മുബദാല ഇൻവെസ്റ്റ്‌മെൻ്റസിൻറെ നേതൃത്വത്തിൽ അവാൻസെ 1,000 കോടി രൂപ സമാഹരിച്ചു

നോൺ ബാങ്കിംഗ് ഫിനാൻഷ്യൽ കമ്പനിയായ (എൻബിഎഫ്‌സി) അവാൻസെ ഫിനാൻഷ്യൽ സർവീസസ്, ബിസിനസ് വളർച്ചയ്ക്ക് ഫണ്ട് നൽകുന്നതിനായി 1,000 കോടി രൂപയുടെ പ്രാഥമിക മൂലധനം സമാഹരിച്ചു.

അവാൻസെ ഇൻവെസ്റ്റ്‌മെൻ്റ് അഡ്വൈസേഴ്‌സ് പ്രൈവറ്റ് ലിമിറ്റഡിൻ്റെ പങ്കാളിത്തത്തോടെ അബുദാബി ആസ്ഥാനമായുള്ള നിക്ഷേപ കമ്പനിയായ മുബദാല ഇൻവെസ്റ്റ്‌മെൻ്റ് കമ്പനി ആണ് ഈ റൗണ്ട് ഫണ്ടിംഗിന് നേതൃത്വം നൽകിയതെന്ന് എൻബിഎഫ്‌സി പ്രസ്താവനയിൽ പറഞ്ഞു.

അതുല്യമായ ഉപഭോക്തൃ അനുഭവങ്ങൾ സൃഷ്ടിക്കുന്നതിലും സുസ്ഥിരമായ ലാഭകരമായ വളർച്ച കൈവരിക്കുന്നതിലും ശ്രദ്ധ കേന്ദ്രീകരിച്ച് അതിവേഗം വികസിച്ചുകൊണ്ടിരിക്കുന്ന വിദ്യാഭ്യാസ ധനസഹായ വിഭാഗത്തിൽ മുൻ നിരയിലെത്താൻ അവാൻസെയെ ഫണ്ടിംഗ് പ്രാപ്തമാക്കും.

ഇന്ത്യൻ വിദ്യാഭ്യാസ സ്ഥാപനങ്ങൾക്ക് വളർച്ചയും പ്രവർത്തന മൂലധനവും കമ്പനി നൽകിയിട്ടുണ്ട്. 2023 ഡിസംബറിലെ കണക്കനുസരിച്ച്, കമ്പനിയുടെ മാനേജ്‌മെൻ്റിന് കീഴിലുള്ള ആസ്തി (എയുഎം) 12,147 കോടി രൂപയാണ്.