സർക്കാർ ഈ വെള്ളാനകളെ എത്രകാലം തീറ്റിപ്പോറ്റും?

തിരുവനന്തപുരം: 100-നടുത്ത് പൊതുസംരംഭങ്ങളെ നിലനിർത്താൻ കേരള സർക്കാർ പതിനായിരക്കണക്കിന് കോടികൾ ചെലവഴിക്കുമ്പോൾ തിരികെ ലഭിക്കുന്നത് വെറും തുച്ഛമായ തുക മാത്രമാണെന്ന് സംസ്ഥാനതല പൊതുമേഖലാ സ്ഥാപനങ്ങളിൽ (state level public enterprises; SLPE) ലഭ്യമായ ഔദ്യോഗിക സാമ്പത്തിക സ്ഥിതി വിവരക്കണക്കുകൾ വ്യക്തമാക്കുന്നു.

ഉദാഹരണത്തിന്, 2021-22 വർഷാവസാനം സർക്കാർ ഉടമസ്ഥതയിലുള്ള സജീവ സംരംഭങ്ങളുടെ മൊത്തം അടച്ച മൂലധനം (paid-up capital) 21,709.34 കോടി രൂപയും ഈ എസ്എൽപിഇ-കളിലെ മൊത്തം നിക്ഷേപം 62,261.96 കോടി രൂപയും ആയിരുന്നപ്പോൾ, സർക്കാരിന് ലാഭവിഹിതമായി നാല് എസ്എൽപിഇകളിൽ നിന്ന് തിരികെ ലഭിച്ചതാകട്ടെ വെറും 11.89 കോടി രൂപ.

2022-23 (FY23) സാമ്പത്തിക വർഷത്തിന്റെ സ്ഥിതിവിവരക്കണക്കുകൾ ഇനിയും പുറത്തു വന്നിട്ടില്ല. വാസ്‌തവത്തിൽ, കാലാകാലങ്ങളായി, സർക്കാർ ഉടമസ്ഥതയിലുള്ള പൊതുമേഖലാ സ്ഥാപനങ്ങളിൽ 40 ശതമാനത്തിൽ താഴെ എണ്ണം മാത്രമാണ് അവരുടെ ധനകാര്യങ്ങൾ സമയബന്ധിതമായി ഓഡിറ്റ് ചെയ്യുന്നത്.

2022 സാമ്പത്തിക വർഷത്തിലെ ഡിവിഡന്റ് പേഔട്ട് മുൻ വർഷത്തേക്കാൾ മികച്ചതായിരുന്നു; 2021 സാമ്പത്തിക വർഷത്തിലാകട്ടെ അത് വെറും 99 ലക്ഷം രൂപയായിരുന്നു.

പ്രതീക്ഷിച്ചതുപോലെ ഏറ്റവും ഉയർന്ന ലാഭവിഹിതമായ 9.28 കോടി സംഭാവന ചെയ്തത് കേരള മിനറൽസ് ആൻഡ് മെറ്റൽസ് ലിമിറ്റഡ് (കെഎംഎംഎൽ) ആണ്.

ഓയിൽ പാം ഇന്ത്യ ലിമിറ്റഡ് (OPIL) 1.18 കോടി രൂപ ലാഭവിഹിതം നൽകിയപ്പോൾ ഫാർമസ്യൂട്ടിക്കൽ കോർപ്പറേഷൻ ഓഫ് കേരള ലിമിറ്റഡ് (പിസികെഎൽ) 1 കോടി രൂപയും കേരള ടൂറിസം ഇൻഫ്രാസ്ട്രക്ചർ ലിമിറ്റഡ് (കെടിഐഎൽ) 43 ലക്ഷം രൂപയുമാണ് സംഭാവന ചെയ്തത്.

നികുതി വരുമാനം

എന്നിരുന്നാലും, 2021-22 വർഷത്തിൽ (സാമ്പത്തിക വർഷം 2022) പൊതുമേഖലാ സ്ഥാപനങ്ങൾ നികുതിയിനത്തിൽ മുൻവർഷത്തെ 12,019 കോടി രൂപയുമായി താരതമ്യം ചെയ്യുമ്പോൾ 13,032 കോടി രൂപ നൽകിയിട്ടുണ്ട് എന്നത് വലിയ ആശ്വാസമായി കണക്കാക്കാം.

