യുഎസിന്റെ തീരുവ പ്രഖ്യാപനം; ജാഗ്രതയോടെ പ്രതികരിച്ച് രാജ്യങ്ങള്‍

യുഎസ് പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ച പുതിയ താരിഫുകള്‍ക്ക് പ്രധാന വ്യാപാര പങ്കാളികളില്‍നിന്ന് ജാഗ്രതയോടെയുള്ള പ്രതികരണമാണ് ഉണ്ടായത്. ഒരു പൂര്‍ണ വ്യാപാരയുദ്ധത്തിനുള്ള താല്‍പ്പര്യക്കുറവിനെ ഇത് എടുത്തുകാണിക്കുന്നു.

നികുതികള്‍ 10% മുതല്‍ 49% വരെ വ്യത്യാസപ്പെട്ടിരിക്കുന്നു. പതിറ്റാണ്ടുകളായി യുഎസ് ഉല്‍പ്പന്നങ്ങള്‍ക്ക് മറ്റ് രാജ്യങ്ങള്‍ ചുമത്തിയിരുന്ന നികുതികള്‍ ഇന്ന് അമേരിക്ക അവരുടെ വ്യാപാര പങ്കാളികള്‍ക്കും തിരിച്ച് നല്‍കുകയാണ്.

ട്രംപിന്റെ പ്രഖ്യാപനത്തോടെ വിപണികള്‍ തകര്‍ച്ചയിലായി. ഏഷ്യയില്‍ ടോക്കിയോ വിപണി ഏറ്റവും വലിയ നഷ്ടത്തിലായി. എണ്ണവില ബാരലിന് 2 ഡോളറിലധികം ഇടിഞ്ഞു, ബിറ്റ്‌കോയിന്റെ വില 4.4% കുറഞ്ഞു.

ട്രംപിന്റെ പ്രഖ്യാപനത്തിന് തൊട്ടുപിന്നാലെ, യുകെയുടെ 'ഏറ്റവും അടുത്ത സഖ്യകക്ഷി'യായി അമേരിക്ക തുടരുന്നുവെന്ന് ബ്രിട്ടീഷ് സര്‍ക്കാര്‍ പറഞ്ഞു.

ട്രംപ് പ്രഖ്യാപിച്ച ബ്രിട്ടീഷ് ഉല്‍പ്പന്നങ്ങള്‍ക്ക് 10% തീരുവ ഏര്‍പ്പെടുത്തുന്നതിന്റെ ആഘാതം കുറയ്ക്കുന്നതിനായി ഒരു വ്യാപാര കരാറില്‍ ഏര്‍പ്പെടുമെന്ന് യുകെ പ്രതീക്ഷിക്കുന്നതായി ബിസിനസ് സെക്രട്ടറി ജോനാഥന്‍ റെയ്‌നോള്‍ഡ്‌സ് പറഞ്ഞു.

യൂറോപ്യന്‍ യൂണിയനെതിരായ പുതിയ 20% താരിഫുകള്‍ 'തെറ്റാണ്' എന്ന് ഇറ്റലിയുടെ പ്രധാനമന്ത്രി ജോര്‍ജിയ മെലോണി വിശേഷിപ്പിച്ചു, അവ ഇരു കക്ഷികള്‍ക്കും ഗുണം ചെയ്യുന്നില്ലെന്ന് പറഞ്ഞു.

ഈ കേസ് ലോക വ്യാപാര സംഘടനയെ അറിയിക്കുന്ന കാര്യം പരിഗണിക്കുകയാണെന്ന് ബ്രസീല്‍ സര്‍ക്കാര്‍ അറിയിച്ചു. പിന്നീട്, ഐക്യത്തിന്റെ അപൂര്‍വ പ്രകടനമായി, ബ്രസീലിയന്‍ കോണ്‍ഗ്രസ് ഏകകണ്ഠമായി ഒരു ബില്‍ പാസാക്കി. ഇത് ബ്രസീലിയന്‍ ഉല്‍പ്പന്നങ്ങള്‍ക്ക് തീരുവ ചുമത്തുന്ന ഏതൊരു രാജ്യത്തിനോ വ്യാപാര കൂട്ടായ്മയ്ക്കോ എതിരെ പ്രതികാരം ചെയ്യാന്‍ തങ്ങളുടെ സര്‍ക്കാരിനെ അനുവദിക്കുന്നു.

