Login 
പഠിക്കാം & സമ്പാദിക്കാം 
Home
29 Feb 2024 11:49 AM IST
ക്ഷീരകര്‍ഷകര്‍ക്ക് പാല്‍പുഞ്ചിരി; മാര്‍ച്ചില്‍ ലിറ്ററിന് 10 രൂപ അധിക വില നല്‍കാന്‍ മില്‍മ
MyFin Desk
Summary
- ഫെബ്രുവരിയിലും ഒരു ലിറ്റര്‍ സംഭരിക്കുന്നതിന് ഏഴ് രൂപ വര്‍ധിപ്പിച്ചരുന്നു
- എറണാകുളം മേഖലാ യൂണിയന്‍ സംഘങ്ങളില്‍ നിന്നും ശേഖരിക്കുന്ന പാലിനാണ് അധിക വില നല്‍കുക.
- നാല് ജില്ലകളിലെ ക്ഷീരകര്‍ഷകര്‍ക്കും സംഘങ്ങള്‍ക്കും പ്രയോജനം
മില്‍മ എറണാകുളം മേഖലാ യൂണിയന്‍ മാര്‍ച്ച് മാസം പാലിന് 10 രൂപ അധികവില നല്‍കും. മില്‍മ എറണാകുളം മേഖലാ യൂണിയന്‍ സംഘങ്ങളില്‍ നിന്നും സംഭരിക്കുന്ന ഓരോ ലിറ്റര്‍ പാലിനും 10 രൂപ വീതം പ്രോത്സാഹന വിലയായി അധികം നല്‍കുന്നതിന് ഭരണസമിതി യോഗം തീരുമാനിച്ചതായി ചെയര്‍മാന്‍ എം ടി ജയന്‍ അറിയിച്ചു. മാര്‍ച്ച് ഒന്ന് മുതല്‍ 31 വരെ വരെയാണ് പ്രോത്സാഹന അധിക വില പ്രഖ്യാപിച്ചിരിക്കുന്നത്. എറണാകുളം, തൃശൂര്‍, കോട്ടയം, ഇടുക്കി ജില്ലകളിലെ 1000 ല്‍പരം വരുന്ന പ്രാഥമിക ക്ഷീരസംഘങ്ങളില്‍ പാല്‍ അളക്കുന്ന കര്‍ഷകര്‍ക്കും, സംഘങ്ങള്‍ക്കുമാണ് ഇതിന്റെ പ്രയോജനം ലഭിക്കുക.
ഫെബ്രുവരി ഒന്നു മുതല്‍ സംഭരിക്കുന്ന ഓരോ ലിറ്റര്‍ പാലിനും ഏഴ് രൂപ അധികം നല്‍കിയിരുന്നു. ഇതില്‍ 5 രൂപ കര്‍ഷകനും, 2 രൂപ സംഘത്തിനുമാണ് ലഭിച്ചത്. മാര്‍ച്ച് ഒന്നു മുതല്‍ പ്രോത്സാഹന അധിക വില 10 രൂപയായി വര്‍ധിപ്പിച്ചിരിക്കുകയാണ്. ഇതില്‍ 6 രൂപ കര്‍ഷകനും 4 രൂപ സംഘത്തിനും, സംഘത്തിനു നല്‍കുന്ന നാല് രൂപയില്‍ നിന്നും ഒരു രൂപ മേഖലാ യൂണിയന്റെ സംഘത്തിന്റെ ഷെയറായി വകയിരുത്തും.
മേഖലാ യൂണിയന്റെ പ്രവര്‍ത്തന ലാഭത്തില്‍ നിന്നും 16 കോടി രൂപയാണ് ഈ ഇനത്തില്‍ ചിലവ് പ്രതീക്ഷിക്കുന്നത്. 3 ലക്ഷം ലിറ്റര്‍ പാലാണ് പ്രതിദിനം മേഖലാ യൂണിയന്‍ പ്രാഥമിക സംഘങ്ങളില്‍ നിന്നും സംഭരിക്കുന്നത്. മില്‍മയിലെ ജീവനക്കാരുടെ മുന്‍കാലങ്ങളിലെ മൂന്ന് വര്‍ഷത്തെ പേ റിവിഷന്‍ അരിയേഴ്‌സ് നല്‍കുന്നതിന് വേണ്ടി 17 കോടി രൂപയും നീക്കി വെച്ചിട്ടുണ്ട്.
ഇന്ത്യയില്‍ ആദ്യമായി മേഖലാ യൂണിയന്‍ നടത്തുന്ന അഞ്ച് കോടി രൂപ ചെലവ് വരുന്ന സമഗ്ര കന്നുകാലി ഇന്‍ഷൂറന്‍സ് പദ്ധതി വിപുലമായി നടക്കുന്നുണ്ടെന്നും കൂടാതെ കര്‍ഷകര്‍ക്കും സംഘങ്ങള്‍ക്കുമായി ഈ സാമ്പത്തിക വര്‍ഷം എന്‍ഡിഡിബിയുടെ സഹായത്തോടെയും മേഖലാ യൂണിയന്റെ പ്രവര്‍ത്തന ലാഭത്തില്‍ നിന്നുമായി 10 കോടി രൂപ കൂടി ചെലവാക്കും, ക്ഷീര സഹകരണ മേഖലയില്‍ ഒരു മേഖലാ യൂണിയന്‍ നല്‍കുന്ന ഏറ്റവും വലിയ പ്രോത്സാഹന അധികവിലയാണ് ഇപ്പോള്‍ എറണാകുളം മേഖലാ യൂണിയന്‍ പ്രഖ്യാപിച്ചിരിക്കുന്നതെന്ന് ചെയര്‍മാന്‍ എംടി ജയന്‍ അറിയിച്ചു.