മറൈന്‍ ഡ്രൈവില്‍ നിന്നും ഉല്ലാസയാത്രയ്ക്ക് തയ്യാറായി കേരളത്തിന്റെ ആഢംബര കപ്പല്‍

വിനോദ സഞ്ചാരികളെ വരവേല്‍ക്കാനൊരുങ്ങുന്ന കേരളത്തിലെ ഏറ്റവും വലിയ ആഢംബര കപ്പലായ കേരളത്തിന്റെ സ്വന്തം ക്ലാസിക് ഇംപീരിയല്‍. മലയാളിയുടെ  ആദ്യത്തെ അനുഭവമാണിത്.

ടൂറിസ്റ്റ് ബോട്ട് സര്‍വ്വീസ് മേഖലയില്‍ 22 വര്‍ഷമായി പ്രവര്‍ത്തിക്കുന്ന വല്ലാര്‍പാടം സ്വദേശി നിഷിജിത്ത് കെ. ജോണിന്റെ മൂന്ന് വര്‍ഷക്കാലത്തെ പ്രയത്നത്തിന്റെ ഫലമാണ് വരും ദിവസങ്ങളില്‍ നീറ്റിലിറങ്ങാന്‍ തയ്യാറെടുക്കുന്ന 'ക്ലാസിക് ഇംപീരിയല്‍' എന്ന ആഢംബര കപ്പല്‍. നിഷിജിത്തിന്റെ ആറാമത്തെ സംരംഭം കൂടിയാണ് ഐആര്‍എസ് 185 ക്ലാസിഫിക്കേഷനിലുള്ള 50 മീറ്റര്‍ നീളമുള്ള ഈ വെസ്സല്‍. അതേസമയം വളരെ മികച്ച രീതിയില്‍ സമര്‍പ്പണത്തോടെയാണ് കപ്പല്‍ നിര്‍മ്മാണം പുരോഗമിച്ചതെന്ന് സംസ്ഥാന വ്യവസായ മന്ത്രി പി രാജീവ് കപ്പല്‍ സന്ദര്‍ശന വേളയില്‍ അഭിപ്രായപ്പെട്ടു.

വല്ലാര്‍പാടം കണ്ടെയ്നര്‍ ടെര്‍മിനലിന് സമീപമുളള രാമന്‍ തുരുത്തില്‍ പോര്‍ട്ട് ട്രസ്റ്റിന്റെ സ്ഥലം 1.20 ലക്ഷം രൂപ പ്രതിമാസ വാടകയ്ക്കെടുത്താണു നിര്‍മാണ കേന്ദ്രം ഒരുക്കിയത്.

മറൈന്‍ ഡ്രൈവില്‍ സ്വന്തമായി നിര്‍മ്മിച്ച ഫ്ളോട്ടിങ് ജെട്ടിയില്‍ നിന്നാകും ക്ലാസിക് ഇംപീരിയല്‍ കടലിലേക്കുള്ള ഉല്ലാസയാത്രകള്‍ തുടങ്ങുക എന്നതാണ് മറ്റൊരു പ്രത്യേകത. യാത്രക്കാരുമായി മറൈന്‍ ഡ്രൈവില്‍ നിന്നു പുറം കടലിലേക്കാണ് യാത്ര. 150 യാത്രക്കാരെ വരെ ഉള്‍ക്കൊള്ളാനുള്ള സൗകര്യം ഈ കപ്പലിനുണ്ട്.

2000 രൂപ ചാര്‍ജ് വരുന്ന ലഞ്ച് ക്രൂസിന് ഉദ്ഘാടന ഓഫറായി 1500 രൂപയ്ക്കു യാത്ര ചെയ്യാന്‍ സാധിക്കും. സണ്‍സെറ്റ് ക്രൂസിന് 3000 രൂപയാണ് ചാര്‍ജ്, ഉദ്ഘാടന ഓഫറായി ഇതിനും 2000 യായിരിക്കും ഈടാക്കുക.

30,000 വാട്സ് സൗണ്ട് സിസ്റ്റവും ലൈറ്റുകളും, ഡിജെ, മ്യൂസിക് ബാന്‍ഡ്, ഡാന്‍സ് ഉള്‍പ്പെടെയുള്ള ഉല്ലാസ പരിപാടികളും എസി, നോണ്‍ എസി ഭക്ഷണശാലയും ഫീ ഡിങ് റൂമും അടക്കമുള്ള സൗകര്യങ്ങള്‍ കപ്പലില്‍ ഒരുക്കിയിട്ടുണ്ട്.