ഔദ്യോഗിക പരിഗണന വേണ്ട, ക്രിപ്‌റ്റോയെ കൈ അകലത്തില്‍ നിര്‍ത്തണം; ഐഎംഎഫ്-എഫ്എസ്ബി റിപ്പോര്‍ട്ട്
- ഫിനാന്‍ഷ്യല്‍ ആക്ഷന്‍ ടാസ്‌ക് ഫോഴ്സ് (എഫ്എടിഎഫ്) മാനദണ്ഡങ്ങള്‍ സ്വീകരിക്കുന്നതുള്‍പ്പെടെയുള്ള അപകടസാധ്യതകള്‍ കൈകാര്യം ചെയ്യുന്നതിനും ലഘൂകരിക്കുന്നതിനും ഉചിതമായ നടപടികള്‍ കൈക്കൊള്ളാന്‍ രാജ്യങ്ങളോട് ഈ റിപ്പോര്‍ട്ട് ആവശ്യപ്പെട്ടിട്ടുണ്ട്.
ക്രിപ്റ്റോ ആസ്തികളെ ഔദ്യോഗിക കറന്‍സിയായോ നിയമപരമായ വിനിമയ മാര്‍ഗമായോ പരിഗണിക്കരുതെന്ന് അന്താരാഷ്ട്ര നാണയ നിധിയും (ഐഎംഎഫ്) ഫിനാന്‍ഷ്യല്‍ സ്റ്റെബിലിറ്റി ബോര്‍ഡും (എഫ്എസ്ബി) ചൂണ്ടിക്കാട്ടി. ക്രിപ്റ്റോ ആസ്തികള്‍ നിയന്ത്രിക്കുന്നത് സംബന്ധിച്ച് നടന്നുകൊണ്ടിരിക്കുന്ന ജി 20 ചര്‍ച്ചകളുടെ ഭാഗമാണ് സംയുക്ത റിപ്പോര്‍ട്ട് അവതരിപ്പിച്ചത്.
സാമ്പത്തികവും ആഗോളവുമായ സാമ്പത്തിക സ്ഥിരതയ്ക്ക് ക്രിപ്റ്റോ വെല്ലുവിളി സൃഷ്ടിക്കുന്നതിനാല്‍ കേന്ദ്ര ബാങ്കുകള്‍ ഔദ്യോഗിക കരുതല്‍ ശേഖരത്തില്‍ ക്രിപ്റ്റോ ആസ്തികള്‍ കൈവശം വയ്ക്കുന്നത് ഒഴിവാക്കണമെന്നും ഇതില്‍ പറയുന്നു. ക്രിപ്റ്റോ ആസ്തികളുമായി ബന്ധപ്പെട്ട മൂലധന പ്രവാഹത്തില്‍ നയകര്‍ത്താക്കള്‍ ജാഗ്രത പാലിക്കണമെന്നും റിപ്പാര്‍ട്ടില്‍ ശുപാര്‍ശ ചെയ്യുന്നു.
വളര്‍ന്നുവരുന്ന വിപണികളെയും വികസ്വര സമ്പദ്വ്യവസ്ഥകളെയും സംബന്ധിച്ചിടത്തോളം, കാര്യക്ഷമല്ലാത്ത നികുതി ചട്ടക്കൂട്, ബാങ്കിംഗ് ഇടപാടുകളില്‍ സജീവമല്ലാത്തവര്‍, രാജ്യങ്ങള്‍കടന്നുള്ള ഇടപാട് ചെലവുകള്‍ എന്നിവ കാരണം ക്രിപ്റ്റോ ആസ്തികളില്‍ നിന്ന് വര്‍ധിച്ച മാക്രോ-ഫിനാന്‍ഷ്യല്‍ അപകടസാധ്യതകള്‍ നേരിടേണ്ടിവരുമെന്ന് റിപ്പോര്‍ട്ട് പറയുന്നു.
കറന്‍സിയുടെ മൂന്ന് അടിസ്ഥാന വ്യവസ്ഥകളായ അക്കൗണ്ടുകളുടെ എണ്ണം, എക്‌സ്‌ചേഞ്ച് , മൂല്യശേഖരം എന്നിവ ക്രിപ്റ്റോ ആസ്തികള്‍ കൈകാര്യം ചെയ്യുന്നില്ല. ക്രിപ്‌റ്റോയുമായി ബന്ധപ്പെട്ട പ്രവര്‍ത്തനങ്ങള്‍ നിരോധിക്കുക എളുപ്പമുള്ള സാഹചര്യമല്ലെന്നും താല്‍കാലിക നിയന്ത്രണങ്ങള്‍ ശക്തമായ മാക്രോ ഇക്കണോമിക് നയങ്ങള്‍ക്ക് പകരമാകരുതെന്നും ഇതില്‍ സൂചിപ്പിക്കുന്നു.
വിശ്വസനീയമായ സ്ഥാപന ചട്ടക്കൂടുകളും മികച്ച നിയന്ത്രണവും മേല്‍നോട്ടവുമാണ് ക്രിപ്റ്റോ ആസ്തികള്‍ ഉയര്‍ത്തുന്ന മാക്രോ ഇക്കണോമിക്, സാമ്പത്തിക അപകടസാധ്യതകള്‍ക്കെതിരായ പ്രതിരോധത്തിന്റെ ആദ്യ നിരയായി സജ്ജമാക്കേണ്ടത്. മാത്രമല്ല സര്‍ക്കാരിന്റെ വരുമാനത്തില്‍ ക്രിപ്റ്റോ ആസ്തികളുടെ വില വ്യതിയാനം പ്രതിഫലിക്കാന്‍ പാടില്ല.
കള്ളപ്പണം വെളുപ്പിക്കല്‍, തീവ്രവാദ പ്രവര്‍ത്തനങ്ങള്‍ക്കുള്ള ധനസഹായം, ക്രിപ്റ്റോ പോലുള്ള വിര്‍ച്വല്‍ ആസ്തികള്‍ മുന്നോട്ട് വയ്ക്കുന്ന ആയുധ വ്യാപന സാധ്യതകള്‍ എല്ലാം എഫ്എസ്ബിയും ഐഎംഎഫും ചര്‍ച്ച ചെയ്തു.
ഐഎംഎഫ്, എഫ്എസ്ബി തുടങ്ങി മറ്റ് അന്താരാഷ്ട്ര ഓര്‍ഗനൈസേഷനുകളും സ്റ്റാന്‍ഡേര്‍ഡ് സെറ്റിംഗ് ബോഡികളും ജി 20 അധികാരപരിധിക്ക് പുറത്തുള്ള കാര്യങ്ങളും ഇതില്‍ ചര്‍ച്ച ചെയ്യുന്നുണ്ട്. ആഗോള ഏകോപനം, സഹകരണം, വിവരങ്ങള്‍ പങ്കിടല്‍, പരിമിതമായ ക്രിപ്‌റ്റോയുമായി ബന്ധപ്പെട്ട ഡാറ്റയുടെ കുറവ് പരിഹരിക്കുക തുടങ്ങിയ വിഷയങ്ങളില്‍ കാര്യമായ ഇടപെടലുകള്‍ നടത്തുന്നുണ്ട്.