പണപ്പെരുപ്പത്തില്‍ ആശ്വാസം, സുരക്ഷിതം ലാര്‍ജ്ക്യാപുകളെന്ന് വിദഗ്ധര്‍; ഇന്ന് വിപണി തുറക്കും മുമ്പ് അറിയേണ്ടത്

ഇന്നലെ റീട്ടെയില്‍ പണപ്പെരുപ്പ കണക്കുകള്‍ പുറത്തുവരുന്നതിന് മുന്നോടിയായി ബെഞ്ച്മാര്‍ക്ക് സൂചികകള്‍ കാര്യമായ നഷ്ടം പ്രകടമാക്കി. ബിഎസ്ഇ സെൻസെക്സ് 523 പോയിൻ്റ് താഴ്ന്ന് 71,072 ലും നിഫ്റ്റി 50 167 പോയിൻ്റ് ഇടിഞ്ഞ് 21,616 ലും എത്തി. ബാങ്കിംഗ്, ഫിനാൻഷ്യൽ സർവീസ്, മെറ്റൽ, എഫ്എംസിജി, ഓയിൽ ആൻഡ് ഗ്യാസ് ഓഹരികളിലെ വിൽപ്പന സമ്മർദ്ദം വിപണികളെ താഴോട്ടു വലിക്കുന്നതില്‍ വലിയ പങ്കുവഹിച്ചു. 

ബെഞ്ച്മാര്‍ക്ക് സൂചികകളേക്കാള്‍ കനത്ത ഇടിവാണ് മിഡ്ക്യാപുകളിലും സ്‍മാള്‍ക്യാപുകളിലും കാണാനായിട്ടുള്ളത്. മൂല്യനിര്‍ണയം പരിഗണിക്കുമ്പോള്‍, ദീര്‍ഘകാലാടിസ്ഥാനത്തില്‍ ലാര്‍ജ് ക്യാപുകളായിരിക്കും സുരക്ഷിതമെന്ന് വിദഗ്ധര്‍ ചൂണ്ടിക്കാണിക്കുന്നു.

പണപ്പെരുപ്പ കണക്കുകള്‍ 

അനലിസ്റ്റുകളുടെ വിലയിരുത്തലുകളോട് ചേര്‍ന്നുപോകുന്ന റീട്ടെയില്‍ വിലക്കയറ്റ കണക്കാണ് സര്‍ക്കാർ പുറത്തുവിട്ടിട്ടുള്ളത്. ജനുവരിയില്‍ 5.1 ശതമാനമാണ് പണപ്പെരുപ്പം. മൂന്ന് മാസത്തിനിടയിലെ ഏറ്റവും താഴ്ന്ന നിലയാണിത്.  എങ്കിലും 5 ശതമാനത്തിന് മുകളില്‍ തന്നെയാണ് പണപ്പെരുപ്പം എന്നത് ശ്രദ്ധേയമാണ്.

ഭക്ഷ്യ, ഇന്ധന വിലകള്‍ ഒഴിവാക്കി കണക്കാക്കുന്ന മുഖ്യ പണപ്പെരുപ്പം 3.6 ശതമാനത്തിലേക്ക് താഴ്ന്നിട്ടുണ്ട്. 

ഇന്ന് യുഎസിന്‍റെ വിലക്കയറ്റ കണക്കുകളും പുറത്തുവരുന്നുണ്ട്. കേന്ദ്ര ബാങ്കുകള്‍ എപ്പോള്‍ മുതല്‍ പലിശ നിരക്കുകള്‍ കുറച്ചുതുടങ്ങും എന്നറിയുന്നതിന് ഈ ഡാറ്റയും നിക്ഷേപകര്‍ ശ്രദ്ധാപൂര്‍വം വീക്ഷിക്കും. 

നിഫ്റ്റിയുടെ പ്രതിരോധവും പിന്തുണയും

പിവറ്റ് പോയിൻ്റ് കാൽക്കുലേറ്റർ സൂചിപ്പിക്കുന്നത് നിഫ്റ്റി 21,576 ലും തുടർന്ന് 21,515ലും 21,417ലും ഉടനടി പിന്തുണ സ്വീകരിക്കാൻ സാധ്യതയുണ്ട് എന്നാണ്, അതേസമയം ഉയർന്ന ഭാഗത്ത്, 21,772ലും തുടർന്ന് 21,833ലും 21,931ലും ഉടനടി പ്രതിരോധം കണ്ടേക്കാം.

