സെൻസെക്‌സ് 430 പോയിന്റ് ഇടിഞ്ഞു; നിഫ്റ്റി 18,000ന് താഴെയെത്തി

മുംബൈ: കഴിഞ്ഞ ദിവസത്തെ കുത്തനെയുള്ള നേട്ടത്തിന് ശേഷം ചൊവ്വാഴ്ച സെൻസെക്‌സ് 430 പോയിന്റ് ഇടിഞ്ഞു. നിക്ഷേപകരുടെ ശ്രദ്ധ റഷ്യ-യുക്രെയ്ൻ യുദ്ധത്തിലേക്ക് മടങ്ങി. എണ്ണവില ഉയരുന്നതും കാരണമാണെന്ന് വ്യാപാരികൾ അഭിപ്രായപ്പെട്ടു.

ബിഎസ്ഇ 435.24 പോയിന്റ് (0.72%) താഴ്ന്ന് 60,176.50 ൽ അവസാനിച്ചു. എൻഎസ്ഇ നിഫ്റ്റി 96 പോയിന്റ് (0.53%) ഇടിഞ്ഞ് 17,957.40ലും ക്ലോസ് ചെയ്തു.

സെൻസെക്‌സിൽ എച്ച്‌ഡിഎഫ്‌സി ബാങ്കാണ് ഏറ്റവും കൂടുതൽ നഷ്ടം നേരിട്ടത്. ബജാജ് ഫിൻസെർവ്, എച്ച്‌ഡിഎഫ്‌സി, കൊട്ടക് ബാങ്ക്, ഇൻഡസ്‌ഇൻഡ് ബാങ്ക്, ബജാജ് ഫിനാൻസ്, റിലയൻസ് ഇൻഡസ്ട്രീസ് എന്നിവയും നഷ്ടത്തിൽ അവസാനിച്ചു. മറുവശത്ത് എൻടിപിസി, പവർഗ്രിഡ്, ഐടിസി, ടൈറ്റൻ, ടിസിഎസ്, നെസ്‌ലെ ഇന്ത്യ എന്നിവ നേട്ടത്തിലാണ്, 3.40 ശതമാനം വരെ ഓഹരികൾ ഉയർന്നു.

സെൻസെക്‌സിൽ 17 ഓഹരികൾ നഷ്ടത്തിലും 13 എണ്ണം ലാഭത്തിലും ക്ലോസ് ചെയ്തു. ബാങ്കിംഗ്, സാമ്പത്തിക സൂചികകൾ 1.33 ശതമാനം വരെ കുത്തനെ ഇടിഞ്ഞപ്പോൾ പവർ സെ​ഗ്മെന്റ് 3.38 ശതമാനം ഉയർന്നു.

ഏഷ്യൻ വിപണികളിൽ ഷാങ്ഹായ്, ഹോങ്കോംഗ്, ടോക്കിയോ, സിയോൾ എന്നിവിടങ്ങളിലെ ഓഹരികൾ മികച്ച വ്യാപാരം നടത്തി.മിഡ് സെഷൻ ഡീലുകളിൽ യൂറോപ്പിലെ സ്റ്റോക്ക് എക്സ്ചേഞ്ചുകൾ നെഗറ്റീവ് നോട്ടിലാണ് വ്യാപാരം നടത്തുന്നത്.

ബ്രെന്റ് ക്രൂഡ് ബാരലിന് 1.59 ശതമാനം ഉയർന്ന് 109.24 ഡോളറിലെത്തി.

റഷ്യ കൂടുതൽ കടുത്ത സാമ്പത്തിക ഉപരോധം നേരിടേണ്ടി വരുമെന്ന ഊഹാപോഹങ്ങൾക്കിടയിൽ നിക്ഷേപകർ യുക്രെയ്നിലെ സംഭവവികാസങ്ങൾ സൂക്ഷ്മമായി നിരീക്ഷിക്കുന്നതായാണ് റിപ്പോർട്ടുകൾ.

സ്റ്റോക്ക് എക്‌സ്‌ചേഞ്ച് ഡാറ്റ അനുസരിച്ച്, തിങ്കളാഴ്ച വിപണിയിലെ കുതിച്ചുചാട്ടത്തിനിടയിൽ വിദേശ നിക്ഷേപക സ്ഥാപനങ്ങൾ(എഫ്‌ഐഐ) 1,150 കോടിയിലധികം രൂപ ഇക്വിറ്റികളിലേക്ക് നിക്ഷേപിച്ചു.