ഓൺലൈൻ ഗെയിമിംഗ് നിരോധനം: നസാര ടെക്‌നോളജീസിന് ഇടിവ്

നസാര ടെക്നോളജീസിന്റെ ഓഹരികൾ ഇന്ന് വ്യാപാരത്തിനിടയിൽ 4 ശതമാനം ഇടിഞ്ഞു. സംസ്ഥാനത്ത് ഓൺലൈൻ ഗെയിമിംഗ് നിരോധിക്കാനുള്ള ഓർഡിനൻസ് തമിഴ്‌നാട് ​ഗവൺമെ​ന്റ് അംഗീകരിച്ചതിന് പിന്നാലെയാണ് വിലയിടിഞ്ഞത്. ഗവർണറുടെ അനുമതി ലഭിച്ചാലുടൻ ഇത് നിയമമാകും. യുവാക്കൾ ഇത്തരം ഓൺലൈൻ ഗെയിമുകളിൽ അടിമപ്പെടുന്നുവെന്നും, ഓൺലൈൻ ബെറ്റിങ് ഗെയിമിലൂടെ വലിയ തോതിൽ പണം ധൂർത്തടിക്കുന്നണ്ടെന്നും കണ്ടെത്തിയതിനെത്തുടർന്ന് രൂപീകരിച്ച വിദഗ്ധ സമിതിയുടെ ശുപാർശയുടെ അടിസ്ഥാനത്തിലാണ് ഈ തീരുമാനം. കഴിഞ്ഞ മൂന്ന് ദിവസങ്ങളിലായി ഓഹരി 13 ശതമാനമാണ് ഇടിഞ്ഞത്. ഇന്ന് 669.80 രൂപയിൽ വ്യാപാരം ആരംഭിച്ച ഓഹരി 653.45 രൂപ വരെ താഴ്ന്നു. തുടർന്ന് 3.21 ശതമാനം നഷ്ടത്തിൽ 658.20 ൽ വ്യാപാരം അവസാനിപ്പിച്ചു.