സ്ഥിരതയുള്ള യുവാന്‍ സ്വപ്‌നമാകുമോ?

ശക്തമായ കറന്‍സി എന്ന ചൈനീസ് സ്വപ്‌നത്തിന് ഡൊണാള്‍ഡ് ട്രംപിന്റെ തിരിച്ചുവരവ് തിരിച്ചടിയാകും. ആഗോള വ്യാപാരത്തില്‍ ഉയര്‍ന്നുവരുന്ന പങ്ക് വഹിക്കാന്‍ സ്ഥിരതയുള്ള ശക്തമായ കറന്‍സി ആവശ്യമാണ്. ഇതാണ് ചൈനീസ് പ്രസിഡന്റ് ഷി ജിന്‍പിംഗിന്റെ സ്വപ്നം.

രണ്ടാം ട്രംപ് ഭരണകാലത്ത് യുവാനിന്റെ മൂല്യമിടിയാനാണ് കൂടുതല്‍ സാധ്യത കല്‍പ്പിക്കപ്പെടുന്നത്. മറ്റൊരു വ്യാപാര യുദ്ധത്തിന്റെ ഭീഷണി ഇതിനകം തന്നെ കറന്‍സിക്കെതിരായ പന്തയങ്ങള്‍ക്ക് ആക്കം കൂട്ടുന്നു. 2025-ല്‍ യുവാന്‍ ഡോളറിനെതിരെ 17 വര്‍ഷത്തെ ഏറ്റവും താഴ്ന്ന നിലയിലേക്കെത്തുമെന്ന് അനലിസ്റ്റുകള്‍ പ്രതീക്ഷിക്കുന്നു.

കഴിഞ്ഞ വ്യാപാരയുദ്ധകാലത്തെക്കാള്‍ ദുര്‍ബലമാണ് യുവാന്‍. ചൈനീസ് ഗവണ്‍മെന്റ് ബോണ്ട് വരുമാനം യുഎസിലേതിനേക്കാള്‍ വളരെ താഴെയാണ്. വിദേശ കമ്പനികള്‍ നിക്ഷേപം പിന്‍വലിക്കുന്നു. സാമ്പത്തിക വളര്‍ച്ച മോശമാണ്. പണപ്പെരുപ്പം കാരണം പലിശ നിരക്കുകള്‍ ഇനിയും താഴ്ത്തിയേക്കാം.

പീപ്പിള്‍സ് ബാങ്ക് ഓഫ് ചൈന ഒരു വലിയ മൂല്യത്തകര്‍ച്ചയെക്കുറിച്ചുള്ള ആശങ്കകള്‍ കണക്കിലെടുത്ത് കുറച്ചുകാലത്തേക്ക് യുവാനെ പിന്തുണയ്ക്കുന്നത് തുടരുമെന്ന് മാര്‍ക്കറ്റ് ഇക്കണോമിസ്റ്റ് ആദം വോള്‍ഫ് പറഞ്ഞു. എന്നാല്‍ ഒരു വ്യാപാര യുദ്ധം ആരംഭിക്കുകയാണെങ്കില്‍ കാര്യങ്ങള്‍ മാറിമറിയാന്‍ സാധ്യതയേറെയാണ്.

. ഓണ്‍ഷോര്‍ യുവാന്‍ നവംബര്‍ 14 ന് ഏകദേശം 7.248 എന്ന താഴ്ന്ന നിലവാരത്തിലാണ് വ്യാപാരം നടത്തിയത്, ഇത് മൂന്ന് മാസത്തെ ഏറ്റവും ദുര്‍ബലമായ നിലയാണ്. കൂടാതെ ഓപ്ഷനുകള്‍ വ്യാപാരികള്‍ കൂടുതല്‍ ഇടിവ് പ്രതീക്ഷിക്കുന്നു. വെള്ളിയാഴ്ച 7.237 ആയിരുന്നു ഓഫ്ഷോര്‍ നിരക്ക്.

