24 സെവന്‍ വില്‍പ്പനക്ക്; ഏറ്റെടുക്കാന്‍ ടാറ്റയും റിലയന്‍സും

ഗോഡ്‌ഫ്രെ ഫിലിപ്സിന്റെ ചില്ലറ പലചരക്ക് ശൃംഖലയായ 24 സെവന്‍ വില്‍പ്പനക്ക്. ഇത് വാങ്ങാനുള്ള ചര്‍ച്ചകളില്‍ ടാറ്റ ട്രെന്റ്, റിലയന്‍സ് റീട്ടെയില്‍, അവന്യൂ സൂപ്പര്‍മാര്‍ട്ട്സ് തുടങ്ങിയ കമ്പനികള്‍ പങ്കെടുക്കുന്നതായി റിപ്പോര്‍ട്ട്. കെകെ മോദി ഗ്രൂപ്പ് പിന്തുണയ്ക്കുന്ന കമ്പനിയാണ് ഗോഡ്‌ഫ്രെ ഫിലിപ്സ്. വിഭാഗത്തിന്റെ മൂല്യനിര്‍ണയത്തെ അടിസ്ഥാനമാക്കിയാകും വില്‍പ്പന സാധ്യതകള്‍. ചര്‍ച്ചകള്‍ വിവധ ഘട്ടങ്ങളിലാണ്.

ഏപ്രില്‍ 12 ന് ഒരു എക്‌സ്‌ചേഞ്ച് ഫയലിംഗില്‍, ഗോഡ്‌ഫ്രെ ഫിലിപ്‌സ് ഇന്ത്യ അതിന്റെ റീട്ടെയില്‍ ബിസിനസ് ഡിവിഷന്റെ സമഗ്രമായ അവലോകനത്തിന് ശേഷം നഷ്ടമുണ്ടാക്കുന്ന 24 സെവന്‍ ശൃംഖലയില്‍ നിന്ന് വിട്ടുനില്‍ക്കാനുള്ള പദ്ധതി വെളിപ്പെടുത്തിയിരുന്നു. 2005-ല്‍ സ്ഥാപിതമായ 24സെവന് ഡല്‍ഹി, പഞ്ചാബ്, ഹൈദരാബാദ് എന്നിവിടങ്ങളിലായി 145 സ്റ്റോറുകള്‍ ഉണ്ട്. ഇവ പലചരക്ക് സാധനങ്ങള്‍, സ്റ്റേപ്പിള്‍സ്, ലഘുഭക്ഷണങ്ങള്‍, പാനീയങ്ങള്‍, കളര്‍ബാര്‍ ബ്യൂട്ടി ബ്രാന്‍ഡിന്റെ ഉല്‍പ്പന്നങ്ങള്‍, വ്യക്തിഗത പരിചരണ ഉല്‍പ്പന്നങ്ങള്‍ എന്നിവ നല്‍കുന്നു. ചില വലിയ ഫോര്‍മാറ്റ് ഔട്ട്ലെറ്റുകളില്‍ അവര്‍ റെഡി-ടു ഈറ്റ് ഭക്ഷണ സാധനങ്ങള്‍ വില്‍ക്കുന്നു.

ഗ്രോസറി റീട്ടെയില്‍ മേഖലയിലെ വളര്‍ച്ചാ സാധ്യത കണക്കിലെടുത്ത്, കമ്പനിയുടെ നിലവിലെ സഞ്ചിത നഷ്ടങ്ങള്‍ക്കിടയിലും, ഹൈപ്പര്‍ കണ്‍വീനിയന്‍സ് ഗ്രോസറി, സ്റ്റേപ്പിള്‍സ്, പലചരക്കുകള്‍, ചെറിയ ഇന്‍-സ്റ്റോര്‍ കഫേകള്‍ എന്നിവ ഉള്‍ക്കൊള്ളുന്നതിനായി 24സെവന്‍ മോഡല്‍ വിപുലീകരിക്കാന്‍ കഴിയുമെന്ന് ഇക്കണോമിക് ടൈംസ് റിപ്പോര്‍ട്ട് ചെയ്തു.

