ബംഗാള്‍ ഗ്ലോബല്‍ ബിസിനസ് സമ്മിറ്റ്; വന്‍ പ്രതിനിധിസംഘവുമായി യുകെ

നവംബര്‍ 21-22 തീയതികളില്‍ കൊല്‍ക്കത്തയില്‍ നടക്കുന്ന ബംഗാള്‍ ഗ്ലോബല്‍ ബിസിനസ് സമ്മിറ്റിലേക്ക് (ബിജിബിഎസ്) ഏറ്റവും വലിയ പ്രതിനിധി സംഘവുമായി യുകെ. ഇതു സംബന്ധിച്ച ഔദ്യോഗിക അറിയിപ്പ് ലഭിച്ചിട്ടുണ്ട്. ബിസിനസ് സമ്മിറ്റിന്റെ ഏഴാമത് എഡിഷനാണ് ഇത്തവണ നടക്കുന്നത്.

കൊല്‍ക്കത്തയിലെ ബിജിബിഎസില്‍ യുകെയെ പ്രതിനിധീകരിച്ച് വിവധ ബിസിനസുകളില്‍ നിന്നും സ്ഥാപനങ്ങളില്‍ നിന്നുമുള്ള 55 അംഗ പ്രതിനിധി സംഘമാണ് പങ്കെടുക്കുകയെന്ന് ബ്രിട്ടീഷ് ഡെപ്യൂട്ടി ഹൈക്കമ്മീഷന്‍ അറിയിച്ചു.

'കൊല്‍ക്കത്തയില്‍ നടക്കുന്ന ബംഗാള്‍ ഗ്ലോബല്‍ ബിസിനസ് ഉച്ചകോടിയിലേക്ക് യുകെയിലെ എക്കാലത്തെയും വലിയ പ്രതിനിധി സംഘത്തെ നയിക്കാന്‍ ഞാന്‍ കാത്തിരിക്കുകയാണ്. ബ്രിട്ടീഷ് ബിസിനസുകളെ ഇവിടെ വിപുലീകരിക്കാനും ബംഗാളില്‍ നിന്നുള്ള കമ്പനികള്‍ക്ക് യുകെയില്‍ തങ്ങളുടെ കാല്‍പ്പാടുകള്‍ വര്‍ധിപ്പിക്കാനും ഉച്ചകോടി സഹായിക്കുമെന്ന് പ്രതീക്ഷിക്കുന്നു,' ഇന്ത്യയിലെ ബ്രിട്ടീഷ് ഹൈക്കമ്മീഷണര്‍ അലക്‌സ് എല്ലിസ് പറഞ്ഞു.

ടെക്നോബില്‍റ്റ്, എയര്‍നോഡ്, സ്മാര്‍ട്ട്വിസ്, എക്സ്വര്‍ക്ക് ടെക്, ഹൈ-മെറ്റ് ലിമിറ്റഡ്, കേംബ്രിഡ്ജ് കാര്‍ബണ്‍ ക്യാപ്ചര്‍, ഗ്രീന്‍എന്‍കോ തുടങ്ങിയ സാങ്കേതിക സ്ഥാപനങ്ങളും മോട്ട് മക്ഡൊണാള്‍ഡ് പോലുള്ള എഞ്ചിനീയറിംഗ് കമ്പനികളും പ്രതിനിധി സംഘത്തിന്റെ ഭാഗമാകുമെന്ന് ഒരു ഉദ്യോഗസ്ഥന്‍ പറഞ്ഞു.

'ഇരുരാജ്യങ്ങളിലെയും പ്രധാനമന്ത്രിമാര്‍ അംഗീകരിച്ച യുകെ-ഇന്ത്യ 2030 റോഡ്മാപ്പ് യുകെയും ഇന്ത്യയും തമ്മിലുള്ള വ്യാപാരവും നിക്ഷേപവും പരിവര്‍ത്തനം ചെയ്യുമെന്ന് വാഗ്ദാനം ചെയ്തു. അതാണ് ഞങ്ങള്‍ ഇവിടെ ചെയ്യേണ്ടത്,' കിഴക്കന്‍, വടക്കുകിഴക്കന്‍ ഇന്ത്യയിലെ ബ്രിട്ടീഷ് ഡെപ്യൂട്ടി ഹൈക്കമ്മീഷണര്‍ ഡോ. ആന്‍ഡ്രൂ ഫ്‌ലെമിംഗ് പറഞ്ഞു.

ലോകമെമ്പാടുമുള്ള നിക്ഷേപകരെ ആകര്‍ഷിക്കുന്നതിനുള്ള സംസ്ഥാന വാര്‍ഷിക മാര്‍ക്വീ ഇവന്റായ ബിജിബിഎസിന്റെ 2022 പതിപ്പില്‍ യുകെയില്‍ നിന്ന് 49 മുതിര്‍ന്ന വ്യക്തികള്‍ പങ്കെടുത്തതായും ബ്രിട്ടീഷ് ഡെപ്യൂട്ടി ഹൈക്കമ്മീഷന്‍ അറിയിച്ചു.