ഭൂനികുതിയും, കെട്ടിട നികുതിയും വിദേശത്ത് നിന്നും അടക്കാം: സേവനങ്ങൾ സ്മാർട്ടാക്കി റവന്യൂ വകുപ്പ്

റവന്യൂ വകുപ്പിന്റെ സേവനങ്ങൾ സ്മാർട്ടാക്കുന്നതിന്റെ ഭാഗമായി 12 ഇ-സേവനങ്ങൾ ആരംഭിച്ചു. പ്രവാസികൾക്ക് ഭൂനികുതി, കെട്ടിട നികുതി, അധിക നികുതി എന്നിവ ഓൺലൈൻ വഴി അടയ്ക്കാൻ കഴിയുന്ന ഒരു വെബ് പോർട്ടലാണ് നിലവിൽ വന്നിരിക്കുന്നത്. ആദ്യ ഘട്ടത്തിൽ പോർട്ടലിലൂടെ 12 ഇ-സേവനങ്ങൾ ലഭ്യമാകുമെന്ന് റവന്യൂ വകുപ്പ് അറിയിച്ചു. പുതിയ ഇ-സേവനങ്ങളുടെ ഉദ്ഘാടനം റവന്യൂ മന്ത്രി കെ. രാജൻ നിർവഹിച്ചു.

ലോക കേരളസഭയിൽ ഉയർന്ന ആവശ്യം പരിഗണിച്ചാണ് 10 രാജ്യങ്ങളിൽ താമസിക്കുന്ന മലയാളികൾക്ക് കേരളത്തിലെ അവരുടെ ഭൂമിക്ക് ഓൺലൈൻ വഴി നികുതി അടയ്ക്കാനുള്ള സൗകര്യം ഒരുക്കിയിരിക്കുന്നതായി മന്ത്രി കെ. രാജൻ അറിയിച്ചു. യുകെ, യുഎസ്എ, കാനഡ, സിംഗപ്പൂർ, സൗദി അറേബ്യ, യുഎഇ, ഒമാൻ, ഖത്തർ, കുവൈറ്റ്, ബഹ്‌റിൻ എന്നിവിടങ്ങളിലുള്ള മലയാളികൾക്ക് ഈ സേവനം ലഭിക്കും. www.revenue.kerala.gov.in എന്ന വെബ് പോർട്ടൽ വഴി ഭൂനികുതി, കെട്ടിട നികുതി, അധിക നികുതി, തരംമാറ്റ ഫീസ് എന്നിവ ഓൺലൈൻ ആയി അടയ്ക്കാനാകും.

12 ഇ-സേവനങ്ങൾ

1. www.revenue.kerala.gov.in: പ്രവാസികൾക്ക് വിദേശത്ത് നിന്ന് പോലും ഉപയോഗിക്കാവുന്ന രീതിയിൽ, ഭൂനികുതി, കെട്ടിട നികുതി, അധിക നികുതി എന്നിവ ഓൺലൈൻ വഴി അടയ്ക്കാനുള്ള വെബ് പോർട്ടൽ.

2. ഇ-മോർട്ട്ഗേജ് റെക്കോർഡർ (EMR): വായ്പകളുടെ വിവരങ്ങൾ നിശ്ചിത ഫീസ് ഈടാക്കി ലാൻഡ് ഇൻഫർമേഷൻ സിസ്റ്റത്തിൽ രേഖപ്പെടുത്താനുള്ള ഓൺലൈൻ സംവിധാനം (https://www.emr.kerala.gov.in/).

3. Any Land Search: ഔദ്യോഗിക പോർട്ടലിൽ (https://revenue.kerala.gov.in/) ലോഗിൻ ചെയ്യാതെ "verify land" ഓപ്ഷൻ വഴി ഭൂമിയുടെ വിവരങ്ങൾ തിരയാനുള്ള സൗകര്യം.

4. KBT Appeal: കെട്ടിട നികുതി സംബന്ധിച്ച അപ്പീൽ ഓൺലൈനായി നൽകാനുള്ള സംവിധാനം.

5. ഡിജിറ്റൽ പേയ്‌മെന്റ്: റവന്യൂ റിക്കവറി ഡിജിറ്റൽ പേയ്‌മെന്റ് സംവിധാനത്തിലൂടെ വില്ലേജ് ഓഫീസുകളിൽ സ്വീകരിക്കുന്ന കുടിശ്ശികയിൽ, സർക്കാർ കുടിശ്ശിക ഒഴികെയുള്ളവ, അതത് കേന്ദ്രങ്ങളുടെ അക്കൗണ്ടുകളിലേക്ക് കൈമാറാൻ കഴിയും.

6. ബിസിനസ് യൂസർ ലോഗിൻ: PAN ഉപയോഗിച്ച് ബിസിനസ് യൂസർമാർക്ക് ലോഗിൻ ചെയ്യാനുള്ള സൗകര്യം.

7. റവന്യൂ e-സർവീസസ് മൊബൈൽ ആപ്പ്: ആൻഡ്രോയിഡ് ഫോണുകളിൽ പ്രവർത്തിക്കുന്ന ആപ്പ്, ഭൂനികുതി അടക്കാനുള്ള സൗകര്യം ഉൾപ്പെടെ.

8. Land Acquisition Management System: ഭൂമി ഏറ്റെടുക്കലിന്റെ കാര്യങ്ങൾ സുതാര്യമായി കൈകാര്യം ചെയ്യുന്നതിന് www.lams.revenue.kerala.gov.in സജ്ജമാക്കിയത്.

9. Village Management Information System (VOMIS) Dashboard: 1666 വില്ലേജുകളുടെ പ്രവർത്തനങ്ങൾ ഓൺലൈനായി നിരീക്ഷിക്കാൻ അനുവദിക്കുന്ന ഡാഷ്ബോർഡ്.

10. Grievance and Innovation: റവന്യൂ വകുപ്പിന്റെ സേവനങ്ങൾ മെച്ചപ്പെടുത്തുന്നതിനായി ജീവനക്കാരുടേതടക്കം അഭിപ്രായങ്ങൾ സ്വീകരിക്കുന്ന സംവിധാനം.

11. സോഷ്യൽ സെക്യൂരിറ്റി പെൻഷൻ: രോഗബാധകളിലൂടെ ദുരിതം അനുഭവിക്കുന്നവർക്കുള്ള സോഷ്യൽ സെക്യൂരിറ്റി പെൻഷൻ പോർട്ടലിന്റെ പരിഷ്‌കരിച്ച പതിപ്പ്.

12. റവന്യൂ ഇ-കോടതികൾ: നിയമ നടപടികളുമായി ബന്ധപ്പെട്ട റവന്യൂ കോടതികളുടെ സമ്പൂർണ്ണ ഓട്ടോമേഷൻ.