ചൈനീസ് ഉല്‍പന്നങ്ങള്‍ക്ക് 60% താരിഫ് ഏര്‍പ്പെടുത്തുമെന്ന ട്രംപ് പ്രതിജ്ഞ പാലിച്ചാല്‍ ഡോളര്‍-യുവാന്‍ 7.5 ആയി സ്ഥിരത കൈവരിക്കുമെന്ന് പാരിബാസ് എസ് എ പ്രതീക്ഷിക്കുന്നു.

യുവാനെ ദുര്‍ബലപ്പെടുത്താന്‍ അനുവദിക്കുന്നത് ഏറ്റവും കുറഞ്ഞ പ്രതിരോധത്തിന്റെ പാതയാണെന്നും യുഎസ് താരിഫ് വര്‍ധിപ്പിച്ചാല്‍ ചൈനീസ് കയറ്റുമതിക്ക് ഗുണം ചെയ്യുമെന്നും വിശകലന വിദഗ്ധര്‍ പറയുന്നു.

2015-ല്‍ ബെയ്ജിംഗ് ഒരു യുവാന്‍ മൂല്യത്തകര്‍ച്ച വരുത്തി. പീപ്പിള്‍സ് ബാങ്ക് ഓഫ് ചൈന പ്രതിദിന ഫിക്‌സിംഗ് നിരക്കില്‍ 1.9% ഇടിവ് അനുവദിച്ചു. അത് വന്‍തോതിലുള്ള മൂലധന ഒഴുക്കിന് കാരണമാവുകയും ചൈനയുടെ വിദേശ നാണയ ശേഖരം ചുരുക്കുകയും ചെയ്തു.

കഴിഞ്ഞ കുറച്ച് വര്‍ഷങ്ങളായി, ഫെഡറല്‍ റിസര്‍വിന്റെ അതിവേഗ പലിശ നിരക്ക് വര്‍ധന ലോകമെമ്പാടുമുള്ള കറന്‍സികളെ ബാധിച്ചതിനാല്‍ ചൈന അതിന്റെ ടൂള്‍കിറ്റ് പരിഷ്‌കരിച്ചിട്ടുണ്ട്.

സെപ്റ്റംബര്‍ അവസാനത്തില്‍ ചൈനീസ് ബാങ്ക് ഒരു ആഭ്യന്തര ഉത്തേജക പദ്ധതി ആരംഭിച്ചു. പദ്ധതി വിജയകരമാണെങ്കില്‍, യുഎസ് താരിഫുകളില്‍ നിന്നുള്ള ആഘാതത്തില്‍ നിന്ന് സമ്പദ് വ്യവസ്ഥയെ കുതിക്കാന്‍ ഇത് സഹായിക്കുമെന്ന് വിദഗ്ധര്‍ പറയുന്നു.

വിരോധാഭാസമെന്നു പറയട്ടെ, ഡോളറിനെതിരെ യുവാന്റെ ഇടിവ് തടയാനുള്ള ചൈനയുടെ ലക്ഷ്യത്തിന് ട്രംപില്‍ നിന്ന് തന്നെ പിന്തുണ ലഭിച്ചേക്കാം. തിരഞ്ഞെടുക്കപ്പെട്ട പ്രസിഡന്റ് ദുര്‍ബലമായ ഡോളറിനെ അനുകൂലിക്കുന്നു, ഇത് ലോകത്തിന്റെ മറ്റു ഭാഗങ്ങളില്‍ യുഎസ് ഉല്‍പ്പന്നങ്ങള്‍ വിലകുറഞ്ഞതാക്കും.

ചൈനയെ ആഗോള സാമ്പത്തിക ശക്തിയാക്കി മാറ്റാനുള്ള ഷിയുടെ വിശാലാഭിലാഷത്തിന്റെ ഭാഗമായ കറന്‍സിയുടെ അന്താരാഷ്ട്രവല്‍ക്കരണത്തെ വര്‍ഷങ്ങളായി പ്രോത്സാഹിപ്പിക്കുകയാണ് ബെയ്ജിംഗ്.