ആഗോള വിപണികള്‍ ഇന്ന്

യുഎസ് വിപണികള്‍ പൊതുവില്‍ നെഗറ്റിവ് തലത്തിലാണ് തിങ്കളാഴ്ചത്തെ വ്യാപാരം അവസാനിപ്പിച്ചത്. എസ്&പി500 4.12 പോയിൻ്റ് അഥവാ 0.08 ശതമാനം നഷ്ടത്തിൽ 5,022.49ലും നാസ്ഡാക്ക് കോമ്പോസിറ്റ് 42.74 പോയിൻ്റ് അഥവാ 0.27 ശതമാനം ഇടിഞ്ഞ് 15,947.92ലും വ്യാപാരം അവസാനിപ്പിച്ചു. ഡൗ ജോൺസ് ഇൻഡസ്ട്രിയൽ ആവറേജ് 135.76 പോയിൻ്റ് അഥവാ 0.35 ശതമാനം ഉയർന്ന് 38,807.45 എന്ന നിലയിലെത്തി.

ഏഷ്യ പസഫിക് വിപണികള്‍ പൊതുവില്‍ നേട്ടത്തിലാണ് ഇന്നത്തെ വ്യാപാരം ആരംഭിച്ചിട്ടുള്ളത്. ഓസ്ട്രേലിയ എഎസ്എക്സ്, ദക്ഷിണ കൊറിയയുടെ കോസ്പി, ജപ്പാനിന്‍റെ നിക്കി, ചൈനയുടെ ഷാങ്ഹായ് എന്നിവ നേട്ടത്തിലാണ്. ഹോംഗ്കോംഗിന്‍റ  ഹാങ്സെങ് നഷ്ടത്തിലാണ് വ്യാപാരം നടത്തുന്നത്. 

ഇന്ന് 52.50 പോയിന്‍റിന്‍റെ നേട്ടത്തിലാണ് ഗിഫ്റ്റ് നിഫ്റ്റിയിലെ വ്യാപാരം ആരംഭിച്ചിട്ടുള്ളത്. ബെഞ്ച്മാര്‍ക്ക് സൂചികകളും നേട്ടത്തില്‍ തുടങ്ങുമെന്ന സൂചനയാണ് ഡെറിവേറ്റിവ് വിപണി നല്‍കുന്നത്. 

ഇന്ന് ശ്രദ്ധ നേടുന്ന ഓഹരികള്‍

കോൾ ഇന്ത്യ: രാജ്യത്തെ ഏറ്റവും വലിയ കൽക്കരി ഖനന കമ്പനി മൂന്നാം പാദത്തിൽ 9,093.7 കോടി രൂപയുടെ ഏകീകൃത ലാഭം രേഖപ്പെടുത്തി, മുൻ വർഷം ഇതേ പാദത്തെ അപേക്ഷിച്ച് 17.8 ശതമാനം വർധിച്ചു. . പ്രവർത്തന വരുമാനം  2.8 ശതമാനം വർധിച്ച് 36,154 കോടി രൂപയായി.

ജെഎസ്ഡബ്ല്യു എനർജി: കമ്പനിയുടെ പൂർണ ഉടമസ്ഥതയിലുള്ള ഉപസ്ഥാപനമായ ജെഎസ്ഡബ്ല്യു നിയോ എനർജിക്ക് സോളാർ എനർജി കോർപ്പറേഷൻ ഓഫ് ഇന്ത്യയിൽ നിന്ന് 500 മെഗാവാട്ട് വിന്‍ഡ് കപ്പാസിറ്റിക്കുള്ള ലെറ്റർ ഓഫ് അവാർഡ് ലഭിച്ചു.

സ്‍റ്റീൽ അതോറിറ്റി ഓഫ് ഇന്ത്യ: സർക്കാർ ഉടമസ്ഥതയിലുള്ള സ്റ്റീൽ കമ്പനി ഒക്ടോബർ-ഡിസംബർ കാലയളവിൽ 423 കോടി രൂപയുടെ ഏകീകൃത അറ്റാദായം റിപ്പോർട്ട് ചെയ്തു. മുന്‍വര്‍ഷം സമാനപാദത്തിലെ ഉയർന്ന നിലയുമായുള്ള താരതമ്യത്തില്‍ 22 ശതമാനം ഇടിവാണിത്. പ്രവർത്തന വരുമാനം 6.8 ശതമാനം ഇടിഞ്ഞ് 23,349 കോടി രൂപയായി. 298 കോടി രൂപയുടെ ഒരു അസാധാരണ നേട്ടം 2022 -23 മൂന്നാംപാദത്തില്‍ ഉണ്ടായിരുന്നു . 

ഹിൻഡാൽകോ ഇൻഡസ്ട്രീസ്: ഡിസംബറിൽ അവസാനിച്ച പാദത്തിൽ പൊതുവായി ഓഹരിയുടമകൾക്ക് ബാധകമായ അറ്റവരുമാനം 121 മില്യൺ ഡോളറാണെന്ന് ഉപകമ്പനിയായ നോവെലിസ് പ്രഖ്യാപിച്ചു. മുൻവർഷം സമാന പാദത്തിലെ 12 മില്യൺ ഡോളറിനെ അപേക്ഷിച്ച് 10 മടങ്ങ് വളർച്ച നേടി.അറ്റ ​​വിൽപ്പന 6 ശതമാനം കുറഞ്ഞ് 3.9 ബില്യൺ ഡോളറായി. ശരാശരി അലുമിനിയം വിലകൾ കുറഞ്ഞതാണ് ഈ ഇടിവിന് കാരണം.

