യുഎസ് ഇറക്കുമതി കുറഞ്ഞു, ഏഷ്യന്‍ വിപണികള്‍ സമ്മിശ്രം; ഇന്ന് വിപണി തുറക്കും മുമ്പ് അറിയേണ്ടത്

തുടക്കത്തിലെ വലിയ മുന്നേറ്റത്തില്‍ നിന്നിറങ്ങിയെങ്കിലും പച്ചയില്‍ തന്നെ വ്യാപാരം അവസാനിപ്പിക്കാന്‍ ബെഞ്ച്മാര്‍ക്ക് സൂചികകള്‍ക്കായി. 21500 എന്ന ലെവല്‍ നിഫ്റ്റി  നിലനിര്‍ത്തി എന്നത് ശ്രദ്ധേയമാണ്. വരുന്ന സെഷനുകളിലും 21,500 - 21,800 ശ്രേണിയില്‍ കണ്‍സോളിഡേഷന്‍ പ്രകടമാകാമെന്നാണ് വിദഗ്ധര്‍ വിലയിരുത്തുന്നത്. നിഫ്റ്റി 21500ന് താഴോട്ടിറങ്ങുകയാണ് എങ്കില്‍ കൂടുതല്‍ ശക്തമായ തിരുത്തലുകളിലേക്ക് അത് വഴിവെച്ചേക്കും. ഇന്നലെ ബിഎസ്ഇ സെൻസെക്‌സ് 31 പോയിന്റ് ഉയർന്ന് 71,386ലും നിഫ്റ്റി 50 32 പോയിന്റ് ഉയർന്ന് 21,545ലും എത്തി. 

ഉപഭോക്തൃ വസ്തുക്കളുടെ ഇറക്കുമതി ഒരു വർഷത്തെ ഏറ്റവും താഴ്ന്ന നിലയിലേക്ക് താഴ്ന്നതോടെ നവംബറിൽ യുഎസ് വ്യാപാര കമ്മി കുറഞ്ഞു. വ്യാപാര കമ്മി 2% കുറഞ്ഞ് 63.2 ബില്യൺ ഡോളറിലെത്തിയെന്ന് വാണിജ്യ വകുപ്പിന്റെ സെൻസസ് ബ്യൂറോ അറിയിച്ചു. ഇറക്കുമതി 1.9% അഥവാ 6.1 ബില്യൺ ഡോളർ കുറഞ്ഞ് 316.9 ബില്യൺ ഡോളറായി. കയറ്റുമതി 1.9% അല്ലെങ്കിൽ 4.8 ബില്യൺ ഡോളർ കുറഞ്ഞ് 253.7 ബില്യൺ ഡോളറായി. ഇത് യുഎസ് വിപണികളെയും ആഗോള വിപണികളെയും നെഗറ്റിവായി സ്വാധീനിക്കുന്നുണ്ട്. 

നിഫ്റ്റിയുടെ പ്രതിരോധവും പിന്തുണയും

പിവറ്റ് പോയിന്റ് കാൽക്കുലേറ്റർ സൂചിപ്പിക്കുന്നത് നിഫ്റ്റി 21,564 ലും തുടർന്ന് 21,723ലും 21,802ലും പ്രതിരോധം കാണാനിടയുണ്ട്. അതേസമയം താഴ്ചയുടെ സാഹചര്യത്തില്‍ 21,517ലും തുടർന്ന് 21,468ലും 21,389ലും പിന്തുണ നേടിയേക്കും.

ആഗോള വിപണികളില്‍ ഇന്ന്

ചൊവ്വാഴ്ച യുഎസ് വിപണികള്‍ പൊതുവില്‍ നെഗറ്റിവ് തലത്തിലായിരുന്നു. ഡൗ ജോൺസ് ഇൻഡസ്ട്രിയൽ ആവറേജ് 157.85 പോയിൻറ് അഥവാ 0.42 ശതമാനം ഇടിഞ്ഞ് 37,525.16 ലും എസ് ആന്റ് പി 500 7.04 പോയിൻറ് അഥവാ 0.15 ശതമാനം കുറഞ്ഞ് 4,756.50 ലും എത്തി. നാസ്ഡാക്ക് കോമ്പോസിറ്റ് 13.94 പോയിന്റ് അഥവാ 0.09 ശതമാനം ഉയർന്ന് 14,857.71 എന്ന നിലയിലാണ് വ്യാപാരം അവസാനിപ്പിച്ചത്.