എന്നാൽ രസകരമെന്നു പറയട്ടെ, ഈ നികുതി അടവിന്റെ 97.50 ശതമാനവും കേരള സ്റ്റേറ്റ് ബിവറേജസ് കോർപ്പറേഷൻ (ബെവ്കോ; BEVCO) എന്ന ഒരൊറ്റ കമ്പനിയിൽ നിന്നാണ്; അത് 12,706 കോടി രൂപയായിരുന്നു.

കാരണം, ബെവ്കോയിൽ നിന്ന് സംസ്ഥാന ഖജനാവിലേക്ക് ഒഴുകുന്ന പരമാവധി വരുമാനം വർദ്ധിപ്പിക്കുന്നതിന് ബെവ്കോ അതിന്റെ ഉൽപ്പന്നങ്ങൾക്ക് 251 ശതമാനം നികുതി ചുമത്തുന്നുണ്ട്.

കോർപ്പറേറ്റ് ആദായനികുതി കേന്ദ്ര സർക്കാരുമായി പങ്കിടുന്നത് ഒഴിവാക്കാനാണ് ഈ നികുതി നിരക്ക് രൂപകൽപന ചെയ്തിരിക്കുന്നതെന്ന് നികുതി വിദഗ്ധർ പറയുന്നു.

കെ വി തോമസിന്റെ കാഴ്ചപ്പാട്

ന്യൂഡൽഹിയിലെ കേരളത്തിന്റെ പ്രത്യേക പ്രതിനിധിയായ പ്രൊഫ. കെ.വി.തോമസ് പൊതുമേഖലാ സ്ഥാപനങ്ങളെ (എസ്‌എൽപിഇ) സംബന്ധിച്ച സംസ്ഥാന സർക്കാരിന്റെ അതെ വീക്ഷണം തന്നെയാണ് ഒരവസരത്തിൽ ഈ ലേഖകനോട് പങ്കിട്ടത്. എന്നാൽ, ആ കാഴ്ചപ്പാട് ഗുരുതരമായ പ്രത്യാഘാതങ്ങൾ ഉണ്ടാക്കുമെന്ന് പൊതു ധനകാര്യ വിദഗ്ധർ അഭിപ്രായപ്പെടുന്നു.

പൊതുമേഖലാ സ്ഥാപനങ്ങളുടെ അവസ്ഥ പരിതാപകരമാണെങ്കിലും, ഈ കമ്പനികളെ പൂർണ്ണമായോ ഭാഗികമായോ സ്വകാര്യവൽക്കരിക്കുന്നതിനെ സംസ്ഥാന സർക്കാർ അനുകൂലിക്കില്ലെന്നും, അത് ഈ സ്ഥാപനങ്ങളെക്കുറിച്ചുള്ള സർക്കാർ നയമല്ലെന്നും കെവി തോമസ് മൈഫിൻപോയിന്റിനു നൽകിയ അഭിമുഖത്തിൽ പറഞ്ഞിരുന്നു.

“ഈ എസ്‌എൽപിഇകൾ വ്യത്യസ്തമായ ഒരു ലക്ഷ്യമാണ് നൽകുന്നത്, അത് പ്രധാനമായും ഹ്രസ്വദൃഷ്‌ടിയുള്ള ലാഭം ആയിരിക്കണമെന്നില്ല. നേരെമറിച്ച്, ഈ പൊതുമേഖലാ സ്ഥാപനങ്ങൾ ദീർഘകാലാടിസ്ഥാനത്തിൽ സംസ്ഥാന സമ്പദ്‌വ്യവസ്ഥയുടെ മൊത്തത്തിലുള്ള വളർച്ചയ്ക്ക് കാരണമാകുന്നു, ”തോമസ് മൈഫിൻ ടിവി യോട് സംസാരിക്കുമ്പോൾ പറഞ്ഞു.

Also See: https://www.youtube.com/shorts/qQZZHCQalUo

(പ്രൊഫ. കെ വി തോമസിന്റെ വിശദമായ അഭിമുഖം ഉടൻ myfintv-യിൽ കാണാം).: