പ്രതിദിനം ലക്ഷം ഓര്‍ഡറും കടന്ന് സെപ്‌റ്റോ കഫേ

ക്വിക്ക് കൊമേഴ്സ് യൂണികോണ്‍ സെപ്റ്റോയുടെ ഭക്ഷണ വിതരണ സേവനമായ സെപ്റ്റോ കഫേ പ്രതിദിനം 100,000 ഓര്‍ഡറുകളില്‍ എത്തി.ഈ വര്‍ഷം മുഴുവന്‍ മൊത്തം വ്യാപാര മൂല്യം (ജിഎംവി) 100 മില്യണ്‍ ഡോളറിലെത്തുമെന്ന് പ്രതീക്ഷിക്കുന്നതായി കമ്പനിയുടെ സഹസ്ഥാപകനും ചീഫ് എക്സിക്യൂട്ടീവ് ഓഫീസറുമായ ആദിത് പാലിച്ച ലിങ്ക്ഡ്ഇന്‍ പോസ്റ്റില്‍ പറഞ്ഞു. സെപ്റ്റോ കഫേ ആപ്പ് 2024 ഡിസംബറിലാണ് ആരംഭിച്ചത്.

പുതിയൊരു കമ്പനിയാണെങ്കിലും, സെപ്റ്റോ കഫേയുടെ നിലവിലെ സ്‌കെയില്‍ ഇന്ത്യയിലെ ചില പ്രമുഖ ക്വിക്ക് സര്‍വീസ് റെസ്റ്റോറന്റ് (ക്യുഎസ്ആര്‍) ശൃംഖലകളുടെ വലിപ്പത്തിന്റെ 10 ശതമാനത്തിലധികമാണ്. 'ഇന്ത്യയിലെ ക്യുഎസ്ആര്‍ വ്യവസായത്തിലെ ഒരു വിപ്ലവത്തിന്റെ തുടക്കമാണിതെന്ന് ഞാന്‍ വിശ്വസിക്കുന്നു,' അദ്ദേഹം പറഞ്ഞു.

2024 ഡിസംബറില്‍, സെപ്റ്റോ കഫേ ഒരു പ്രത്യേക ആപ്പായി ആരംഭിച്ചപ്പോള്‍, അത് പ്രതിദിനം 30,000 ഓര്‍ഡറുകള്‍ നേടി. എന്നിരുന്നാലും, 2025 ജനുവരിയില്‍, ദിവസേനയുള്ള ഓര്‍ഡറുകള്‍ 50,000 കവിഞ്ഞു. പ്രതിമാസം 60 ശതമാനം വളര്‍ച്ച രേഖപ്പെടുത്തി. പിന്നീട്, ഫെബ്രുവരിയിലെ ആദ്യ 10 ദിവസങ്ങളില്‍, കമ്പനി പ്രതിദിനം 75,000 ഓര്‍ഡറുകള്‍ നേടി, പ്രതിമാസം 50 ശതമാനം വളര്‍ച്ച കൈവരിച്ചു.

ദ്രുത ഭക്ഷണ വിതരണം ശക്തി പ്രാപിക്കുന്നതോടെ, സൊമാറ്റോ പിന്തുണയുള്ള ബ്ലിങ്കിറ്റ്സ് ബിസ്ട്രോ, സ്വിഗ്ഗിയുടെ ബോള്‍ട്ട് തുടങ്ങിയ എതിരാളികളും വളര്‍ച്ചയ്ക്ക് സാക്ഷ്യം വഹിക്കുന്നു. സ്വിഗ്ഗിയുടെ ക്ഷണ വിതരണ അളവിന്റെ 9 ശതമാനം ബോള്‍ട്ട് സര്‍വീസ് സംഭാവന ചെയ്യുന്നു.

ഹൈപ്പര്‍ലോക്കല്‍ ഇ-കൊമേഴ്സ് പ്ലാറ്റ്ഫോമായ മാജിക്പിന്‍ നിലവില്‍ അതിന്റെ ക്വിക്ക് ഫുഡ് ഡെലിവറി വിഭാഗമായ മാജിക്നൗ വഴി ഏകദേശം 10 ശതമാനം ഭക്ഷണ വിതരണ ഓര്‍ഡറുകളും രേഖപ്പെടുത്തുന്നു.