ടാറ്റ ഗ്രൂപ്പിന്റെ റീട്ടെയില്‍ വിഭാഗമായ ട്രെന്റ് ലിമിറ്റഡ്, പലചരക്ക് ശൃംഖലയായ സ്റ്റാര്‍ ബസാര്‍ നിയന്ത്രിക്കുന്നു. എന്നാല്‍ ഗ്രോസറിയുടെ കമ്പനിയുടെ മൊത്തത്തിലുള്ള റീട്ടെയില്‍ ബിസിനസിന്റെ ഒരു ചെറിയ ഭാഗം മാത്രമാണ്. ട്രെന്റിന്റെ മറ്റ് റീട്ടെയില്‍ ശൃംഖലകളായ വെസ്റ്റ്‌സൈഡും സുഡിയോയും സ്റ്റാര്‍ ബസാറിനേക്കാള്‍ ദ്രുതഗതിയിലുള്ള വളര്‍ച്ച നേടുന്നുണ്ട്.

2021 മുതല്‍ ടെക്‌സസ് ആസ്ഥാനമായുള്ള 7-ഇലവന്‍ ശൃംഖലയുടെ മാസ്റ്റര്‍ ഫ്രാഞ്ചൈസി പാര്‍ട്ണറായി റിലയന്‍സ് റീട്ടെയില്‍ വെഞ്ച്വേഴ്‌സ്, ഈ ബ്രാന്‍ഡിന് കീഴില്‍ ഏകദേശം 50 സ്റ്റോറുകള്‍ പ്രവര്‍ത്തിപ്പിക്കുന്നു. 24 സെവന്‍ ഏറ്റെടുക്കല്‍ നടന്നാല്‍ അവയുടെ ഫോര്‍മാറ്റുകളിലെ സമാനത കണക്കിലെടുത്ത് അതിനെ നിലവിലെ കണ്‍വീനിയന്‍സ് സ്റ്റോര്‍ ശൃംഖലയുമായി ലയിപ്പിക്കും.

ഡിമാര്‍ട്ട് സ്റ്റോറുകളുടെ ഓപ്പറേറ്ററായ അവന്യൂ സൂപ്പര്‍മാര്‍ട്ട്സ്, പ്രാഥമികമായി പലചരക്ക് വില്‍പനയില്‍ ശ്രദ്ധ കേന്ദ്രീകരിക്കുകയും പൊതു ചരക്കുകളും വസ്ത്രങ്ങളും വാഗ്ദാനം ചെയ്യുകയും ചെയ്യുന്നു.അതിന്റെ പലചരക്ക് വിഭാഗം വിപുലീകരിക്കാന്‍ സജീവമായി ശ്രമിക്കുകയാണ്. മാര്‍ച്ചില്‍ അവസാനിച്ച പാദത്തില്‍, ശൃംഖല ഓരോ സ്റ്റോറിന്റെയും വരുമാനത്തില്‍ 7 ശതമാനം വര്‍ധനയും സ്റ്റോര്‍ കൂട്ടിച്ചേര്‍ക്കലുകളില്‍ 13 ശതമാനം വര്‍ധനയും രേഖപ്പെടുത്തി. കഴിഞ്ഞ വര്‍ഷം ഇതേ കാലയളവിനെ അപേക്ഷിച്ച് 20 ശതമാനം വളര്‍ച്ച രേഖപ്പെടുത്തി.

2022-23 ല്‍, ഗോഡ്‌ഫ്രെ ഫിലിപ്‌സിന്റെ റീട്ടെയില്‍ ബിസിനസ് ഡിവിഷന്‍ പ്രവര്‍ത്തനങ്ങളില്‍ നിന്ന് 396 കോടി രൂപ വരുമാനം റിപ്പോര്‍ട്ട് ചെയ്തു. ഇത് ഗോഡ്‌ഫ്രെ ഫിലിപ്സിന്റെ മൊത്തം വരുമാനത്തിന്റെ 9.3 ശതമാനമായിരുന്നു. എന്നിരുന്നാലും, സഞ്ചിത നഷ്ടങ്ങള്‍ കാരണം, റീട്ടെയില്‍ ബിസിനസ്സ് ഡിവിഷന്‍ 2023 മാര്‍ച്ച് 31 വരെ നെഗറ്റീവ് നെറ്റ് വര്‍ത്ത് റിപ്പോര്‍ട്ട് ചെയ്തിരുന്നു.