ഏഷ്യൻ വിപണികളിലെ ദുർബലമായ പ്രവണതകൾക്കും മിഡിൽ ഈസ്റ്റിലെ സംഘര്‍ഷങ്ങളെ തുടര്‍ന്ന് ബ്രെന്റ് ക്രൂഡ് ഓയിൽ വിലയിലുണ്ടായ വർധനയ്‌ക്കുമിടയിൽ തിങ്കളാഴ്ചത്തെ ആദ്യ വ്യാപാരത്തിൽ ബെഞ്ച്മാർക്ക് ഇക്വിറ്റി സൂചികകൾ ഇടിഞ്ഞു.30-ഷെയർ ബിഎസ്ഇ സെൻസെക്സ് 243.36 പോയിന്റ് താഴ്ന്ന് 66,039.38 എന്ന നിലയിലെത്തി. നിഫ്റ്റി 59.2 പോയിന്റ് താഴ്ന്ന് 19,691.85 ലെത്തി.
നെസ്‌ലെ, ഏഷ്യൻ പെയിന്റ്‌സ്, ഇൻഡസ്‌ഇൻഡ് ബാങ്ക്, എച്ച്‌ഡിഎഫ്‌സി ബാങ്ക്, കൊട്ടക് മഹീന്ദ്ര ബാങ്ക്, ബജാജ് ഫിൻസെർവ് എന്നിവ ഇടിവ് നേരിട്ടു. ടാറ്റ മോട്ടോഴ്സ്, എച്ച്സിഎൽ ടെക്നോളജീസ്, ആക്സിസ് ബാങ്ക്, മാരുതി തുടങ്ങിയ ഓഹരികൾ നേട്ടത്തിലാണ്. ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോങ് എന്നിവ നഷ്ടത്തിലാണ് വ്യാപാരം നടക്കുന്നത്. വെള്ളിയാഴ്ച അമേരിക്കൻ വിപണികൾ സമ്മിശ്രമായ തലത്തിലായിരുന്നു. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.10 ശതമാനം ഉയർന്ന് ബാരലിന് 90.98 ഡോളറിലെത്തി.
"ഇസ്രായേൽ-ഹമാസ് സംഘർഷത്തിന്റെ വ്യാപനത്തെക്കുറിച്ചുള്ള ആശങ്കകൾ ബ്രെന്റ് ക്രൂഡിന്റെ വില കുത്തനെ ഉയര്‍ത്തി ബാരലിന് 90 ഡോളറിന് മുകളിലെത്തിച്ചു, സുരക്ഷിതമായ നിക്ഷേപം എന്ന വികാരം സ്വർണ്ണത്തെ 1900 ഡോളറിന് മുകളിൽ എത്തിച്ചു. യുദ്ധ സാഹചര്യത്തിന്‍റെ ഭാവി അജ്ഞാതമാണ്, അതിനാൽ നിക്ഷേപകർ ജാഗ്രത പാലിക്കണമെന്ന് വിവേകം ആവശ്യപ്പെടുന്നു," ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു.
എക്‌സ്‌ചേഞ്ച് ഡാറ്റ പ്രകാരം 317.01 കോടി രൂപയുടെ ഇക്വിറ്റികൾ വാങ്ങിയതിനാൽ വിദേശ സ്ഥാപന നിക്ഷേപകർ (എഫ്ഐഐകൾ) വെള്ളിയാഴ്ച വാങ്ങുന്നവരായിരുന്നു. ബിഎസ്ഇ ബെഞ്ച്മാർക്ക് 125.65 പോയിന്റ് അല്ലെങ്കിൽ 0.19 ശതമാനം ഇടിഞ്ഞ് 66,282.74 ൽ എത്തി. എൻഎസ്ഇയുടെ വിശാലമായ നിഫ്റ്റി 42.95 പോയിന്റ് അഥവാ 0.22 ശതമാനം ഇടിഞ്ഞ് 19,751.05 ലെത്തി.