ഏഷ്യന്‍ വിപണികളില്‍ ബുധനാഴ്ചത്തെ  വ്യാപാരം ആരംഭിച്ചിട്ടുള്ളത് സമ്മിശ്രമായ തലത്തിലാണ്. ജപ്പാന്‍റെ നിക്കി, ചൈനയുടെ ഷാങ്ഹായ്, ഹോംഗ്കോംഗിന്‍റെ ഹാങ്സെങ് എന്നിവ നേട്ടത്തിലാണ്. ദക്ഷിണ കൊറിയയുടെ കോസ്പി, ഓസ്ട്രേലിയ എഎസ്എക്സ്, തായ്വാന്‍ എസ്എസി എന്നിവ ഇടിവിലാണ് വ്യാപാരം നടത്തുന്നത്. വലിയ ചാഞ്ചാട്ടവും വിപണികളില്‍ പ്രകടമാകുന്നു.

ഗിഫ്റ്റ് നിഫ്റ്റി 30 പോയിന്‍റ് നഷ്ടത്തിലാണ് തുടങ്ങിയത്. ആഭ്യന്തര ബെഞ്ച്മാര്‍ക്ക് സൂചികകളുടെ നെഗറ്റിവ് തുടക്കത്തെ ഡെറിവേറ്റിവ് വിപണി സൂചിപ്പിക്കുന്നു.

ഇന്ന് ശ്രദ്ധ നേടുന്ന ഓഹരികള്‍

സ്‍റ്റീൽ സ്ട്രിപ്‍സ് വീൽസ്: 138.5 കോടി രൂപയ്ക്ക് എഎംഡബ്ല്യു ഓട്ടോകംപോണന്‍റിനെ ഏറ്റെടുത്തതായി സ്‍റ്റീൽ സ്ട്രിപ്‍സ് വീൽസ് പ്രഖ്യാപിച്ചു. എഎംഡബ്ല്യു ഓട്ടോകോംപോണന്റിലേക്ക് കമ്പനി 5 കോടി രൂപയുടെ ഇക്വിറ്റിയും 133.15 കോടി രൂപയുടെ ഇന്റർ കോർപ്പറേറ്റ് വായ്പയും നൽകി.

ഡെൽറ്റ കോർപ്പറേഷൻ: മൂന്നാം പാദത്തില്‍ കമ്പനിയുടെ അറ്റാദായം മുൻ വർഷം സമാന കാലയളവിനെ അപേക്ഷിച്ച് 59.34 ശതമാനം ഇടിഞ്ഞ് 34.48 കോടി രൂപയായി. വരുമാനം 15.58 ശതമാനം ഇടിഞ്ഞ് 231.74 കോടി രൂപയായി. കമ്പനിയുടെ ശക്തമായ ബിസിനസ്സ് വിഭാഗങ്ങളായ കാസിനോയും ഓൺലൈൻ ഗെയിമിംഗും, ഗണ്യമായ വരുമാന മാന്ദ്യം കാണിക്കുന്നു.

പവർ ഫിനാൻസ് കോർപ്പറേഷൻ: ഗുജറാത്തിലെ ഗിഫ്റ്റ് സിറ്റിയിൽ സ്ഥിതി ചെയ്യുന്ന ഇന്റർനാഷണൽ ഫിനാൻഷ്യൽ സർവീസസ് സെന്ററിൽ (ഐഎഫ്എസ്‌സി) പൂർണ്ണ ഉടമസ്ഥതയിലുള്ള സബ്‌സിഡിയറി ഫിനാൻസ് കമ്പനി സ്ഥാപിക്കുന്നതിനായി പിഎഫ്‌സിക്ക് ആർബിഐയിൽ നിന്ന് എന്‍ഒസി ലഭിച്ചു.

ലുപിൻ: യുഎസ് എഫ്‍ഡിഎ-യില്‍ നിന്ന് അനുമതി ലഭിച്ചതിന്‍റെ അടിസ്ഥാനത്തില്‍ യുഎസിൽ ബ്രോംഫെനാക് ഒപ്താൽമിക് സൊല്യൂഷൻ 0.07% ലോഞ്ച് ചെയ്യുന്നതായി ലുപിൻ പ്രഖ്യാപിച്ചു. തിമിര ശസ്ത്രക്രിയയ്ക്ക് വിധേയരായ രോഗികളിൽ വീക്കം, കണ്ണിലെ വേദന എന്നിവ കുറയ്ക്കാന്‍ ഇത് ഉപയോഗിക്കുന്നു.

