നോവ അഗ്രിടെക്കിന്റെ ഐപിഒ ഈ മാസം 22ന്; ഓഹരി ഒന്നിന് 39-41 രൂപ
- കാര്‍ഷിക ഉല്‍പന്ന നിര്‍മ്മാണ കമ്പനിയാണ് നോവ അഗ്രിടെക്
- കന്നി പബ്ലിക് ഇഷ്യൂ 143.81 കോടി രൂപ സമാഹരിക്കുമെന്ന് പ്രതീക്ഷിക്കുന്നു.
- ഐപിഒ വഴി ലഭിക്കുന്ന ഒരു തുക പൊതു കോര്‍പ്പറേറ്റ് ആവശ്യങ്ങള്‍ക്കായി
കാര്‍ഷിക ഉല്‍പന്ന നിര്‍മ്മാണ കമ്പനിയായ നോവ അഗ്രിടെക് ലിമിറ്റഡ് 144 കോടി രൂപയുടെ പ്രാരംഭ പബ്ലിക് ഓഫറിംഗിന് (ഐപിഒ) ഒരുങ്ങുന്നു. ഓഹരി ഒന്നിന് 39-41 രൂപ വില നിശ്ചയിച്ചതായി കമ്പനി അറിയിച്ചു. പ്രാരംഭ ഓഹരി വില്‍പ്പന ഈ മാസം 22 ന് പൊതു സബ്സ്‌ക്രിപ്ഷനായി തുറന്ന് 24 ന് അവസാനിക്കുമെന്നും കമ്പനി വ്യക്തമാക്കി. 112 കോടി രൂപ വരെ മൂല്യമുള്ള ഇക്വിറ്റി ഷെയറുകളുടെ പുതിയ ഇഷ്യു ഐപിഒയില്‍ ഉള്‍പ്പെടുന്നു
കമ്പനിയുടെ 11.9 ശതമാനം ഓഹരി ഉടമയായ നൂതലപതി വെങ്കിടസുബ്ബറാവു 77.58 ലക്ഷം ഓഹരികളുടെ ഓഫര്‍ ഫോര്‍ സെയില്‍ (OFS) ഘടകവും ഐപിഒയില്‍ ഉള്‍പ്പെടുന്നു. പുതിയ ഇഷ്യൂവില്‍ നിന്നുള്ള വരുമാനം 14.20 കോടി രൂപ അതിന്റെ അനുബന്ധ സ്ഥാപനമായ നോവ അഗ്രി സയന്‍സസില്‍ പുതിയ ഫോര്‍മുലേഷന്‍ പ്ലാന്റ് സ്ഥാപിക്കുന്നതിനും 10.49 കോടി രൂപ നോവ അഗ്രിടെക്കിന്റെ മൂലധന ചെലവുകള്‍ക്കും നിലവിലുള്ള ഫോര്‍മുലേഷന്‍ പ്ലാന്റിന്റെ വിപുലീകരണത്തിനുമായിട്ടായിരിക്കും വിനിയോഗിക്കുക.
നോവ അഗ്രിടെക്കിന്റെ പ്രവര്‍ത്തന മൂലധന ആവശ്യങ്ങള്‍ക്കായി 26.65 കോടി രൂപയും പ്രവര്‍ത്തന മൂലധന ആവശ്യങ്ങള്‍ക്കായി നോവ അഗ്രി സയന്‍സസിലെ നിക്ഷേപത്തിന് 43.36 കോടി രൂപയും ഉപയോഗിക്കും. കൂടാതെ, ഒരു ഭാഗം പൊതു കോര്‍പ്പറേറ്റ് ആവശ്യങ്ങള്‍ക്കായി നീക്കി വക്കും.
2007-ല്‍ സ്ഥാപിതമായ കമ്പനി മണ്ണിന്റെ ആരോഗ്യ പരിപാലന ഉല്‍പ്പന്നങ്ങള്‍, വിള പോഷകാഹാരം, ജൈവ ഉത്തേജകം, ജൈവ കീടനാശിനി, സംയോജിത കീട പരിപാലനം (IPM) ഉല്‍പ്പന്നങ്ങള്‍, വിള സംരക്ഷണ ഉല്‍പ്പന്നങ്ങള്‍ എന്നിവ ഉള്‍പ്പെടുന്ന വൈവിധ്യമാര്‍ന്ന ഉല്‍പ്പന്ന വിഭാഗങ്ങള്‍ നിര്‍മ്മിക്കുകയും വിതരണം ചെയ്യുകയും വിപണനം ചെയ്യുകയും ചെയ്യുന്നു. കീനോട്ട് ഫിനാന്‍ഷ്യല്‍ സര്‍വീസസ് ലിമിറ്റഡും ബജാജ് ക്യാപിറ്റല്‍ ലിമിറ്റഡുമാണ് ഇഷ്യുവിന്റെ ബുക്ക് റണ്ണിംഗ് ലീഡ് മാനേജര്‍മാര്‍.