ജനുവരിയില്‍ പെട്രോള്‍, ഡീസല്‍ വില്‍പ്പന 9 % ഉയര്‍ന്നു

ന്യൂഡെല്‍ഹി: ജനുവരിയില്‍ പെട്രോളിന്റെ ഉപഭോഗം ഒരു വര്‍ഷം മുമ്പത്തേതിനേക്കാള്‍ 9.3% വര്‍ദ്ധിച്ചു. ഡിസംബറില്‍ മന്ദഗതിയിലായ വില്‍പ്പനയ്ക്ക് ശേഷം ആളുകള്‍ അവരുടെ അവധിക്കാല ഇടവേളകളില്‍ നിന്ന് ഓഫീസിലേക്ക് മടങ്ങിയെത്തുകയും സാമ്പത്തിക പ്രവര്‍ത്തനങ്ങള്‍ വര്‍ദ്ധിക്കുകയും ചെയ്തതിനാല്‍ ഡീസലിന്റെ ഉപഭോഗം 3.1% ഉയര്‍ന്നു.

ഏപ്രില്‍-ജനുവരി കാലയളവില്‍ പെട്രോളിന്റെയും ഡീസലിന്റെയും വില്‍പ്പന യഥാക്രമം 6.1 ശതമാനവും 4.3 ശതമാനവും ഉയര്‍ന്നതായി എണ്ണ മന്ത്രാലയത്തിന്റെ പെട്രോളിയം പ്ലാനിംഗ് ആന്‍ഡ് അനാലിസിസ് സെല്‍ പ്രസിദ്ധീകരിച്ച താല്‍ക്കാലിക വില്‍പ്പന ഡാറ്റ വ്യക്തമാക്കുന്നു.

 കേന്ദ്ര ഉടമയിലുള്ള എണ്ണ  ശുദ്ധീകരണ കമ്പനികൾ  ജനുവരിയില്‍ 8 ശതമാന൦  കൂടുതല്‍ പെട്രോളും 1.8 ശതമാനം ഡീസലും വിറ്റഴിച്ചു.

വിമാന  ഇന്ധന വില്‍പ്പന ജനുവരിയില്‍ 6.2 ശതമാനം ഉയര്‍ന്നു. ഈ സാമ്പത്തിക വര്‍ഷം ഇതുവരെ ഇത് 11.8% വളര്‍ച്ച നേടി. ഉത്തരേന്ത്യയിലെ മൂടല്‍മഞ്ഞ് കാരണം വിമാനങ്ങള്‍ റദ്ദാക്കിയതാണ് ജനുവരിയിലെ കുറഞ്ഞ വില്‍പ്പന വളര്‍ച്ചയ്ക്ക് കാരണം. സര്‍ക്കാര്‍ ഉടമസ്ഥതയിലുള്ള കമ്പനികളെ സംബന്ധിച്ചിടത്തോളം ജനുവരിയിലെ വില്‍പ്പന വളര്‍ച്ച വെറും 1.7% മാത്രമാണ്.

പാചക വാതക ഉപഭോഗം ജനുവരിയില്‍ 6.9 ശതമാനവും ഏപ്രില്‍-ജനുവരി കാലയളവില്‍ 2.8 ശതമാനവും വര്‍ദ്ധിച്ചു. പാചകവാതക വിതരണം പൂര്‍ണമായും സര്‍ക്കാര്‍ നിയന്ത്രണത്തിലുള്ള കമ്പനികളയുടെ കൈകളിലാണ്. .