ശ്യാം മെറ്റാലിക്‌സ് ആൻഡ് എനർജി: ക്വാളിഫൈഡ് ഇൻസ്റ്റിറ്റ്യൂഷണൽ പ്ലേസ്‌മെന്റ് (ക്യുഐപി) വഴി കമ്പനി 1,385 കോടി രൂപ സമാഹരിച്ചു. ക്യുഐപി കമ്മിറ്റി 10 രൂപ മുഖവിലയുള്ള 2,40,51,165 ഇക്വിറ്റി ഓഹരികൾ 38 ബയര്‍മാര്‍ക്കായി അനുവദിച്ചു. ഇക്വിറ്റി ഓഹരിക്ക് 576 രൂപയാണ് ഇഷ്യു വില. മൊത്തം 4,055 കോടി രൂപയ്‌ക്കുള്ള ബിഡ്ഡുകളാണ് ലഭിച്ചത്. 

ക്രൂഡ് ഓയിലും സ്വര്‍ണവും 

ഡിമാൻഡിനെ കുറിച്ചും വർദ്ധിച്ചുവരുന്ന വിതരണത്തെ കുറിച്ചുമുള്ള ആശങ്ക മിഡിൽ ഈസ്റ്റിലെ പിരിമുറുക്കങ്ങളുമായി നിക്ഷേപകര്‍ തുലനം ചെയ്യുകയാണ്. മുൻ സെഷനിൽ ഇടിഞ്ഞതിന് ശേഷം ജനുവരി 9 ന് എണ്ണ വില ഉയർന്നു. ബ്രെന്റ് ക്രൂഡ് ഫ്യൂച്ചറുകൾ 1.47 ഡോളർ അഥവാ 1.93 ശതമാനം ഉയർന്ന് ബാരലിന് 77.59 ഡോളറിലെത്തി, യുഎസ് വെസ്റ്റ് ടെക്സസ് ഇന്റർമീഡിയറ്റ് ക്രൂഡ് ഫ്യൂച്ചറുകൾ 1.47 ഡോളർ അഥവാ 2.08 ശതമാനം ഉയർന്ന് ബാരലിന് 72.24 ഡോളറിലെത്തി.

യുഎസ് പണപ്പെരുപ്പ കണക്കുകൾ വരുന്നതിന് മുന്നോടിയായി നിക്ഷേപകർ ജാഗ്രത പുലർത്തിയതിനാൽ ജനുവരി 9-ന് സ്വർണവില സ്ഥിരത പുലര്‍ത്തി. സ്‌പോട്ട് ഗോൾഡ് ഔൺസിന് 0.1 ശതമാനത്തിൽ താഴെ ഉയർന്ന് 2,029.06 ഡോളറിലെത്തി. യുഎസ് ഗോള്‍ഡ് ഫ്യൂച്ചറുകളും ഏകദേശം 0.1 ശതമാനം ഉയർന്ന് ഔൺസിന് 2,035.3 ഡോളറിലെത്തി.

വിദേശ നിക്ഷേപങ്ങളുടെ ഗതി

വിദേശ സ്ഥാപന നിക്ഷേപകർ (എഫ്‌ഐഐകൾ) ചൊവ്വാഴ്ച ഓഹരികളില്‍ 990.90 കോടി രൂപയുടെ അറ്റവില്‍പ്പന നടത്തിയപ്പോള്‍ ആഭ്യന്തര സ്ഥാപന നിക്ഷേപകർ (ഡിഐഐകൾ) 104.23 കോടി രൂപയുടെ വാങ്ങല്‍ നടത്തിയെന്ന് എൻഎസ്ഇയിൽ നിന്നുള്ള താൽക്കാലിക കണക്കുകൾ വ്യക്തമാക്കുന്നു.

 ഓഹരി വിപണി വാര്‍ത്തകള്‍ അറിയാന്‍

നിരാകരണം: ഈ ലേഖനം വിജ്ഞാനത്തെ മാത്രം ഉദ്ദേശിച്ചുള്ളതാണ്, നിക്ഷേപ ശുപാര്‍ശയല്ല. ഓഹരി നിക്ഷേപം വിപണിയുടെ ലാഭ നഷ്ട സാധ്യതകൾക്ക് വിധേയമാണ്. ഓഹരി വിപണിയിൽ നിക്ഷേപിക്കും മുമ്പെ അംഗീകൃത സാമ്പത്തിക വിദഗ്ധന്റെ സേവനം തേടേണ്ടതാണ്. നിക്ഷേപങ്ങളിലൂടെയുണ്ടാകുന്ന നഷ്ടങ്ങള്‍ക്ക് ലേഖകനോ മൈഫിന്‍ പോയിന്‍റിനോ ഉത്തവരാദിത്തം ഉണ്ടായിരിക്കുന്നതല്ല.

വിപണി തുറക്കും മുന്‍പുള്ള മൈഫിന്‍ ടിവിയിലെ ലൈവ് അവലോകനം കാണാം