കേരളത്തില്‍ സള്‍ഫ്യൂറിക് ആസിഡ് പ്ലാന്റ് സ്ഥാപിക്കുന്നു

ഖത്തര്‍ ആസ്ഥാനമായുള്ള മലയാളി സംഭകരുടെ കമ്പനി ആയ BIEWU International, കേരളത്തില്‍ 1200 ടിപിഡി സള്‍ഫ്യൂറിക് ആസിഡ് പ്ലാന്റ് സ്ഥാപിക്കുന്നു. ഇതിനുള്ള ധാരണ പത്രം കൊച്ചിയില്‍ വച്ചു നടന്ന ഇന്‍വെസ്റ്റ് കേരളയില്‍ വച്ചു വ്യവസായ മന്ത്രി പി രാജീവിന് കൈമാറി.

രാസവസ്തുക്കളും എണ്ണ-വാതക മേഖലയിലും പ്രവര്‍ത്തിച്ചുവരുന്ന അന്താരാഷ്ട്ര സ്ഥാപനമാണിത്. നിരവധി രാജ്യങ്ങളിലേക്ക് കമ്പനി തങ്ങളുടെ പ്രവര്‍ത്തനം വ്യാപിപ്പിച്ചിട്ടുണ്ട്. ഈ പ്രയത്നത്തിന്റെ ഭാഗമായാണ് കേരള സര്‍ക്കാരുമായി ധാരണാപത്രം ഒപ്പുവച്ചത്.

കൊച്ചിലെ അമ്പലമേടില്‍ 1200 ടണ്‍ പ്രതിദിനം (ടിപിഡി) ശേഷിയുള്ള സള്‍ഫ്യൂറിക് ആസിഡ് പ്ലാന്റ് സ്ഥാപിക്കാനാണ് പദ്ധതിയിടുന്നത്.

ഈ പദ്ധതിക്കായി ആകെ നിക്ഷേപം 800 കോടി രൂപ വരും. ഈ പദ്ധതിയിലൂടെ കേരളത്തിന്റെ വ്യവസായ വികസനത്തിനും തൊഴിലവസരങ്ങള്‍ സൃഷ്ടിക്കുന്നതിനും വലിയ പ്രയോജനം ഉണ്ടാക്കാനാകുമെന്ന്് കമ്പനി സി ഇ ഒ റിയാസ് ആദവും, ടെക്‌നിക്കല്‍ ഡയറക്ടര്‍ സലിം മുല്ലപ്പിള്ളിയും അറിയിച്ചു.

വലിയതോതിലുള്ള വ്യവസായ യൂണിറ്റുകള്‍ നടത്തുന്നതില്‍ പരിചയമുള്ള തങ്ങളുടെ കമ്പനി സുസ്ഥിരമായ വ്യവസായ മോഡലുകളും അത്യാധുനിക സാങ്കേതികവിദ്യകളിലൂടെയാണ് പ്രവര്‍ത്തിക്കുന്നതെന്നും ഇരുവരും പറഞ്ഞു.

കൊച്ചിയിലെ വ്യവസായ സാധ്യതകള്‍ വിശദമായി വിലയിരുത്തിയതിന്റെ അടിസ്ഥാനത്തില്‍, ഈ പദ്ധതിയിലൂടെ കേരളത്തിന്റെ ദീര്‍ഘകാല വ്യവസായ ലക്ഷ്യങ്ങള്‍ കൈവരിക്കാനാകുമെന്ന് ഇരുവരും ആത്മവിശ്വാസം പുലര്‍ത്തി.

ഈ പദ്ധതിയിലൂടെ നേരിട്ടും പരോക്ഷമായും 600 തൊഴിലവസരങ്ങള്‍ സൃഷ്ടിക്കപ്പെടും.

ഈ പദ്ധതിക്ക് കേരള സര്‍ക്കാര്‍ പിന്തുണ പ്രഖ്യാപിച്ചു കഴിഞ്ഞു. ഈ പദ്ധതിയുടെ സമയബന്ധിത അനുമതി ലഭ്യമാക്കാനും വിജയകരമായി നടപ്പിലാക്കാനും, കേരള സര്‍ക്കാരും ബന്ധപ്പെട്ട അതോറിറ്റികളും സഹകരിക്കുമെന്ന് വ്യവസായ മന്ത്രി പി. രാജീവ് അറിയിച്ചിട്ടുണ്ട്.

ഇന്ത്യയില്‍ ഇപ്പോള്‍ സള്‍ഫ്യൂറിക് ആസിഡ് ഇറക്കുമതി ചെയ്യേണ്ട സാഹചര്യം നിലവിലുണ്ട്. ഈ പദ്ധതിയിലൂടെ രാജ്യത്തിനകത്ത് ഉല്‍പാദനം വര്‍ദ്ധിപ്പിക്കാനും ഈ പ്ലാന്റ് സഹായിക്കും. വ്യവസായ വകുപ്പിന് വേണ്ടി പ്രിന്‍സിപ്പല്‍ സെക്രട്ടറി മുഹമ്മദ് ഹനീഷും പൂര്‍ണ പിന്തുണ നല്‍കുമെന്ന് ഉറപ്പു നല്‍കി.