ദക്ഷിണ കൊറിയയുടെ ആക്ടിംഗ് നേതാവായ പ്രധാനമന്ത്രി ഹാന്‍ ഡക്ക്-സൂ താരിഫ് മൂലം ഉണ്ടാകാവുന്ന നഷ്ടം പരിശോധിച്ചുവരികയാണ്.

'സ്വന്തം അവകാശങ്ങളും താല്‍പ്പര്യങ്ങളും സംരക്ഷിക്കുന്നതിന് ബെയ്ജിംഗ് ദൃഢനിശ്ചയത്തോടെ പ്രതിനടപടികള്‍ സ്വീകരിക്കുമെന്ന്' ചൈനയുടെ വാണിജ്യ മന്ത്രാലയം പറഞ്ഞു. ഏകപക്ഷീയമായ താരിഫ് നടപടികള്‍ ഉടന്‍ റദ്ദാക്കാനും സംഭാഷണത്തിലൂടെ വ്യാപാര പങ്കാളികളുമായുള്ള അഭിപ്രായവ്യത്യാസങ്ങള്‍ ശരിയായി പരിഹരിക്കാനും ചൈന അമേരിക്കയോട് ആവശ്യപ്പെട്ടു.

തന്റെ രാജ്യത്തിനുമേല്‍ ചുമത്തിയ യുഎസ് തീരുവകള്‍ തികച്ചും അനാവശ്യമാണെന്ന് ഓസ്ട്രേലിയന്‍ പ്രധാനമന്ത്രി ആന്റണി അല്‍ബനീസ് പറഞ്ഞു. യുഎസും ഓസ്ട്രേലിയയും തമ്മില്‍ ഒരു സ്വതന്ത്ര വ്യാപാര കരാറുണ്ട്, കൂടാതെ യുഎസിന് ഓസ്ട്രേലിയയുമായി വ്യാപാര മിച്ചവുമുണ്ട്. ഇത് ഒരു സുഹൃത്തിന്റെ പ്രവൃത്തിയല്ലെന്നും ഓസ്‌ട്രേലിയ പറഞ്ഞു.

സൗത്ത് പസഫിക് ഔട്ട്പോസ്റ്റായ നോര്‍ഫോക്ക് ദ്വീപില്‍ 29% തീരുവ ചുമത്തിയത് ഞെട്ടലുണ്ടാക്കി. ഏകദേശം 2,000 മാത്രം ജനസംഖ്യയുള്ള ഓസ്ട്രേലിയന്‍ പ്രദേശത്ത് ടൂറിസത്തെ ചുറ്റിപ്പറ്റിയാണ് സമ്പദ്വ്യവസ്ഥ നിലനില്‍ക്കുന്നത്.

അമേരിക്കയുമായുള്ള സ്വതന്ത്ര വ്യാപാര കരാറിന് കീഴില്‍ ഇതിനകം യോഗ്യത നേടിയ ഉല്‍പ്പന്നങ്ങള്‍ക്ക് മെക്‌സിക്കോയും കാനഡയും പുതിയ താരിഫുകളുടെ പരിധിയില്‍ നിന്ന് തല്‍ക്കാലം ഒഴിവാക്കപ്പെട്ടു. എന്നിരുന്നാലും, മുമ്പ് പ്രഖ്യാപിച്ച 25% താരിഫ് പ്രാബല്യത്തില്‍ വരുമെന്ന് നിശ്ചയിച്ചിരുന്നു.