എൻ.ആർ.ഐ.കൾക്ക് ആധാർ കാർഡ്: പുതിയ നിയമങ്ങളും നടപടിക്രമങ്ങളും

ആധാർ നിയമം അനുസരിച്ച്, 182 ദിവസമോ അതിൽ കൂടുതലോ ഇന്ത്യയിൽ താമസിക്കുന്ന വ്യക്തിയെ ആണ് ഒരു റസിഡൻ്റ് ആയി കണക്കാക്കുന്നത്. എന്നാൽ, 2019 ജൂലൈയിൽ പുതിയ നിയമം വന്നതോടെ, യുണീക്ക് ഐഡൻ്റിഫിക്കേഷൻ അതോറിറ്റി ഓഫ് ഇന്ത്യ (യുഐഡിഎഐ) ഇന്ത്യൻ പാസ്‌പോർട്ടുള്ള എൻ.ആർ.ഐ.കൾക്ക് ആധാർ കാർഡുകൾ നൽകാൻ തുടങ്ങി. ഇത് 182 ദിവസത്തെ കാത്തിരിപ്പ് ഒഴിവാക്കി എൻ.ആർ.ഐ.കൾക്ക് വേഗത്തിൽ ആധാർ ലഭ്യമാക്കുന്നു.

പുതിയ അപ്‌ഡേറ്റുകൾ എൻ.ആർ.ഐ.കൾക്ക് ആധാർ കാർഡ് നേടുന്നത് കാര്യക്ഷമവും ലളിതവുമാക്കി. 2024 ജനുവരി 16-ന് യുഐഡിഎഐ പുതിയ നിയമങ്ങൾ അവതരിപ്പിച്ചു. ആധാർ എൻറോൾമെൻ്റിനും അപ്‌ഡേറ്റുകൾക്കുമുള്ള പുതുക്കിയ ഫോമുകൾ ഇപ്പോൾ റസിഡന്റ്സിനും പ്രവാസി ഇന്ത്യക്കാർക്കും (എൻആർഐ) വെവ്വേറെ നൽകുന്നു. ഇത് എൻ.ആർ.ഐ.കൾക്ക് ഏത് ആധാർ കേന്ദ്രത്തിലും അപേക്ഷിക്കാനും എൻറോൾമെൻ്റ് സെൻ്റർ സന്ദർശിച്ച് സെൻട്രൽ ഐഡൻ്റിറ്റി ഡാറ്റാ ശേഖരണത്തിൽ (സിഐഡിആർ) വിവരങ്ങൾ അപ്‌ഡേറ്റ് ചെയ്യാനും അനുവദിക്കുന്നു.

എൻആർഐകൾക്ക് ഇന്ത്യയിൽ ആധാർ കാർഡിനായി എങ്ങനെ അപേക്ഷിക്കാം, ആവശ്യമായ രേഖകൾ, ഏറ്റവും പുതിയ അപ്ഡേറ്റുകൾ എന്നിവ എന്തെല്ലാം എന്ന് വിശദമായി നോക്കാം.

പുതിയ ഫോമുകൾ:

ആധാർ എൻറോൾമെൻ്റിനും അപ്ഡേറ്റുകൾക്കുമുള്ള പുതുക്കിയ ഫോമുകൾ ഇപ്പോൾ പ്രായപരിധിയെ അടിസ്ഥാനമാക്കി താമസക്കാർക്കും എൻആർഐകൾക്കും വെവ്വേറെ ലഭ്യമാണ്. പ്രധാനപ്പെട്ട ഫോമുകൾ താഴെ പറയുന്നവയാണ്:

• ഫോം 1: 18 വയസ്സിന് മുകളിലുള്ള താമസക്കാർക്കും എൻആർഐകൾക്കും (ഇന്ത്യൻ വിലാസ തെളിവ് സഹിതം)
• ഫോം 2: ഇന്ത്യക്ക് പുറത്തുള്ള വിലാസ തെളിവ് ഉള്ള എൻആർഐകൾക്ക്
• ഫോം 3-6: 5 വയസ്സ് മുതൽ 18 വയസ്സിന് താഴെയുള്ള കുട്ടികൾക്ക് (പ്രായം, വിലാസ തെളിവ് അനുസരിച്ച്)
• ഫോം 7: 18 വയസ്സിന് മുകളിലുള്ള വിദേശ പൗരന്മാർക്ക്
• ഫോം 8: 18 വയസ്സിന് താഴെയുള്ള വിദേശ പൗരന്മാർക്ക്

അപേക്ഷാ നടപടിക്രമം

ആധാർ കേന്ദ്രത്തിൽ അപ്പോയിന്റ്‌മെന്റ്‌ ബുക്ക്‌ ചെയ്യുക: UIDAI-യുടെ ഔദ്യോഗിക വെബ്‌സൈറ്റിൽ ('Book an Appointment' എന്ന വിഭാഗത്തിൽ) നിങ്ങളുടെ നഗരം/ലൊക്കേഷൻ തിരഞ്ഞെടുക്കുക. 'നോൺ-റെസിഡന്റ് ഇന്ത്യൻ' എന്ന ഓപ്ഷൻ തിരഞ്ഞെടുത്ത് നിങ്ങളുടെ ഇമെയിൽ ഐഡി നൽകി അപ്പോയിന്റ്‌മെന്റ്‌ ബുക്ക്‌ ചെയ്യുക.

ആവശ്യമായ രേഖകൾ:

• സാധുവായ ഇന്ത്യൻ പാസ്‌പോർട്ട് (എൻആർഐകൾക്ക് നിർബന്ധം)
• താമസവും ജനനത്തീയതിയും തെളിയിക്കുന്ന രേഖകൾ

ആധാർ കേന്ദ്രത്തിൽ സമർപ്പിക്കേണ്ട രേഖകൾ: അപ്പോയിന്റ്‌മെന്റ്‌ ദിവസം മുകളിൽ പറഞ്ഞ എല്ലാ രേഖകളും (ഒറിജിനൽ, ഫോട്ടോകോപ്പി) കൊണ്ടുവരിക.

ആധാർ കാർഡിന് അപേക്ഷിക്കുന്നതിനുള്ള നടപടിക്രമം:

• UIDAI-യുടെ ഔദ്യോഗിക വെബ്‌സൈറ്റ് സന്ദർശിച്ച് ഒരു അപ്പോയിന്റ്മെന്റ് ബുക്ക് ചെയ്യുക.
• അപ്പോയിന്റ്മെന്റ് ദിവസം, ആവശ്യമായ രേഖകളുടെ അസലും പകർപ്പുകളുമായി എത്തിച്ചേരുക.

യു ഐ ഡി എ ഐ  ഉദ്യോഗസ്ഥർ നിങ്ങളുടെ രേഖകൾ പരിശോധിച്ച് ആവശ്യമായ വിരലടയാളം, കണ്ണിലെ ഐറിസ് സ്കാൻ, ഫോട്ടോ എന്നിവ എടുക്കും. ഇതെല്ലാം സിസ്റ്റത്തിൽ അപ്‌ലോഡ് ചെയ്ത് നിങ്ങൾക്ക് ഒരു 12 അക്ക ആധാർ നമ്പർ നൽകും. സാധാരണയായി 90 ദിവസത്തിനുള്ളിൽ ആധാർ കാർഡ് തപാൽ മുഖേന നിങ്ങളുടെ വിലാസത്തിൽ ലഭിക്കും.