ശാസ്ത്ര സാങ്കേതികവിദ്യ, ആരോഗ്യം എന്നീ മേഖലകളിൽ സഹകരണത്തിന് ചർച്ചകൾ നടത്തി ഇന്ത്യയും കാനഡയും

ഇന്ത്യയും കാനഡയും ശാസ്ത്രം, സാങ്കേതികവിദ്യ, ആരോഗ്യ രംഗം എന്നീ മേഖലകളിൽ സഹകരണത്തെ കുറിച്ചും സാധ്യതകളെ കുറിച്ചും ചർച്ച നടത്തി. ഇലക്ട്രിക് വാഹനങ്ങൾ, സൈബർ ഫിസിക്കൽ സംവിധാനങ്ങൾ, ക്വാണ്ടം ടെക്നോളജികൾ, ഗ്രീൻ ഹൈഡ്രജൻ ഇന്ധനം, ആഴക്കടൽ ഖനനം എന്നിവയുൾപ്പെടെ നിരവധി മേഖലകളിൽ ഇരു രാജ്യങ്ങളും സഹകരിക്കാനാണ് തീരുമാനിച്ചിരിക്കുന്നത്.

കാനഡയിലെ സസ്കാച്ചെവൻ പ്രവിശ്യയുടെ പ്രധാനമന്ത്രിയായ സ്കോട്ട് മോയുടെ നേതൃത്വത്തിലുള്ള ഉന്നതതല സംഘം ഇന്ത്യയുടെ ശാസ്ത്ര-സാങ്കേതിക മന്ത്രി ജിതേന്ദ്ര സിംഗുമായി കൂടിക്കാഴ്ച നടത്തി. ക്ലീന്‍ സയന്‍സ് ടെക്‌നോളജി, ജൈവസമ്പദ്ഘടന, വിവിധ ആവശ്യങ്ങൾക്കുള്ള ജൈവ അടിസ്ഥാന വസ്തുക്കൾ, ഭക്ഷ്യ-കാർഷിക സാങ്കേതികവിദ്യകൾ, മരുന്നുകൾ ഉൾപ്പെടെയുള്ള താങ്ങാനാവുന്ന ആരോഗ്യപരിപാലനം, ബയോമെഡിക്കൽ ഉപകരണങ്ങൾ എന്നിവയുൾപ്പെടെ നിരവധി മേഖലകളിലെ പങ്കാളിത്തങ്ങളെക്കുറിച്ചാണ് ഇരുപക്ഷവും ചർച്ച ചെയ്തത്.

കഴിഞ്ഞ വർഷം ജി20 അധ്യക്ഷത വഹിച്ചപ്പോൾ ഇന്ത്യ ആരംഭിച്ച 'ഗ്ലോബൽ ബയോഫ്യൂൽസ് അലയൻസ്' (GBA) എന്ന പദ്ധതിയിലും ഇന്ത്യയും കാനഡയും സഹകരിക്കുമെന്ന് ജിതേന്ദ്ര സിംഗ് വ്യക്തമാക്കി. ഈ പദ്ധതി ബയോ ഇന്ധനങ്ങളുടെ വികസനവും വിന്യാസവും പ്രോത്സാഹിപ്പിക്കുന്നതിന് ലക്ഷ്യമിടുന്നു.

23 ലക്ഷത്തോളം വരുന്ന ഇന്ത്യൻ സമൂഹം ഇന്ത്യ-കാനഡ ബന്ധത്തെ ശക്തിപ്പെടുത്തുകയും ഇരു രാജ്യങ്ങളുടെയും വികസനത്തിന് സംഭാവന നൽകുകയും ചെയ്യുന്നുവെന്ന് സിംഗ് പറഞ്ഞു. ഡൽഹിയിൽ ഓഫീസ് തുറന്നതോടെ ഇന്ത്യയ്ക്കും സസ്കാച്ചെവനും ഇടയിലുള്ള ബന്ധം ശക്തിപ്പെട്ടതായി മോയ് പറഞ്ഞു. ഇന്ത്യയുമായി സഹകരിച്ച് പരസ്പര പുരോഗതി നേടാൻ ഇത് തങ്ങളുടെ ദൃഢനിശ്ചയത്തെ ശക്തിപ്പെടുത്തുന്നു. ഇരു രാജ്യങ്ങളുടെയും അക്കാദമികൾ, ഗവേഷണ സ്ഥാപനങ്ങൾ, വ്യവസായങ്ങൾ തമ്മിലുള്ള ശക്തമായ ബന്ധം "സ്ട്രാറ്റജിക് ഗവേഷണ വികസന പങ്കാളിത്തങ്ങളിൽ നിർണായക പങ്കു വഹിക്കുന്നു" എന്നും അദ്ദേഹം കൂട്ടിച്ചേർത്തു.