2023ല്‍ സ്‍മാര്‍ട്ട് ഫോണ്‍ വിപണി വളര്‍ന്നത് 1% മാത്രം

2023ൽ ഇന്ത്യയുടെ ആഭ്യന്തര സ്‌മാർട്ട്‌ഫോൺ വിപണി കൈവരിച്ചത് നാമമാത്രമായ 1 ശതമാനം വളർച്ചയെന്ന് ഐഡിസിയുടെ ഏറ്റവും പുതിയ റിപ്പോർട്ട്. ആദ്യ പകുതിയിലെ 10 ശതമാനം ഇടിവ് നികത്തിക്കൊണ്ട് 2023ലെ രണ്ടാം പകുതിയില്‍ 11 ശതമാനം വളർച്ച കൈവരിക്കാനായി. 2023-ൽ രാജ്യം 146 ദശലക്ഷം സ്‌മാർട്ട്‌ഫോണുകളാണ് കയറ്റി അയച്ചത്.

ഒക്റ്റോബര്‍-ഡിസംബര്‍ കാലയളവില്‍ 26 ശതമാനം വാര്‍ഷിക വളര്‍ച്ചയാണ് വിപണി പ്രകടമാക്കിയത്. 37 ദശലക്ഷം യൂണിറ്റുകളുടെ കയറ്റുമതിയാണ് ഈ പാദത്തില്‍ നടന്നത്. പുതിയ മോഡലുകളുടെ ലോഞ്ചിംഗിന്‍റെ കൂടെ ഭാഗമായി പ്രതീക്ഷിച്ചതിലും ഉയര്‍ന്ന കയറ്റുമതിയാണ് 2023 രണ്ടാം പകുതിയില്‍ ഉണ്ടായത്.

"വരുമാനം, പണപ്പെരുപ്പ സമ്മർദ്ദം, വിലവർദ്ധന, ഇൻവെൻ്ററികൾ എന്നിവയെക്കുറിച്ചുള്ള ആശങ്കകൾ നിലനിൽക്കുന്നതിനാൽ 2024-ൽ സ്‌മാർട്ട്‌ഫോണ്‍ വിപണിയുടെ വീണ്ടെടുപ്പ് ബുദ്ധിമുട്ടുള്ളതും സാവധാനവുമായിരിക്കും,” ഐഡിസിയിലെ ക്ലയന്‍റ് ഡിവൈസ് റിസര്‍ച്ച് അസോസിയേറ്റ് വൈസ് പ്രസിഡൻ്റ് നവകേന്ദർ സിംഗ് പറയുന്നു. 2024-ലും ഒറ്റയക്ക വാർഷിക വളർച്ച മാത്രമാണ് സ്‍മാര്‍ട്ട് ഫോണ്‍ വിപണിയിലുണ്ടാകുക എന്നാണ് വിലയിരുത്തുന്നത്. എന്‍ട്രിലെവല്‍ ഫോണുകളുടെ വില്‍പ്പന വര്‍ധിപ്പിക്കുന്നതിന് കൂടുതല്‍ പരിശ്രമങ്ങള്‍ അനിവാര്യമാണെന്നും ഐഡിസി ചൂണ്ടിക്കാണിക്കുന്നു.

2023-ൽ ട്രെൻഡുകൾ ശ്രദ്ധേയമായി നിരീക്ഷിക്കപ്പെട്ടിട്ടുണ്ട്. ഉപഭോക്താക്കളുടെ 5ജി-യിലേക്കുള്ള മാറ്റത്തിന്‍റെ നല്ല സൂചന കഴിഞ്ഞവര്‍ഷം നൽകുന്നു. 2023-ൽ 79 ദശലക്ഷം 5ജിസ്‌മാർട്ട്‌ഫോണുകൾ കയറ്റുമതി ചെയ്തു, മാസ് ബജറ്റ് വിഭാഗത്തിലെ ധാരാളം ലോഞ്ചുകളുടെ ഫലമായി 5ജി സ്‍മാര്‍ട്ട് ഫോണുകളുടെ ശരാശരി വില 5 ശതമാനം ഇടിഞ്ഞു.