36.33 ബില്യണ്‍ യുഎസ് ഡോളറായിരുന്നു, അതേസമയം ഇറക്കുമതി 29.86 ബില്യണ്‍ യുഎസ് ഡോളറായിരുന്നു, ഇത് ന്യൂഡല്‍ഹിക്ക് 6.47 ബില്യണ്‍ യുഎസ് ഡോളറിന്റെ വ്യാപാര മിച്ചത്തിലേക്ക് നയിച്ചു.

2021 മുതല്‍ 2024 വരെ, ഇന്ത്യയുടെ ഏറ്റവും വലിയ വ്യാപാര പങ്കാളി എന്ന പദവി യുഎസ് വഹിച്ചു. ഇന്ത്യ വ്യാപാര മിച്ചം നിലനിര്‍ത്തുന്ന ചുരുക്കം ചില രാജ്യങ്ങളില്‍ ഒന്നാണ് യുഎസ്.