ദിലീപ് ബിൽഡ്‌കോൺ: കൺസ്ട്രക്ഷൻ ആൻഡ് ഇൻഫ്രാസ്ട്രക്ചർ ഡെവലപ്‌മെൻ്റ് കമ്പനിയുടെ ഏകീകൃത ലാഭം  3.3 ശതമാനം വാര്‍ഷിക ഇടിവോടെ 107.4 കോടി രൂപയായി. പ്രവർത്തന വരുമാനം മുൻവർഷത്തെ അപേക്ഷിച്ച് 23.87 ശതമാനം വർധിച്ച് 2,876.8 കോടി രൂപയായി.

സ്‌കിപ്പർ: പവർ ട്രാൻസ്മിഷൻ & ഡിസ്ട്രിബ്യൂഷൻ സ്‌ട്രക്‌ചറുകള്‍ നിര്‍മിക്കുന്ന കമ്പനിയുടെ മൂന്നാം പാദ അറ്റാദായം 115.3 ശതമാനം വർധിച്ച് 20.4 കോടി രൂപയായി. പ്രവർത്തന വരുമാനം 80.2 ശതമാനം വാര്‍ഷിക വര്‍ധനയോടെ 801.6 കോടി രൂപയായി.

ക്രൂഡ് ഓയില്‍ വില

ചൊവ്വാഴ്ച തുടർച്ചയായ രണ്ടാം ദിവസവും എണ്ണ വിലയിൽ കാര്യമായ മാറ്റമുണ്ടാകുന്നില്ല. യുഎസ് പലിശ നിരക്ക് കുറയ്ക്കുന്നത് എപ്പോഴാകുമെന്ന അനിശ്ചിതത്വവും ഇന്ധന ആവശ്യകതയിലെ കുറവിനെ സംബന്ധിച്ച ആശങ്കയും വിതരണത്തെ തടസ്സപ്പെടുത്തുന്ന മിഡിൽ ഈസ്റ്റിലെ പിരിമുറുക്കങ്ങളും നിക്ഷേപകര്‍ കണക്കിലെടുക്കുന്നു. 

ബ്രെൻ്റ് ഫ്യൂച്ചറുകൾ  ബാരലിന് ഒരു സെന്‍റ് കുറഞ്ഞ് 81.99 ഡോളറില്‍ എത്തി. യുഎസ് വെസ്റ്റ് ടെക്സസ് ഇൻ്റർമീഡിയറ്റ് (ഡബ്ല്യുടിഐ) ക്രൂഡ് വില ബാരലിന് 1 സെന്‍റ്  ഉയർന്ന് 76.93 ഡോളറിലെത്തി.

വിദേശ ഫണ്ടുകളുടെ ഗതി

ഫെബ്രുവരി 12 ന് വിദേശ സ്ഥാപന നിക്ഷേപകർ (എഫ്ഐഐ) ഓഹരികളിലെ 126.60 കോടി രൂപയുടെ അറ്റവാങ്ങലും ആഭ്യന്തര സ്ഥാപന നിക്ഷേപകർ (ഡിഐഐകൾ) 1,711.75 കോടി രൂപയുടെ അറ്റവാങ്ങലും നടത്തിയെന്ന്  എൻഎസ്ഇയിൽ നിന്നുള്ള താൽക്കാലിക കണക്കുകൾ വ്യക്തമാക്കുന്നു.

ഓഹരി വിപണി വാര്‍ത്തകള്‍ അറിയാന്‍

നിരാകരണം: ഈ ലേഖനം വിജ്ഞാനത്തെ മാത്രം ഉദ്ദേശിച്ചുള്ളതാണ്, നിക്ഷേപ ശുപാര്‍ശയല്ല. ഓഹരി നിക്ഷേപം വിപണിയുടെ ലാഭ നഷ്ട സാധ്യതകൾക്ക് വിധേയമാണ്. ഓഹരി വിപണിയിൽ നിക്ഷേപിക്കും മുമ്പെ അംഗീകൃത സാമ്പത്തിക വിദഗ്ധന്റെ സേവനം തേടേണ്ടതാണ്. നിക്ഷേപങ്ങളിലൂടെയുണ്ടാകുന്ന നഷ്ടങ്ങള്‍ക്ക് ലേഖകനോ മൈഫിന്‍ പോയിന്‍റിനോ ഉത്തവരാദിത്തം ഉണ്ടായിരിക്കുന്നതല്ല.

വിപണി തുറക്കും മുന്‍പുള്ള മൈഫിന്‍ ടിവിയിലെ ലൈവ് അവലോകനം കാണാം